Xixón al día

Autor: xixonaldia

  • May avisa: la cuarta votación del Brexit va ser la última

    May avisa: la cuarta votación del Brexit va ser la última

    Nun va haber más oportunidaes. El Parllamentu británicu tornará a pronunciase na primer selmana de xunu sobre’l ‘brexit’. Va ser la cuarta ocasión na que l’alcuerdu algamáu ente’l Gobiernu de Theresa May y la Xunión Europea (XE) pa una salida negociada del Reinu Xuníu de la zona comunitaria llegue a la Cámara de los Comunes. «Ye imperativu que lo faigamos si’l país va abandonar la XE enantes del recesu parllamentariu de branu», esplicó la primer ministra en declaraciones recoyíes por Europa Press.

    La primer ministra del país nun ta dispuesta a siguir aldericando sobre esti alcuerdu que la XE nun ta dispuesta a modificar. La salida del Reinu Xuníu de la Xunión Europea foi aprobada polos ciudadanos británicos en referéndum en xunu de 2016. Fontes del Gobiernu británicu citaes pola BBC apunten a qu’un nuevu ‘non’ al alcuerdu podría suponer un divorciu de sopitu o la paralización del procesu.

    Los británicos tan llamaos a les urnes el prósimu xueves 23 de mayu. Los ciudadanos del país deberán escoyer a los sos representantes nes instituciones europees, anque’l Gobiernu de May confía en que los eurodiputaos británicos nun lleguen a tomar posesión de los sos escaños.

     

  • El Parlament refuga la designación de Iceta como senador

    El Parlament refuga la designación de Iceta como senador

    El Plenu del Parlamentu de Cataluña refugó este xueves la designación de Miquel Iceta como senador en representación de la Generalitat, en sustitución de José Montilla, qu’arrenunció al cargu la selmana pasada. La so candidatura namás cuntó con 25 votos a favor, los del PSC y los comunes. El PP y Cs astuviéronse, mientres que JxCat, ERC y la CUP votaron en contra. D’esta manera, el diputáu catalán nun podrá optar a la presidencia del Senáu, como quería’l presidente Pedro Sánchez.

    En declaraciones a los medios de comunicación, Iceta llamentó que se «torgue al Grupu Socialista la sustitución de quien representaba la Generalitat nel Senáu a propuesta nuesa». «Fráyase asina’l derechu a la participación política. Déxase ensin representación a más de 600.000 catalanes y catalanes que votaron PSC el 2017. El sectarismu impúnxose sobro la llegalidá y el sentíu común», remató.

  • Adrián Barbón comprométese a duplicar les places de 0 a 3

    Adrián Barbón comprométese a duplicar les places de 0 a 3

    Na visita a la escuela de 0 a 3 ‘El Carmín’, en La Pola Siero, Adrián Barbón recordó que “la rede d’escueles de 0 a 3 foi una creación del PSOE. Aprobóse nun Congresu socialista y una alministración socialista punxo en marcha dempués ta rede de centros educativos como esta escuela de Siero, que lleva 16 años funcionando”, destacó.

    Nesti sentíu, el candidatu a la presidencia del Principáu, amosó’l so compromisu en “sofitar la necesidá de doblar el númberu de places de 0 a 3 en Siero pola demanda qu’esiste y que ye entendible”. Anunció que “les nueses propuestes, que se recueyen nel nuesu programa a nivel xeneral, son doblar, a lo menos, el númberu de places de 0 a 3 n’Asturies y, en tolos conceyos onde haya demanda d’una escuela de 0 a 3, lleguemos a toos nesta llexislatura”. Nestos momentos hai 39 escueles “y tenemos qu’ampliar pa llegar a tolos conceyos onde haya demanda”

    Per otra parte, Adrián Barbón espresó públicamente, en declaraciones a los medios, el so “sofitu a la candidatura d’Ángel García, Cepi, la única que da estabilidá y futuru y tien esperiencia de gobiernu. L’alcalde de Siero y candidatu a la reeleción, Ángel García, informó que se va construyir una nueva escuela de 0 a 3 en Pola de Siero para doblar les plaza y que se van ampliar les places de la de Llugones “por que nenguna neña nin neñu de Siero quede ensin plaza”.

