Xixón al día

Autor: xixonaldia

  • Asturies medra en población tres años siguíos

    Asturies medra en población tres años siguíos

    Asturies llogró revertir l’enclín históricu de perda de población y encadena yá trés años consecutivos de crecimientu. Tres tocar suelu demográficu en 2022, la comunidá ganó más de 9.000 habitantes. En 2024 llégase a 1.014.112 persones residentes, según datos de la Sociedá Asturiana d’Estudios Económicos ya Industriales (Sadei). En gran parte, esti cambéu débese al récord migratoriu rexistráu mientres trés años consecutivos, con un saldu positivu de casi 13.000 persones en 2024, abonda pa compensar el descensu natural por avieyamientu. Per primer vegada, lleguen más persones del estranxeru que d’otres comunidaes, lo que consolida Asturies como un territoriu atractivu pa vivir y trabayar.

    El Gobiernu d’Asturies constituyó formalmente la Comisión Gubernamental pal Retu Demográficu, el muérganu encargáu de coordinar de forma tresversal toles polítiques qu’inciden na evolución de la población. La vicepresidenta y conseyera de Presidencia, Retu Demográficu, Igualdá y Turismu, Gimena Llamedo, presidió la xunta, na que punxo en valor el xiru positivu na evolución demográfica de la comunidá.

    Nesi alcuentru, constatóse que’l gobiernu ameyoró los sos fluxos con otres rexones clave: dende 2020, el saldu migratoriu con Madrid pasó de ser negativu a convertise nel meyor ente toles comunidaes, lo que reflexa l’impactu de les polítiques d’atracción de talentu, torna y calidá de vida impulsaes pol Executivu autonómicu.

    “Asturies ye una tierra d’oportunidaes. Estos datos demuestren que les nueses polítiques tán funcionando: tamos recuperando población, atrayendo talentu y xenerando futuru”, destacó la vicepresidenta.

  • Un documental va percorrer 38 conceyos asturianos pa promocionar el turismu industrial y mineru

    Un documental va percorrer 38 conceyos asturianos pa promocionar el turismu industrial y mineru

    El Gobiernu d’Asturies impulsa una gran producción audiovisual pa promocionar el patrimoniu industrial y mineru como recursu turísticu de primer nivel. La serie documental, que va tar conducida pol periodista Juan Ramón Lucas y va empezar a rodase esti mes, va percorrer 38 conceyos p’amosar la buelga que les actividaes estractives dexaron nel territoriu y que se van tresformar n’enclaves d’atracción turística y cultural con proyección de futuru.

    La docuserie forma parte de la estratexa Asturies, Naturaleza Minera, impulsada pol gobiernu pa reforzar el so apueste por un modelu de turismu sostenible, desestacionalizáu y distribuyíu per tola comunidá. Con esti oxetivu, y al traviés de los fondos europeos Next Generation, l’Executivu moviliza 4,5 millones pa executar midíes que tresformen esti patrimoniu en motor turísticu, económicu y social.

    Ente les actuaciones previstes destaquen les empobinaes a ameyorar los equipamientos y la puesta en valor de los recursos incluyíos nos planes de sostenibilidá turística d’Ozcos-Eo, Teberga, Baxu Nalón, Valle del Nalón, Cabrales, Parque Históricu del Navia y Monte Central.

    La vicepresidenta del Gobiernu, Gimena Llamedo, participó na presentación d’esta serie documental, celebrada güei nel pozu Sotón, en Samartín del Rei Aurelio. “Tamos recuperando espacios industriales pa da-yos una nueva vida amestada al turismu, xenerando empléu y dinamización económica en contornes que fueron castigaes pola reconversión”, valoró. Al traviés d’esta serie podrán afayase los rincones más sorprendentes que’l legáu mineru dexó en 38 conceyos asturianos.

