Empecipió la campaña de roces pa llimpiar 4.254 kilómetros de carreteres de titularidá autonómica. Nesti marcu encuádrense los contratos de caltenimientu, dotaos anguaño con casi cinco millones. Ente esos contratos figura’l serviciu de roces, que s’acaba de poner en marcha y va desenvolvese mientres los próximos cuatro meses. Nesta llexislatura empecipióse la llicitación tresañal d’estes contrataciones, que dexen sofitar a les brigaes de caltenimientu de la Dirección Xeneral d’Infraestructures Viarias y Portuaries, compuestes por cerca de 300 trabayadores distribuyíos pol territoriu en función de criterios xeográficos.
La campaña de roces ta condicionada pola estacionalidad y pola estensión y dispersión de la rede rexonal de carreteres. Les xeres consisten en cortar y retirar la maleza que crez nes marxes de les víes, cola cuenta d’ameyorar la seguridá y comodidá de los usuarios de cara a la dómina braniza, na que’l tráficu amóntase notablemente pola arribación de turistes y los desplazamientos escontra les sableres y los espacios naturales.
A estos contratos de roces suman otros dos venceyaos al caltenimientu ordinariu de les carreteres: los de renovación de la señalización vertical y horizontal y los de reposición de barreres de seguridá, qu’en total algamen una inversión cercana a los 5 millones.