  • Carmen Moriyón: «Asturies ta en tiempu de descuentu»

    Carmen Moriyón: «Asturies ta en tiempu de descuentu»

    La candidata de Foru a la presidencia d’Asturies, Carmen Moriyón, presentó esti miércoles  les midíes del programa electoral del so partíu en materia fiscal, concebíes para “impulsar l’actividá económica, frenar la despoblación y acabar cola discriminación d’Asturies con d’otres Comunidaes”. “Estes midíes fiscales son les primeres que presentamos porque busquen llograr un impactu socioeconómicu relevante y son la canal pela que más rápido pueden fluyir los cambeos que precisa Asturies”, indicó Moriyón. “Asturies ta nel tiempu de descuentu; hemos de ser prácticos y centranos nes soluciones a los graves problemes d’emponen a esti territoriu a la desertización industrial y demográfico”, alvirtió.

    Ente les propuestes de Foru, Moriyón destacó l’amenorgamientu de la tarifa autonómica del IRPF en tolos sos tramos y de forma progresiva nun superando’l postreru d’ellos el tipu del 21%. Nel mediu rural, Foru propón midíes de discriminación diferenciada. “Nun pueden pagar lo mesmo quien carecen de servicios que sí disponen les ciudaes”. En materia d’IRPF plantégase una deducción de 30% de los gastos n’escueles infantiles, centros infantiles o personal contratáu pal cuidáu de fíos de 0 a 3 años pa contribuyentes qu’afiten la so residencia habitual y caltener la fecha de devengu del impuestu.

    Foru tamién propón ameyorar la deducción por arriendu de vivienda habitual, con oxetu d’atender les necesidaes de colectivos que nun pueden aportar a la compra d’una vivienda (menores de 35 años ente otros), frenar la perda de población nel mundu rural y promover la reactivación d’esti sector.

    Moriyón recordó tamién que Foro vien reclamando un nuevu sistema de financiamientu autonómicu. Con esi oxetivu va promover la reforma del modelu actual que garantice la suficiencia y l’igualdá nos servicios públicos fundamentales, redefiniendo les necesidaes de gastu y teniendo bien en cuenta, les singularidaes que presenta Asturies, como la dispersión y l’avieyamientu de la nuesa población.

  • Trabe inaugura n’Uviéu una llibrería especializada en lliteratura asturiana

    Trabe inaugura n’Uviéu una llibrería especializada en lliteratura asturiana

    Ediciones Trabe pon llibrería otra vuelta. «Préstanos enforma davos esta noticia y dar al mundu del llibru asturianu y a la sociedá asturiana en xeneral una allegría y una nota d’optimismu: ye posible vivir y trabayar n’Asturies y n’asturianu, ensin aspavientos, pasín a pasu, col llabor diariu y con esperanza, con enfotu», afirma la editorial nuna nota na so páxina web.

    El nuevu espaciu inaugúrase güei de magar les 20 hores na cai Fernando Alonso, 17 – Baxu d’Uviéu. «Depués d’años de crisis y resistencia, Ediciones Trabe reabre la so llibrería, especializada en lliteratura asturiana, d’Asturies y sobre Asturies».

    Depués del pieslle de les hestóriques Alborá Llibros en Xixón, Paraxuga n’Uviéu, y otres esperiencies con menos percorríu pero tamién destacables como la Llibrería Seronda n’Avilés, Llibrería Ítaca en Xixón, o la propia d’Ediciones Trabe nel barriu de Pumarín, n’Uviéu, Asturies torna a cuntar con una llibrería especializada en llibru n’asturianu.