    Con una duración de 50 minutos per episodiu, cada entrega va amosar localizaciones clave y va esplorar localidaes marcaes pola so hestoria minera. El percorríu va dir dende’l valle del Nalón, Caudal o Samuño a zones como’l Monte Central, Oscos-Eo y Fontes del Narcea. Amás, la serie va estender a otros territorios que tamién caltienen muertes d’esti tipu, como Xixón o la contorna oriental.

  • El gobiernu anicia la redacción d’un decretu pa prevenir, detectar y erradicar l’acosu escolar

    El gobiernu anicia la redacción d’un decretu pa prevenir, detectar y erradicar l’acosu escolar

    La Conseyería d’Educación empecipió la ellaboración d’un decretu pa prevenir, detectar y erradicar l’acosu escolar, tal como s’anunció en mayu. La Dirección Xeneral d’Inclusión Educativa y d’Ordenación empecipia a partir de mañana y hasta’l 22 de xunetu’l periodu de consulta pública previa, nel que la ciudadanía va poder realizar aportaciones. La información yá ta disponible nel portal de participación.

    Esti nuevu decretu tien como oxetivu establecer un marcu xurídicu sólidu que garantice la prevención y detección del acosu escolar, asegurando asina’l derechu del alumnáu a una educación de calidá, llibre de violencia, que dexe desenvolver dafechu les sos capacidaes y algamar el so máximu potencial.

    Ente los aspectos clave que va regular la norma tán los siguientes:

    • L’actualización y regulación de los protocolos esistentes, col fin d’ameyorar la detección temprana de casos y fomentar la sensibilización nos centros educativos.
    • La ellaboración d’un plan cuatrienal con midíes concretes pa combatir l’acosu escolar.
    • La promoción de la formación del personal educativo, l’establecimientu de canales eficaces de denuncia y la implementación d’acciones reeducativas empobinaes al alumnáu acosador.
    • La creación d’un sistema de siguimientu de casos, que dexe evaluar la efectividá de les midíes correctores adoptaes.
    • La puesta en marcha d’un Observatoriu del Acosu Escolar.
    • El decretu tamién va reforzar el compromisu de los centros educativos na llucha contra tou tipu de violencia, encamentándolos a utilizar tolos recursos al so algame pa prevenir situaciones d’acoso y fomentar una convivencia positiva.

    Ha destacase que’l gobiernu yá cunta con protocolos d’actuación que fueron actualizaos en trés ocasiones nos últimos cursos. Estes revisiones incorporaron aspectos como’l ciberacosu, les agresiones rellacionaes cola orientación o identidá sexual y les suxerencies de los equipos directivos. Amás, impulsáronse campañes informatives y roblóse un alcuerdu de collaboración col Colexu Oficial de Psicoloxía.

  • Izquierda Xunida pide la participación ciudadana nel diseñu de Naval Xixón

    Izquierda Xunida pide la participación ciudadana nel diseñu de Naval Xixón

    El voceru municipal d’Izquierda Xunida nel Conceyu de Xixón, Javier Suárez Llana, va pidir nel Plenu del próximu miércoles “activar yá” la participación política, social y vecinal nel diseñu urbanísticu de Naval Xixón. “Resueltu’l discutiniu cola Autoridá Portuaria sobre la titularidá de la franxa mariniega, y a puntu d’axudicase la redacción del Plan Especial de Reforma Interior, ye’l momentu de poner en marcha un procesu que garantice una participación real nel diseñu tanto del polu d’economía azul como de los espacios públicos d’usu llibre que se van a xenerar”, defende Suárez Llana.

    Nesti sentíu, el conceyal d’IX recuerda que yá en septiembre de 2023 el Gobiernu municipal aceptó un ruegu de la so formación p’involucrar a grupos políticos, asociaciones vecinales y axentes sociales nel desenvolvimientu del proyectu. “Recordólo la mesma alcaldesa énte’l Conseyu Social el 16 de mayu, comprometiéndose a cumplilo, y creemos que ye’l momentu. En cuestión de selmanes empecipiará la redacción del PERI que va ordenar tol ámbitu, y cualquier idea que nun apaeza recoyida nesi documentu va ser tanto como que nunca se propunxo”.

