Xixón al día

Autor: xixonaldia

  • Les tarifes de los servicios de taxi van xubir esti añu’l 3,71% n’Uviéu y Avilés

    Les tarifes de los servicios de taxi van xubir esti añu’l 3,71% n’Uviéu y Avilés

    El Conseyu de Gobiernu aprobó güei los precios del serviciu de taxis d’Uviéu y Avilés pa 2025, que incluyen una xubida media del 3,71%.

    L’actualización del coste respuende a una petición de los dos ayuntamientos, consensuada coles asociaciones profesionales, y cuenta col informe favorable de la Comisión de Precios d’Asturies.

    De esti mou, la baxada de bandera n’horariu diurnu va pasar de 2,09 a 2,17 euros, mientres que’l kilómetru recorríu fíxase en 1,18 euros, la hora d’espera en 28,95 y la carrera mínima, en 5,09.

    L’actualización de los precios incluye tamién nueves tarifes pa los horarios nocturnos, los díes festivos y les xornaes de Nuechebona y Nuechevieya. A mou d’exemplu, la carrera mínima en festivos y horariu nocturnu va ser de 6,37 euros.

  • Mieres prepárase pa celebrar l’Antroxu los díes 4 y 7 de marzu

    Mieres prepárase pa celebrar l’Antroxu los díes 4 y 7 de marzu

    La Truchona del Caudal, una de les protagonistas del Antroxu mierense,
    va celebrar esti añu la declaración de la Cultura Sidrera Asturiana como
    Patrimoniu Cultural Inmaterial de la Humanidá

    Ye la fiesta de la color, la lluz, la música, los disfraces, les charangues…
    Avérase l’Antroxu y dende la conceyalía de Festexos que dirixe Rocío Antela yá ta tou
    preparáu pa esta celebración que, como ye tradición, llega a Mieres con dos díes
    destacaos, el 4 de marzu, cita col Antroxu Infantil, y el 7 de marzu, el Gran Antroxu. Dos
    xornaes nes que’l disfrute de guah.es y mayores ta garantizáu y nel que nun va faltar la
    Truchona del Caudal, una de les protagonistes del Antroxu mierense, que nesta ocasión va
    celebrar la declaración de la Cultura Sidrera Asturiana como Patrimoniu Cultural Inmaterial
    de la Humanidá.
    Falta mui pocu, por tanto, pal Antroxu y el cartel y el dípticu informativu yá tán llistos.
    Un cartel, firmáu pola diseñadora gráfica María Ortiz, nel que nun falta la Truchona, cola so
    montera picona, la sidra, por supuesto, los disfraces, el color y la música tresmitiendo la
    allegría que enllena les cais con esta celebración.
    Un Antroxu que llega con un ampliu programa d’actividaes nel que nun faltan los pasacalles,
    siete charangues (2 nel infantil y 5 nel Gran Antroxu), el cortexu, la quema de la truchona o’l
    veloriu. Nin, por supuesto, los desfiles concursos con premios que, nel casu del Antroxu
    Infantil, nel que collabora Caja Rural d’Asturies, van dende los 150 a los 400 euros, y nel
    Gran Antroxu dende los 250 a los 1.800 euros. Casi 8.500 euros en premios pa un Antroxu
    que ye un referente y que se convierte cada añu en cita obligada pa los y les amantes de la
    fiesta y los disfraces que, amás, tamién van poder conocer más sobre la sidra con actividaes
    didáutiques y divulgatives sobre la cultura sidrera mientres el xuráu delibera sobre los premios.
    Un Antroxu pa toes y toos que va contar tamién con espacios accesibles marcaos pa
    que tol mundu pueda esfrutar del desfile. Amás, nel Antroxu Infantil ta prevista la
    participación de la Asociación ADPA (Asociación polos derechos de les persones con
    autismu) zarrando la comitiva pa minimizar la so esposición al ruíu mientres esfruten de la
    fiesta.

    Los díes 4 y 7 de marzu, cita col Antroxu, en Mieres.

