El Palaciu. Residencies Artístiques y Acción Cultural abre les sos puertes nel Palaciu de San Andrés de Cornellana, en Contrueces, Xixón. Esti antiguu palaciu barrocu, construyíu nel
sieglu XVIII, preséntase agora a la comunidá artística, y a tola ciudadanía, como un equipamientu cultural nel que se va dar protagonismu a los procesos creativos, al fortalecimientu de redes de trabayu ente distintes disciplines artístiques, al intercambiu d’esperiencies, al espardimientu de proyectos y a la convivencia con (y en) la redolada.
Esti nuevu programa de residencies artístiques, entamáu y xestionáu pola Fundación Municipal de Cultura, Educación y Universidá Popular del Conceyu de Xixón, va suponer una meyora, y un pasu necesariu, nes polítiques de sofitu a la creación artística que, dende fai más de dos décades y de manera siguida, vien desenvolviendo esta institución cultural al traviés de les sos distintes llinies de financiamientu y programes d’espardimientu.
Les residencies artístiques d’El Palaciu ponen en marcha con un proyectu pilotu que mientres los primeros meses de 2024 va testar el desenvolvimientu de dellos proyectos creativos y, a partir d’ellos, va consolidar les llinies estratéxiques que van dexar implementar el correspondiente programa añal de residencies y acción cultural, respondiendo a les mires y necesidaes del sector artísticu y dexando a la ciudadanía, de la mesma, poder formar parte activa del fechu creativu.
Mientres el desenvolvimientu d’esti proyectu pilotu cuatro creadores, dos homes y dos muyeres, van trabayar nes instalaciones d’El Palaciu, convirtiéndose este nun centru de creación, pero tamién se van celebrar actividaes como charres, alcuentros y meses de trabayu, con axentes de distintes disciplines artístiques, ceadores y xestores, que van facilitar la puesta de mancomún y l’intercambiu d’idees y esperiencies. Igualmente, van entamase actividaes, en xornaes de puertes abiertes, como talleres, alcuentros con artistes o diverses actuaciones en vivu, por que la ciudadanía pueda conocer l’espaciu, los trabayos que nél se desenvuelven, mesmo que participar y conocer viviegamente los procesos creativos qu’ellí van tener llugar.
Un equipu interdisciplinar, integráu por distintos perfiles profesionales adscritos a los distintos Departamentos de la Fundación Municipal de Cultura, Educación y Universidá Popular va encargar de los llabores de xestión, coordinación, mediación y evaluación de les acciones col oxetivu puestu en sentar les bases d’un proyectu cultural sólidu, al par que flexible, abiertu, dinámicu y con un enorme potencial de posibilidaes pal so desenvolvimientu siguíu.