    Poro, el voceru d’IX plantega la creación d’una comisión d’estudiu venceyada a la tramitación del PERI, con participación de grupos políticos, axentes sociales y movimientu vecinal, y con tresparencia nos sos trabayos. “Y tamién abiertu a les aportaciones d’otres instituciones con trayectoria n’árees d’investigación y conocencia rellacionaes col mar y con actividá na ciudá, como la Universidá d’Uviéu, l’Acuariu o l’Oceanográficu”.

    Suárez Llana defende que “proyectos de rexeneración urbana y granible como esti nun pueden facese solo dende’l Gobiernu; tienen d’integrar una visión plural de la ciudá”. El conceyal d’IX recuerda tamién que “sigue pendiente la compra de los terrenes de PYMAR pa completar el proyectu, y que l’interés d’Indra en disponer d’espaciu en Naval Xixón implicaría tener que modificar les actividaes previstes primeramente pal ámbitu, qu’anguaño se llenden a la economía azul. Son munches les decisiones a tomar que van definir el futuru d’esa zona de la ciudá, y dende’l nuesu puntu de vista tienen de tomase dende la participación y aspirando al máximu consensu”.

  • 30 sableres d’Asturies cunten yá con desfibriladores

    30 sableres d’Asturies cunten yá con desfibriladores

    Una trentena de sableres asturianes disponen de desfibriladores tres l’activación del Plan de Salvamentu del Principáu (Plan Sapla) que coordina’l Serviciu d’Emerxencies. Estos dispositivos tán allugaos nos puestos de socorrismu y tán a disposición del personal qu’empresta serviciu nos arenales, que cunta con formación en reanimación cardiopulmonar (RCP) y nel usu d’estos aparatos.

    D’esta miente, aumenten les posibilidaes de supervivencia en casu de que dalgún bañista sufra una parada cardiaca, yá que los primeros minutos d’atención son cruciales y pueden marcar la diferencia ente la vida y la muerte. Les sableres cardioprotexíes, por conceyos, son les siguientes:

    • Caravia: La Espasa y La Isla.
    • Carreño: Xivares.
    • Castrillón: Salinas, Santa María del Mar y El Sablón.
    • Castropol: Arnao y Penarronda.
    • Coaña: Arnelles.
    • Colunga: La Griega
    • Cuideiru: Cueva.
    • El Franco: Porcía.
    • Gozón: Verdicio y Xagó.
    • Llanes: Vidiagu, Toró, Palombina, Barru y San Antolín.
    • Muros de Nalón: Aguilar.
    • Navia: Frexulfe y Navia.
    • Ribadeva: La Franca.
    • Sotu’l Barcu: Los Quebrantos.
    • Tapia: Los Campos y Serantes.
    • Valdés: Outur.
    • Villaviciosa: Rodiles y La Ñora.
  • Comic Con conviértese nel meyor antídotu contra l’agua

    Comic Con conviértese nel meyor antídotu contra l’agua

    La inauguración del festival más esperáu del cómic nacional da’l pistoletazu de salida a cuatro díes de diversión, market, actuaciones, firmes y presentaciones, onde’l mundu “friki”
    será’l protagonista.