  • Vega reclama al Gobiernu la restitución del valláu na AS-377

    Vega reclama al Gobiernu la restitución del valláu na AS-377

    L’asociación vecinal alerta de la peligrosidá que supón la so ausencia pa los vecinos

    L’Asociación de Vecinos San Emiliano de Vega reclama a la Conseyería de Movilidá, Cooperación Llocal y Xestión de Emerxencies la reposición d’unes valles na vía autonómica AS-377 a l’altura del númberu 3544. La entidá vecinal explicó nun escritu dirixíu al departamentu de Alejandro Calvo que les valles ubicaes na calzada, conocida popularmente como Carretera de La Pola, fueron retiraes dempués d’un accidente que supunxo la so rotura pero qu’a día de güei nun fueron reinstalaes. El colectivu vecinal argumenta nel so escritu que nesi tramu la velocidá de los vehículos ye peralta, xenerando una gran inseguridá por parte de los vecinos que precisen d’esi tramu pa dir al centru salú o la escuela.

    L’Asociación de Vecinos San Emiliano de Vega considera necesaria perimportante la recuperación d’esti elementu protector porque ye un puntu nel que davezu hai munchos sinestros y la colocación d’estes valles protectores impediría l’impactu de vehículos en casu de nuevos choques.

    Mesmamente, l’asociación insta al Ayuntamientu de Xixón a unviar un escritu de sofitu al Gobiernu d’Asturias pa sofitar esta reivindicación. Dende l’organismu aclararon que “siendo conscientes de la titularidá autonómica de la vía, facemos un llamamientu al Ayuntamientu que contacten cola Conseyería pa llograr una intervención nel menor tiempu posible pola seguridá vial de los nuesos vecinos”.

  • Iniciativa pol Asturianu recupera los grupos de conversación n’asturianu

    Iniciativa pol Asturianu recupera los grupos de conversación n’asturianu

    Iniciativa pol Asturianu recupera los grupos informales de conversación n’asturianu en collaboración col Conseyu de la Mocedá de Xixón (CMX). La responsable de la cuenta educativa ‘Cosines de Clas’ va ser la encargada de la dinamización del grupu. La participación ye de baldre.

    Con esta convocatoria preténdese abrir un espaciu pa toles persones que necesiten d’un espaciu informal, relaxáu y seguru onde quitar el mieu a falar n’asturianu en públicu y nel que nun importa’l nivel d’usu o conocencia del idioma. Los grupos informales de conversación son una iniciativa del CMX col envís de que la xente pierda’l mieu a falar n’otros idiomes como’l francés, l’inglés y l’alemán. Resulta, entós, perinteresante usar estos espacios como sitios seguros onde l’asturianu medre ensin tar estigmatizáu, p’amosar que se pue falar n’asturianu en toles situaciones sociales, seya cola familia, na cai, nel supermercáu o colos collacios.

    La cita va repetise tolos sábados a les diez de la mañana de manera telemática, al traviés de la plataforma Zoom. Pa facilitar el trabayu pa la organización y la comunicación, les persones interesaes han rellenar un formulariu na páxina web d’Iniciativa pol Asturianu. La primer sesión va celebrase’l sábadu 22 de febreru.

  • Cultura va festexar esti vienres el Día de la Llingua Materna con una programación especial per toa Asturies

    Cultura va festexar esti vienres el Día de la Llingua Materna con una programación especial per toa Asturies

    21 de febreru, con un programa d’actividaes ampliu que va desenvolvese per conceyos de tola xeografía asturiana, dende Ribeseya hasta Tapia.

    El departamentu qu’encabeza Vanessa Gutiérrez coordina esta iniciativa, que tamién incluye eventos impulsaos pola Rede de Normalización Llingüística y la Conseyería d’Educación, y que tien por oxetu promover l’usu y la conocencia del asturianu y del eonaviegu.

    L’axenda incluye espectáculos teatrales, talleres, documentales, esposiciones y cuntacuentos dirixíos a públicu de toles edaes. Amás, va reforzase la difusión de material didáctico na plataforma Educastur pa fomentar el deprendimientu y l’usu de les llingües propies d’Asturies nel ámbitu educativu.

