El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, garantizó’l compromisu del Gobiernu d’Asturies colos derechos ciudadanos, el so “enanche” y la convivencia pacífica nel senu d’una sociedá dialogante, abierta y tolerante”, mesmo que la so llucha decidida contra los discursos tránsfobos y homófobos.
Zapico realizó estes declaraciones por cuenta de la xunta del Observatoriu Asturianu contra la LGTBIfobia, que detectó un aumentu de más del 40% de les denuncies poles manifestaciones d’odiu contra esti colectivu. Anguaño, 30 persones denunciaron dalgún tipu d’agresión o discriminación por razones homófobes o tránsfobas, 9 más qu’en 2022. El conseyeru amosó la so esmolición por estes cifres, que revelen situaciones d’odiu y ataques a los derechos de les persones lesbianes, gais, transexuales, bisexuales ya intersexuales.
Al respective de estes cifres, la directora xeneral de Participación Ciudadana, Tresparencia, Diversidá Sexual y LGTBI, Nuria Rodríguez, amosó la so esmolición por situaciones conflictives que se tán produciendo en families, daqué que, al paecer, nun asocedía hasta agora. “Hai families que tán entendiendo que les orientaciones sexuales de los sos fíos y fíes nun correspuenden a daqué sano y positivo”, afirmó la directora, pa quien ye necesariu que l’Observatoriu “tome decisiones y midíes concretes pa cortar de raigañu esti tipu de casos”.
Rodríguez tamién sorrayó que la futura llei LGTBI asturiana, en que’l so borrador ta trabayando’l gobiernu en collaboración colos colectivos implicaos, va tener que recoyer y contemplar estes situaciones, que, al so xuiciu, nun se produciríen n’igual midida con polítiques apropiaes de prevención.
L’oxetivu de la xunta, la primera celebrada nesta llexislatura, foi analizar la situación actual del colectivu LGTBI n’Asturies y estudiar les midíes adoptaes pol Executivu autonómicu pa lluchar contra la so discriminación.
Zapico recordó que la so conseyería multiplicó por 2,2 la partida dedicada nos presupuestos de 2024 a estes polítiques, hasta algamar los 2,9 millones, y que la mayor parte va destinase a la llucha contra les manifestaciones d’odiu. Para’l conseyeru, ye prioritariu esclariar que les enmiendes a la totalidá del presupuestu que presenten los grupos parlamentarios esti vienres suponen votar “un retayu en derechos ciudadanos, en polítiques LGTBI y en polítiques progresistes”.
L’observatoriu, órganu de consulta y participación adscritu a la conseyería que preside’l conseyeru y del qu’ocupa la vicepresidencia la directora Nuria Rodríguez, crear en 2021 pa emprestar asesoramientu y collaboración institucional a l’Alministración del Principáu col fin de defender los derechos d’estes persones y atayar les acciones d’intolerancia que los afecten pola so identidá sexual.
Cuenta con doce vocales, ente los que figuren otros representantes del Gobiernu autonómicu, lo mesmo que de los colexos d’abogaos d’Uviéu y Xixón, la Oficina d’Asistencia a les Víctimes de Delitos Violentos, la Federación Asturiana de Conceyos, la Unidá d’Igualdá de la Universidá d’Uviéu, les organizaciones sindicales y los colectivos LGTBI.
Asturies dispón d’un teléfonu d’atención a les víctimes de la LGTBIfobia (635 178 634), un númberu que permanez operativu les 24 hores y qu’ufierta asesoramientu profesional y sofitu psicolóxicu a quien fueren oxetu d’agresiones o discriminaciones pola so orientación sexual.