    Ayeri dio empiezu la Comic Con, l’eventu más esperáu polos amantes del cómic y la manga. Tou empezó a les 18.30 nel Palaciu de Congresos de la cortil ferial Luis Adaro cola presentación y firmes de los cómics esclusivos DC y Marvel. Los asistentes a esta presentación tuvieron la oportunidá de ser los primeres en tenelo nes sos manes, amás de llevase trés prints inéditos, que tamién se fixeron puramente pa esta Comic Con cola collaboración de Panini Comics. Na presentación y firmes, presidida por Suca García (dirección de Metrópoli y Comic Con) y Pepe Caldelas (dirección de Comic Con) tuvieron los autores del Cómic Esclusivu: Dan Mora, Rafa Sandoval, Jorge Jiménez, Bruno Redondo, Daniel Sampere, Simone di Meo a los que se xuniríen los coloristes Tomeu Morey y Alejandro Sánchez, otros dos pesos pesaos del mundu del cómic. L’ambiente d’Anime Con y Comic Con era bultable en tol recintu, onde’l “cosplay”, los distintos stands temáticos, el market, los talleres y les charres reinaron mientres la tarde de la sesta xornada de la Metrópoli.

    A les 21.00, contra vientu y marea, saltaríen a les tables del escenariu 2 Salistre que magar del agua, animaron al públicu col so soníu gaditano, que nos fixo sentir un poco más cerca del branu que güei non se terminaba de sentir en Xixón. Enérxicos, orgánicos y naturales podríen defini-yos, pero sobremanera, portadores de bon rollu, porque’l nutríu públicu bailló y cantó so l’agua mientres tol so conciertu. Con un tiempu que nun ameyoraba, l’escenariu 1 taba atarraquitáu de fans que deseyaben ver al so artista, Álvaro de Lluna. Con una impresionante puesta n’escena con cortines, fueu y xuegos de lluces, la potencia del pop rock más actual sentir en Metrópoli. El Sevillanu que nel so día formó parte de Cincinnati, agora en solitariu pero con una impecable banda demostrónos de lo que ye capaz, y ye que si puedes faer coriar de principiu a fin al to públicu nuna tarde lluviosa, ye que daqué tas faciendo bien.

  • El Gobiernu d’Asturies lleva la intelixencia artificial a los conceyos de menos de 20.000 habitantes al traviés del programa ‘Ruta dixital’

    El Gobiernu d’Asturies lleva la intelixencia artificial a los conceyos de menos de 20.000 habitantes al traviés del programa ‘Ruta dixital’

    El gobiernu asturianu punxo en marcha Ruta dixital, un programa innovador p’averar la formación en nueves tecnoloxíes a los conceyos rurales con menos de 20.000 habitantes, col fin de combatir la fienda dixital.

    Al traviés d’un conveniu robláu ente la Conseyería Presidencia, Retu Demográficu, Igualdá y Turismu, y la Cámara de Comerciu d’Uviéu y dotáu con 2,4 millones, un aula móvil va movese per 71 conceyos con una ufierta formativa gratuita de cien cursos, caún de siete hores y media de duración, en formatu dixital y online.

    L’aula móvil tien un llargor de diez metros a los que se suman dos módulos llaterales estensibles, lo que dexa ufiertar casi 42 metros cuadraos. Amás, cuenta con equipos pa diez alumnos de forma simultánea, accesu a internet d’alta velocidá y un sistema de conexón vía satélite.

    La vicepresidenta del gobiernu d’Asturies, Gimena Llamedo, visitó la primer parada, en La Ribera, onde señaló l’importante esfuerzu que ta realizando l’Alministración pa llegar a tolos requexos d’Asturies, smesmo que’l so compromisu col desafíu demográficu, “pa que naide quede tras”.

    Llamedo venceyó esta iniciativa al apueste pola simplificación burocrática qu’impulsa l’Executivu autonómicu y que pretende averar l’Alministración a les persones. Un procesu, añedió, nel que llueu va encaxar una nueva pieza: la evolución de la sede lletrónica escontra la nueva plataforma dixital MiPrincipado. “Con ella, vamos poder llevar l’Alministración nel bolsu”, valoró la vicepresidenta, quien amestó qu’esta nueva canal va dexar realizar trámites, pagar tases, consultar carnés o espedientes, too ello ensin pasar por un ventanu.

    Respectu al programa Ruta dixital, incidió en que va consistir “en dir pueblu a pueblu dando formación dixital básica a más de 11.000 persones de toles edaes”.