    La programación incluye tamién una ufierta variada d’actividaes pal públicu infantil, como cuntacuentos en centros educativos de dellos llugares y talleres creativos, como ún de cianotipia nel conceyu de Cabranes.

    Dalgunes de les actividaes más destacaes son estes:

    • El 21 de febreru, a les 10:30 hores, el Teatru Toreno de Cangas del Narcea va acoyer la representación de Calcetos, un espectáculu con David Varela y Ana Morán. Amás, na Casa la Cultura va presentase la campaña Asina los chamamos eiquí, sobre los nomes autóctonos de la flora y fauna asturianes.
    • A les 12:00 hores, van publicase n’Educastur recursos dixitales diseñaos pa toles etapes educatives.
    • Pela tarde, a les 18:30 hores, l’Atenéu Obreru de Villaviciosa va ser l’escenariu de la entrega del VIII Premiu de Rellatos Curtios Xosé Caveda y Nava.
    • El 22 de febreru, nel Auditoriu Municipal de Tapia, va proyectase’l documental NÍA (Nosoutras Ideamos Arte): Muyeres, tradición y novas ruralidades, seguido d’un concerto del trío Toyemerendas, dambos n’eonaviegu.
    • Los díes 23 y 24 va ponese la función Formigues, en llingua asturiana, d’Elektra Fiktion, nel Teatru de la Llaboral de Xixón.

    Cultura y tradición na programación

    El Día de la Llingua Materna tamién va cuntar con iniciatives pa poner en valor el patrimoniu cultural y artísticu. Nel Centru d’Arte Tito Bustillo, en Ribeseya, va poder visitase hasta’l 30 de marzu la esposición La imaxe, lo tapecío, de Pablo Casanueva.

    Con esti programa, Cultura quier sorrayar el compromisu del Gobiernu d’Asturies cola protección y promoción de les llingües propies apostando pola so normalización nos ámbitos educativu, cultural y social.

  • Un accidente aparatosu causa dos feríos graves en Mieres

    Un accidente aparatosu causa dos feríos graves en Mieres

    Los conductores de dos turismos resultaron mancaos de considerancia tres chocar, por causes que se desconocen, na N-630, al altor del puntu kilométricu 43-44, en Baiña, Mieres.

    Según datos facilitaos pol Serviciu d’Atención Médica Urxente (SAMU), los dos varones, fueron treslladaos al Hospital Universitariu Central d’Asturies (HUCA) n’Uviéu. Por cuenta de más pruebes y hasta nueva valoración médica unu presenta pronósticu grave y otru reserváu. Fueron atendíos y sacupaos polos equipos médicos de les UVIS móviles de Mieres y de Llangréu.

    Dambos conductores tuvieron que ser escarcelaos por efectivos de Bomberos del Serviciu d’Emerxencies del Principáu d’Asturies (SEPA) con base nos parques de Mieres y Samartín del Rei Aurelio. La dotación movida dende’l parque mierense foi la primera en llegar al llugar y empecipiar la escarcelación del conductor que presentaba más gravedá y taba más atrapáu. Al tratase d’un turismu de trés puertes en primer llugar retiraron la del conductor y con un RAM (un pistón hidráulicu) abrieron espaciu ente’l tableru y el motor y sacaron al mancáu, inmovilizáu, cola tabla de rescate por aciu una maniobra de Rautek, una técnica de rescate que dexa mover rápido a una persona mancada a un llugar seguru.

    Los bomberos movíos dende’l parque de Samartín del Rei Aurelio encargáronse d’escarcelar al otru mancáu. Nesti casu estrayéronlu cola tabla de rescate, inmovilizáu con collarín, pela puerta trasera derecha del turismu, en diagonal, a 60 graos. El Centru de Coordinación d’Emerxencies del 112 Asturies recibió l’avisu a les 22.11 hora d’ayeri llunes. Na llamada indicaben que chocaren dos coches y los sos conductores taben atrapaos.

  • Lluz verde a los primeros parques de bateríes en Siero y Corvera

    Lluz verde a los primeros parques de bateríes en Siero y Corvera

    La Conseyería de Transición Ecolóxica, Industria y Comerciu concedió autorización alministrativa de construcción a les sociedaes Ready To Build Renewables S.L.O. y Axpo Storage YE1 S.L. pa la instalación de dos parques de bateríes en suelu industrial de los conceyos de Corvera y Siero.

