Nestos díes especiales, al espuntar d’un nuevu añu, ye cuando faemos planes cola vista puesta nel futuru, nel 2020 qu’empieza. Y ye agora cuando tengo l’honor de dirixime a los asturianos y asturianes. Quiero faelo pensando nel porvenir. Nel bon porvenir que podemos ganar, porque son hores y díes para la esperanza, porque cada añu que s’empecipia ufiértanos siempres un horizonte anováu.
Fáigolo con realismu, ensin negar les dificultaes. Por eso, les mios primeres palabres son para quien peor lo tán pasando. Les persones que sufren la congoxa de tar ensin trabayu; les que tuvieron qu’emigrar p’atopar empléu; les qu’escarecen de recursos o, por una o otra razón, tuvieron que recurrir al nuesu sistema de salú o de protección social. Toes elles merecen la nuesa atención prioritaria.
Soi consciente de qu’estes persones, como les mayores que viven n’una soledá non deseyada o les muyeres víctimes de la violencia machista, nun pueden conformase con bones palabres. Para elles los mensaxes de ciñu y concordia resulten insuficientes. Tamos obligaos a ufierta-yos muncho más y creo, con sinceridá, que podemos faelo. Asturies tien una sociedá fuerte, trabada ya inclusiva, dispon d’una potente rede pública –la sanidá, la educación, los servicios sociales- concebida pa nun dexar a naide tras. Nun ye un privilexu, sinón un patrimoniu colectivu qu’hemos de valorar porque nos fai ser una sociedá más xusta.
Un patrimoniu que foi construyíu ente toos y toes, ameyoráu xeneración tres xeneración. Ye de xusticia que reconoza’l trabayu fechu per caúnu de los gobiernos anteriores y per cada presidente del Principáu. Quiero recordar los que lideró’l mio antecesor, Javier Fernández. Mientres los embates más duros de la crisis, nun escoyó la opción de los retayos nos servicios públicos, l’alternativa más fácil, pero tamién la más dañible.
Y ye que la inversión social nun ye una debilidá, non malbarata los recursos públicos; al contrariu, ayúdanos a que podamos encarar con más garantíes los desafíos que nos aguarden. Ye difícil atopar daqué más granible.
Pensar nel porvenir imponnos falar a les clares de los retos que nos apremien. Por casu, la transición ecolóxica nun ye una posibilidá, sinón una esixencia, un exerciciu de responsabilidá col nuesu planeta y coles xeneraciones futures. Debémos-yos esi esfuerzu, que va traer cambeos na nuesa manera de vida. Ante cuestiones como ésta, de nada sirve volver la cabeza o encadenase a la negación de lo inevitable. Como de nada sirviría tampoco resalvar qu’esi tresformamientu puede estropiar el nuesu presente si nun se lleva a cabu de manera gradual y alcordada, como de forma repitida reclamamos.
Asturies tien, sí, grandes desafíos. Otru ye la demografía, la perda d’habitantes a la que se suma la despoblación de pueblos enteros que se queden vacíos, ensin pasos nin voces que-yos dean aliendu de vida. Ye un drama ciertu, pero como asocede cola transición enerxética o la meyora de les nueses comunicaciones, non podemos superar en solitariu. Síamos sinceros con nós mesmos: precisamos la collaboración activa del Gobiernu d’España y de la Unión Europea.
P’Asturies ye crucial que se forme llueu un gobiernu estatal que respuenda a les nueses necesidaes. Que s’entaíne ensin dilación a tomar midíes pa favorecer l’actividá industrial, especialmente la electrointensiva, precisada de decisiones efectives; qu’impulse nel ámbitu comuñal un axuste en frontera que torgue la desventaya frente a terceros países pa los que contaminar sal de baldre; que promueva una estratexa nacional ante’l desafíu demográficu; qu’ameyore les nueses comunicaciones y concluya les infraestructures ferroviaries nos plazos previstos o que ponga sobre la mesa una reforma del financiamientu autonómicu que, basada nes necesidaes de gastu y non na capacidá fiscal de cada comunidá, consolide la solidaridá.
Por ello espero que’l diálogu y l’alcuerdu, ferramientes principales de la política útil, faciliten qu’España tenga gobiernu de momentu.
N’Asturies, esa política útil y relevante, basada na negociación y les cesiones mutues, va dexar qu’empecipiemos l’añu con presupuestos. Dende’l 1 de xineru, vamos poner hasta l’últimu euru disponible a trabayar pol futuru. Ye un proyectu que supon un puntu d’inflexón nel sofitu a la ciencia y l’innovación, na llucha contra’l despoblamientu, na meyora del Estáu de bienestar y l’aumentu de la inversión pública. Y que, amás, refuerza’l nuesu compromisu cola igualdá y la mocedá.
Ye, tamién, un exerciciu de responsabilidá qu’añede un argumentu más pa creer n’Asturies. En realidá, tenemos munchos motivos pa confiar nes nueses posibilidaes, como lo demuestren les industries qu’apuesten pol Principáu pa crear riqueza. Un datu: nestos momentos, hai más de mil millones d’inversión en marcha. Tamién quiero reconocer l’esfuerzu de les pequenes empreses, de los autónomos, de quien entamen, que tán impulsando’l desenvolvimientu de sectores tan prometedores como’l turismu o les nueves tecnoloxíes.
Estes empreses demuéstrennos qu’apostar per Asturies nun ye un escesu d’inxenuidá. Saben –como resumió’l presidente de l’Autoridá Bancaria Europea – que «la redolada asturiana ye gasolina pal futuru».
El nuevu añu tien que sirvir p’aguiyar esa ambición, non pa fondianos a la resignación y el llamentu. Equí, al mio alredor, nel muséu de Belles Artes, en plenu corazón d’Uviéu, hai obres magnífiques, que tamién nos deben llevar a valorar la relevancia que la creación artística tien na construcción d’Asturies. Anguaño, el muséu superó les 110.000 visites, el so récord históricu. Convídolos a percorrelu porque, magar esos bonos datos, sigue siendo un gran desconocíu pa munches persones.
Pienso que daqué asina nos asocede dacuando coles posibilidaes d’Asturies: que les tenemos al algame de la mano, que podemos valorales, pero que dexámonos vencer pola narcótica dexadez del pesimismu. Y la meyor receta frente a ello ye falar bien d’Asturies y creer nella.
Tenemos que romper eses amarres, sacudinos la blandia comodidá de la resignación. A les dificultáes vénceseles plantando-yos cara, como tantes veces ficimos na nuestra historia. Enfrentales col ánimu derrotáu nunca va ser un principiu buenu pa superales. Por eso ye importante que falemos bien de nós mismos, de Asturies, porque pa llograr lo meyor también fai falta ufiertar lo meyor.
Nel momentu de pensar nel 2020 qu’empieza, nun escaezo a los asturianos y asturianes que tán fora, en cualquier rincón del mundu. Son protagonistes del presente y del futuru de la nuesa tierra y pueden danos numberoses llecciones d’esfuerzu, enfotu y compromisu con Asturies. Por eso, güei más que nunca, merecen una alcordanza bien especial, cargáu de ciñu.
Asturianos y asturianes, de corazón, feliz añu nuevu.