    La ufierta formativa dedica un apartáu específicu a la intelixencia artificial (IA), una ferramienta fundamental en tolos ámbitos y pieza clave d’estos cursos. Hai trece títulos nos que se van ufiertar pautes pal usu básicu de la IA nel día a día, la redacción de Prompts, usos prácticos de ChatGPT o cómo crear una identidá de marca con esti tipu de tecnoloxía.

    Destaquen tamién los cursos empobinaos a les persones mayores, con conteníos enfocaos a utilidaes como pidir cita previa, xestionar contactos y axustes del móvil, reconocer estafes, unviar audios, compartir imaxes o realizar videollamadas. Coles mesmes, va haber formación pa persones adultes y tamién pa escolares.

    Les próximes paraes de Ruta dixital van ser Les Regueres, Candamo, Grau, Tameza, y Salas. El percorríu va siguir con Santo Adriano, Proaza, Teberga, Morcín y Riosa, pa retomar l’actividá en septiembre, cola vuelta al cole.

  • El Gobiernu suscribe colos sindicatos el pactu Asturies Educa

    El presidente del’Asturies, Adrián Barbón, encabezó güei la firma del pactu Asturies Educa, la fueya de ruta que va dexar fortalecer la escuela pública nos próximos años y qu’implica 45 millones d’inversión. “Pal mio Executivu, pal gobiernu de progresu d’Asturies, ye un pactu d’obligáu cumplimientu que namás va almitir cambeos pa reforzalu”, aseguró’l xefe del Executivu.

    La conseyera d’Educación, Eva Ledo, suscribió esta mañana’l documentu con Gumersindo Saiz, d’Anpe Asturies, Borja Llorente, de CC.OO. d’Enseñanza; Miguel Laria, de Suatea y Cristóbal Ponte, de UGT Servicios Públicos. La robla va dexar impulsar l’alcuerdu alcanzáu ente’l gobiernu y les organizaciones sindicales que punxo fin a les movilizaciones de la comunidá educativa’l pasáu mes de xunu.

    Ente otros aspectos, el testu recueye los siguientes compromisos:

    – L’aumentu del profesoráu, con 300 nuevos especialistes en pedagoxía terapéutica y audición y llinguaxe.
    – L’aceleración del amenorgamientu del alumnáu por aula, hasta un máximu de 23.
    – La medría de les retribuciones, que nel profesoráu con menos de seis años d’esperiencia va llegar a los 210 euros mensuales.
    – L’axilización de les sustituciones.
    – L’aplicación del Plan Simplifica Educación, pa descargar de xeres burocrátiques al profesoráu.
    – La nueva regulación de les baxes médiques, que va garantizar el cobru del cien per cien del sueldu al personal docente.

    “Un gobiernu qu’escucha, que nun se tapa los oyíos, sabe reaccionar y rectificar. Pa delles persones, reconocer un erru ye una debilidá; pa mi ye un aciertu. Nós reconocémoslo y nos aprestamos a solucionalo. La disposición de les organizaciones sindicales y del gobiernu, representáu pola vicepresidenta, Gimena Llamedo, y el conseyeru de Facienda, Guillermo Peláez, dexó entablar la negociación que fructificó n’Asturies Educa”, valoró Barbón.

    Mientres la so intervención, aseguró que la Conseyería de Facienda trabaya por que los compromisos económicos que trai’l pactu tengan reflexu nes próximes cuentes autonómiques, “El proyectu de presupuestos de 2026 va ser, con mayúscules, el presupuestu de la educación pública”, garantizó.

  • Molotov fai españar Metrópoli

    Molotov fai españar Metrópoli

    Un martes lluviosu nun paez el meyor escenariu pa un eventu al aire llibre, pero Metrópoli llogró una vegada más una afluencia masiva de públicu gracies a un plantel d’actividaes de lluxu.