    Dambes instalaciones, que la so autorización comunicar a los conceyos va unos díes, son les primeres que tán en disposición de ponese en marcha n’Asturies, siempres que llogren les preceptives llicencies municipales.

    El proyectu de Corvera, denomináu Bess Pixin, preve la creación en Tresona d’un parque de bateríes de 5 megavatios (MW) y una infraestructura d’evacuación por aciu una llínea de 736 metros dafechu soterraña.

    La instalación prevista en Granda (Siero), denominada Bess Axpo Storage YE1, va tener una potencia instalada de 10 MW y una capacidá d’almacenamientu de 47,6 megavatiu hora (MWh) por aciu tecnoloxía d’iones de litiu. Esti parque de bateríes va tar conectáu a la subestación de Meres por aciu una llinia soterraña de casi 1,36 kilómetros de llargor y va poder almacenar la enerxía equivalente al consumu de más de 5.000 cases mientres cuatro hores, en momentos de consumu mediu-altu.

    Dambos proyectos allíniense col espíritu del decretu que ta peracabando’l Gobiernu d’Asturies pal cambéu del Reglamentu d’Ordenación del Territoriu y Urbanismu del Principáu (ROTU), nel que se va reflexar la tipoloxía de suelos afayadizos y prioritarios pa la construcción d’esti tipu d’instalaciones.

  • Asturies promociónase como destín cicloturista na mayor feria especializada de Países Baxos

    Asturies promociónase como destín cicloturista na mayor feria especializada de Países Baxos

    Asturies participó esta fin de selmana en la feria Fiets Wandelbeurs, el principal eventu de los Países Baxos dedicáu al cicloturismu y el turismu de naturaleza. La presencia asturiana en Utrecht enmárcase dientro del plan d’allugamientu como destín internacional, especialmente nun mercáu como’l neerlandés, onde la bicicleta ye un elementu clave na movilidá y l’ociu.

    Asturies cuntó con un espaciu dientro del estand de Turespaña, que dexó potenciar la visibilidá de la so ufierta turística especializada. Mientres l’eventu, atendiéronse más de 500 consultes y distribuyéronse más de 1.200 publicaciones turístiques.

    Los Países Baxos son un mercáu estratéxicu p’Asturies, que caltién dos conexones aérees selmanales con Ámsterdam. En 2024, Asturies recibió más de 67.000 visitantes neerlandeses, un 4% más que l’añu anterior, según datos del Institutu Nacional d’Estadística.

    Asturies, Ciclismu por Naturaleza

    La participación na Fiets Wandelbeurs forma parte de la estratexa Asturies, Ciclismu por Naturaleza, qu’en 2025 va cuntar con una inversión de 860.000 euros pa consolidar la comunidá como un destín de referencia dientro d’esti segmentu.

    Ente les acciones previstes, destaquen la presencia en seis feries especializaes, como la Eurobike de Frankfurt en xunu, campañes de promoción en medios de comunicación y el sofitu a pruebes ciclistes de prestíu. Nesti sentíu, el territoriu asturianu va acoyer anguaño trés etapes de La Vuelta y va celebrar el centenariu de la Vuelta Ciclista a Asturies, eventos que refuercen la so proyección como destín cicloturista.

  • El gobiernu destaca’l potencial del turismu astronómicu nel mediu rural nes xornaes ‘AstronoMUJA’

    El gobiernu destaca’l potencial del turismu astronómicu nel mediu rural nes xornaes ‘AstronoMUJA’

    Asturies avanza nel so apueste pol turismu astronómicu cola celebración, esta fin de selmana, de les I Xornaes de Divulgación Científica AstronoMUJA, realizaes en collaboración con Allande Stars y financiaes pola Conseyería de Presidencia, Retu Demográficu, Igualdá y Turismu.

