La Conseyería de Cultura, Política Llingüística y Turismu formalizó güei la entrega al Gobiernu d’España del espediente definitivu de la candidatura de la cultura sidrera asturiana a patrimoniu mundial inmaterial que se va unviar formalmente a la Unesco pa la so valoración.
El director de Cultura y Patrimoniu, Pablo Llión, apurrió l’espediente al director xeneral de Belles Artes del Ministeriu de Cultura y Deporte, Isaac Xastre, na xunta del Conseyu de Patrimoniu Históricu Español, que se celebra en Lanzarote. L’espediente técnicu ye frutu de más de nueve años de trámites que s’empecipiaron colos preparativos pa la declaración de la cultura sidrera como bien d’interés cultural inmaterial (BIC) en 2014.
El Principáu presentó l’añu pasáu l’espediente dempués de que’l Conseyu de Patrimoniu Históricu Español escoyera la candidatura asturiana como representante española pa entrar a formar parte de Llista Representativa del Patrimoniu Mundial Inmaterial de la Unesco. Finalmente, nun pudo ser evaluada nel ciclu 2022-2023, por cuenta de la normativa interna de la Unesco, qu’establez que cada añu namás se van analizar 55 candidatures de les presentaes pelos distintos países representaos na Convención de Patrimoniu Mundial Inmaterial, con preferencia pa les de naciones pocu o nada representaes na Llista de Patrimoniu Mundial. España cunta na actualidá con 20 elementos inscritos nesi rexistru.
Amás, cada país tien derechu a que unos de los sos espedientes s’analice cada dos ciclos. Esto implica que la cultura asturiana de la sidra va ser mui probablemente incluyida nel períodu 2023-2024 y que la decisión final va adoptase a finales de 2024 per parte del Comité de Patrimoniu Mundial Inmaterial de la Unesco.
Un grupu de trabayu constituyíu pol Gobiernu d’Asturies y formáu por representantes de la Denominación d’Orixe Protexida (DOP) Sidra d’Asturies, antropólogos, historiadores y estudiosos foi l’encargáu de revisar y dar forma al espediente técnicu definitivu dende’l pasáu mes de payares, cuando’l Conseyu de Patrimoniu Históricu Español alcordó que la cultura sidrera asturiana fora la candidatura qu’España presentaría en 2022.