    La primer cita de la tarde foi con Juan Gómez-Jurado, qu’ufiertaría una charra a los y les
    siguidores que s’allegaron a la so cita lliteraria. A les 21.00 l’escenariu 2 arrancaría la xornada musical con El Duende Callejero, que col so amiestu refrescante de pop y rumba, fixeron que l’agua paeciera nun esistir pa poder esfrutar de los sos ritmos más sureños.

    Toos sabíenlo, pero se confirmó cuando a les 22:30, el públicu enllenó l’escenariu 1 pa poder esfrutar de los mexicanos Molotov. Los que marcaron adolescencies cola so ““¿Dónde jugarán las niñas? agora enfrentábense a un públicu totalmente apurríu que quería remembrar esos himnos de mocedá que siguen totalmente vixentes a día de güei. “Pendejo”, “Amateur” y “Chinga tu madre” seríen les encargaes d’arrancar un conciertu nel que non solo tocaron hits propios, homenaxaríen a Misfits col so particular“Me convertí en un marciano” o a los Saicos con “Demolición”, y el momentu cimeru sedría cuando tol públicu, qu’entá nun dexara de botar, coriaría’l so archiconocido himnu “Puto”, pa zarrar con “Rastaman-Dita” con miembros del públicu sobre l’escenariu y una audiencia afónica de coriar los sos ésitos. Zarru de luxu pa un martes de Metrópoli que nun fixo más qu’empezar.

  • Iniciativa pol Asturianu pide “coherencia” al Conceyu d’Uviéu y reclama midíes pa visibilizar l’asturianu

    Iniciativa pol Asturianu pide “coherencia” al Conceyu d’Uviéu y reclama midíes pa visibilizar l’asturianu

    Iniciativa pol Asturianu reclama coherencia al equipu de gobiernu uvieín pol usu del asturianu nel conceyu. La llingua propia ye ún de los exes vertebradores de la campaña de la candidatura a Capital Europea de la Cultura nel añu 2031 col lema ‘Puxa Europa. The future is now’. Na so presentación, el xefe del serviciu de comunicación y director del proyectu, Rodolfo Sánchez, valoró la llingua asturiana como un elementu distintivu, arriquecedor y un atractivu cultural. Afirmó tamién que l’asturianu apurría un valir añedíu a la candidatura y qu’Europa premiaba l’usu de les llingües minorizaes nes candidatures.

    L’asociación valora la reconocencia del patrimoniu llingüísticu como un aspectu a curiar y reclama al Conceyu d’Uviéu pasos alantre pa que nun queden en pallabres. Iniciativa pol Asturianu recuerda qu’Uviéu nun tien plan de normalización llingüística, serviciu de normalización llingüística nin fai usu de la toponimia oficial.

    La entidá recuerda tamién que’l Partíu Popular, que gobierna con mayoría absoluta nel conceyu, presume constantemente de l’aprobación de la Llei d’Usu del Asturianu, pero cuando tien capacidá p’aplicala, como ye’l casu, nun lo fai. «Allegrános esa valoración del asturianu na campaña a la capitalidá pero nun entendemos l’ausencia del idioma na páxina web municipal, nos autobuses urbanos, na cartelería (Antroxu, San Xuan, San Matéu…), etc».

    Iniciativa pol Asturianu contactó col director de la campaña pa reconocer la inclusión del asturianu y poles pallabres envalorando’l patrimonio llingüísticu y reclamó avances nel usu normal y la visibilización del idioma como ocurre en centenares de conceyos de Galicia, Comunidá Valenciana o Baleares, comunidaes con llingua propia que cuenten con gobiernos autonómicos y municipales del PP. La organización de reivindicación llingüística considera que la capital nun pue quedar atrás na normalización social del asturianu. «Ye’l momentu d’aplicar el discursu del Partíu Popular sobre l’asturianu y ser mínimamente coherentes colo que se diz na Xunta Xeneral y nel Plenu d’Uviéu», sentenciaron dende l’asociación.