    L’eventu, qu’escosó les 150 places disponibles en poques hores, forma parte del programa entamáu pol Muséu Xurásicu d’Asturies (MUJA) pa conmemorar el Día Internacional de la Muyer y la Neña na Ciencia. Mientres dos díes, el públicu va poder esplorar la relación ente l’astronomía y la paleontoloxía al traviés de talleres, charres y observaciones del cielu nocherniegu.

    Les actividaes empezaron con una esperiencia única na que l’astrofísica y la hestoria de la Tierra darán la mano. Les persones asistentes pudieron afayar l’impactu de los meteoritos nel mundu de los dinosaurios de la mano d’espertes como Laura Piñuela, investigadora del MUJA, quien va esplicar les consecuencies del impactu de Yucatán nos ecosistemes de la dómina.

    Tamién participaron la doctora Laura Hermoso y el doctor Xuan González, qu’ufiertaron una visión sobre los cuerpos menores del sistema solar y les misiones espaciales enfocaes na defensa planetaria.

    A les 20:00 hores, nos esteriores del MUJA, l’equipu d’Allande Stars va guiar un percorríu per constelaciones, planetes y galaxes. Laura Hermoso y Lucía González, Muyer Rural d’Asturies 2024, compartieron les hestories sobre’l cielu escrites por distintes sociedaes antigües que llegaron a los nuesos díes.

    El turismu astronómicu ta en puxanza y Asturies, colos sos cielos escuros y escasa contaminación llumínica, asítiase como un enclave privilexáu pal so desenvolvimientu. Esta actividá non solo atrai a aficionaos a la observación del cosmos, sinón que supon una oportunidá pa impulsar la economía en zones rurales, fomentando un turismu sostenible y venceyáu a la ciencia.

  • El PSOE esixe con urxencia información énte’l posible boicó al circuitu de pádel qatarín pol que’l Conceyu pagó más de 1’6 millones

    El PSOE esixe con urxencia información énte’l posible boicó al circuitu de pádel qatarín pol que’l Conceyu pagó más de 1’6 millones

    El Grupu Municipal Socialista va pidir información urxente na Comisión de Deportes de mañana énte’l posible boicó de los xugadores de categoría masculina al Xixón Premier Pádel. Al traviés d’una entruga rexistrada esta mañana por cuenta de les últimes noticies reflexaes nos medios de comunicación, que recueyen que los 50 primeros xugadores del ranking decidieron nun inscribise nel tornéu xixonés, el PSOE esixe la máxima tresparencia pa conocer cuála ye la situación actual. “El conceyal de Deportes tien que dicinos con claridá qué ta pasando y si tien datos y noticies de la empresa qatarina qu’entama’l circuitu. Ta guardando silenciu magar d’haber pagu más de 1’6 millones d’euros pa traelo a Xixón. ¿Qué pasaría si nun vienen finalmente los top 50? ¿El gobiernu municipal va esixir a la empresa un amenorgamientu del costu qu’abona’l Conceyu?”, señala Jacobo López.

    El conceyal socialista pon sobre la mesa lo que’l PSOE lleva díes denunciando: el contratu de patrociniu nun dexa tener nengún control municipal sobre la organización del Xixón Premier Pádel. “Cola fórmula de coorganización, como la que fiximos el mandatu pasáu pa la ATP de tenis, el Conceyu participa de primera mano en tomar de decisiones, na supervisión del gastu, etc. D’esta forma, garantizaríamos que se cumplan los oxetivos establecíos y los beneficios económicos queden na ciudá. Agora lo que nos esmolez yá non solo ye la deriva d’esta situación, sinón la xestión y el destín de los recursos públicos invertíos”, esplica López de la que llamenta que’l gobiernu local namás punxera’l dineru y se despreocupe del restu; “a la fin, los sos planes tán empuestos al fracasu pol so abandonu sobre la xestión directa. Nin Capital Europea de la Cultura, cuestión nel qu’Uviéu ye estos díes noticia pol so sofitu a la candidatura y el so proyectu, nin Mundial 2030, por numberar dos de les más de venti arrenuncies qu’abandera esti gobiernu local”.

    A lo último, los socialistes sollerten del posible impactu negativu que’l boicó al Xixón Premier Pádel provoque na venta d’entraes y, por tanto, na torna económica na ciudá del dineru invertíu.