La Conseyería de Cultura, Política Llingüística y Deporte empezó los trámites pa que’l complexu de la Universidá Llaboral de Xixón opte a ser Patrimoniu Mundial pola UNESCO, al remitir al Ministeriu de Cultura la propuesta y la correspondiente memoria xustificativa pa que la güei conocida como Llaboral, Ciudá de la Cultura pueda entrar na Llista Indicativa Española.
L’anunciu fíxolu esta mañana la conseyera Vanessa Gutiérrez, na so participación nel actu interxeneracional Día del Antiguo Alumno organizáu pola Asociación de Antiguos Alumnos de la Universidad Laboral de Gijón. Gutiérrez valoró positivamente l’empiezu de los trámites porque La Llaboral “nun ye solo un edificiu monumental de gran valor artísticu y patrimonial, sinón un símbolu de la tresformación y el dinamismu de la nuestra comunidá del que faen parte cientos de persones de diferentes xeneraciones”. “Ye un exemplu de cómo los espacios pueden trescender la so función orixinal pa convertise en motores de cambiu y de progresu”, añadió.
La conseyera destacó’l compromisu del Gobiernu d’Asturies con La Llaboral, onde invirtió de recién más de 800.000 euros na restauración de la cúpula de la ilesia y la recuperación de les cruces de la llinterna de la capiella y la de la Victoria que presidía la entrada.
A la cantidá anterior hai que sumar los más de 400.000 euros invertíos nes antigües cocines del complexu, los 800.000 asignaos pola Conseyería d’Educación pa iguar un centru d’innovación de Formación Profesional o los 36.000 euros dedicaos a la modernización de les infraestructures escéniques del Teatru de la Llaboral. Amás, nos dos últimos exercicios destináronse más de 1,4 millones pa distintes xeres de caltenimientu.
Asturies ellaboró esti mesmu añu una memoria xustificativa de la candidatura que yá foi remitida al Ministeriu de Cultura pa la so valoración. Posteriormente, esa evaluación va ser elevada al Conseyu de Patrimoniu Históricu español, que decide los bienes que s’incluyen na Llista Indicativa y, tamién, los que tando nesa llista a lo menos un añu puedan presentase ante la UNESCO pal so reconocimientu como Patrimoniu Mundial.
D’esta manera, l’Executivu asturianu avanza nos trámites pa consiguir el reconocimientu internacional de Llaboral, Ciudá de la Cultura, una demanda que’l Principáu atendió y pola que va siguir trabayando al traviés de la Conseyería de Cultura.
La Llista Indicativa Española
La Llista Indicativa ye un instrumentu plantegáu pola UNESCO y qu’en cada país recueye les propuestes nes que se ta trabayando pa la futura propuesta de declaración como Patrimoniu Mundial. Pa tener derechu al reconocimientu, ye obligatoria la presencia na llista a lo menos un añu.
P’acceder a la Llista Indicativa Española requierse ellaborar un documentu xustificativu qu’analice la realidá del bien propuestu, valore la so importancia patrimonial y la vincule cola Convención de Patrimoniu Mundial, comparándolu con otros bienes similares. Un trabayu que yá realizó y presentó’l Gobiernu d’Asturies.
Un complexu empezáu en 1948
Diseñáu por Luis Moya, el conxuntu d’edificios que faen parte de la Universidá Llaboral de Xixón comenzó a construyise en 1948, concebíu como orfanatu mineru. Nel añu 2016 declaróse Bien d’Interés Cultural cola categoría de monumentu.
Anguaño, en Llaboral, Ciudá de la Cultura conviven la sede de Radiotelevisión del Principáu d’Asturies (RTPA) nel antiguu Conventu de les Clarises, LLABoral Centru d’Arte y Creación Industrial, el Centru Integráu de Formación Profesional, la Recepción, situada nel Patiu Corintiu, la Torre, la Escuela d’Arte Dramáticu, el Conservatoriu Profesional de Música y Danza, la Ilesia, la cafetería, el Teatru de la Llaboral, el Paraninfu y la Facultá de Comerciu, Turismu y Ciencies Sociales “Jovellanos”.
Estos espacios conviven na Ciudá de la Cultura xunto a empreses de calter priváu y instalaciones nueves que nesti momentu se tán poniendo en marcha, como’l centru de formación d’empreses xestionáu pol Conceyu de Xixón o’l centru formativu pa profesoráu de Formación Profesional qu’impulsa la Conseyería d’Educación.
