Izquierda Xunida asume’l pidimientu de los vecinos y vecines de los barrios de Nuevu Xixón, Perchera y La Braña cola propuesta de construyir un nuevu rocódromu municipal pa recuperar los 22.000 metros cuadraos de suelu públicu abandonáu y n’estáu deplorable de les antigües instalaciones deportives del Soccer World.
La candidata segunda a l’Alcaldía, Noelia Ordieres, plantega tamién la creación d’un parque públicu y l’aprovechamientu de les pistes deportives de pádel pa responder a les reivindicaciones del vecindariu.“Esta propuesta integra un proyectu deportivu de xestión pública que va dar serviciu non solo a Xixón, sinón a una parte importante d’Asturies y unes zones verdes que seyan d’usu y esfrute del barriu”, considera Ordieres.
Noelia Ordieres critica, amás, a l’actual xestión municipal y el gastu públicu que supunxo pa la ciudadanía: “Ye inentendible l’abandonu, la falta de proyectu y la perda de dinero público y particularmente del Patronatu Deportivu Municipal neste tema”. Pa la candidata, esta propuesta va dexar dar cabida a la demanda del colectivu de deportistes de Xixón, onde mora la mayor comunidá de persones escaladores d’Asturies. Les actuales instalaciones del pabellón municipal de Mata Xove, “quédense pequenes y hai continues denuncies del so deficiente caltenimientu”, amiesta la candidata.
Amás, el proyectu podría impulsar el deporte base cola creación d’una escuela d’escalada pa formar a neños y neñes; amás de responder a la demanda d’instalaciones afayadices pa los clubes deportivos y el personal técnico d’esguilada de tola rexón, un nichu económicu en puxanza n’Asturies.