  • TPA va emitir el llunes l’únicu debate ente candidatos autonómicos

    TPA va emitir el llunes l’únicu debate ente candidatos autonómicos

    La Televisión del Principáu d’Asturies (TPA) va emitir el prósimu llunes 20 de mayu a les 22 hores l’únicu debate de candidatos a la presidencia del Gobiernu d’Asturies. N’él participarán los llíderes de los principales partíos: Adrián Barbón, del PSOE; Teresa Mallada, del PP; Lorena Gil, de Podemos; Ángela Vallina, de IX; Carmen Moriyón, de Foru; Juan Vázquez, de Ciudadanos; ya Ignacio Blanco, de Vox.

    L’espaciu va tar presentáu y moderáu pol editor d’informativos Nacho Monserrat. Los siete candidatos a la Presidencia confrontarán idees y programes pa que los ciudadanos puedan conocer los detalles de los mesmos. El debate va plantegase en bloques temáticos sobre política industrial, movilidá, infraestructures y Area Metropolitana, mundu rural y crisis demográfica, cultura, cooficialidá, reforma estatutaria y servicios públicos. Ye l’únicu alderique de candidatos a presidente que se celebra n’Asturies.

    El gran esplegue final va ser el domingu 26, la xornada electoral. TPA va informar durante tol día del desenvolvimientu de les elecciones con conexones en directu con colexos electorales y el centru de datos. Amás de la cita habitual de ‘TPA Noticies’ a les 14 y les 20.30 hores va haber avances informativos a les 13, les 18 y les 19 hores. A les 20 hores va entamar l’especial ‘Elecciones 26-M‘. Presentáu poles periodistes María Herrero, Beatriz Fernández y Diana Sánchez, l’espaciu va cuntar con mesa d’analistes políticos, periodistes y alcaldes hestóricos y un esplegue de quince puntos de directu nes sedes de los partíos y de los principales conceyos. Un ampliu equipu técnicu y humanu que va trabayar hasta que se conoza’l desenllaz final de les trés cites electorales: municipales, autonómiques y europees.

  • Liberbank y Unicaja ruempen les negociaciones pa la fusión

    Liberbank y Unicaja ruempen les negociaciones pa la fusión

    Liberbank y Unicaja renuncien a fusionase. Los conseyos d’alministración de dambes entidaes alcordaron esti martes nun siguir col procesu d’integración al nun algamar un alcuerdu sobre la ecuación de canxe, informa Europa Press. La noticia foi recibida de manera desigual nos mercaos. Les acciones de la entidá asturiana rexistraron una xubida del 4,33% mientres que les de l’andaluza cayeron un 0,51%.

  • Lindsey Vonn, Premiu Princesa d’Asturies de los Deportes

    Lindsey Vonn, Premiu Princesa d’Asturies de los Deportes

    La esquiadora estadounidense Lindsey Vonn foi galardonada col Premiu Princesa d’Asturies de los Deportes 2019, según fixo públicu güei n’Uviéu‘l xuráu encargáu de la so concesión. Ye la muyer con más victories na hestoria de la Copa del Mundu d’esquí alpín. En 2016, al consiguir el so trunfu númberu 63, superó’l récord qu’ostentaba Annemarie Moser-Pröll dende los años setenta. La so candidatura foi presentada por Theresa Zabell, presidenta de la Fundación Ecomar.

    Lindsey Vonn nació’l 18 d’ochobre de 1984 en Saint Paul (Minnesota, Estaos Xuníos) n’una familia d’esquiadores. Debutó nesti deporte con 7 años y con 9 disputó les sos primeres pruebes internacionales. Con 14 años foi la primer estadounidense en ganar el Troféu Topolino (Italia) y en 2001 consiguió la so primer victoria n’una competición oficial de la Federación Internacional d’Esquí. Na temporada 2004-05 remató en primer posición seis pruebes de la Copa del Mundu y debutó nel Campeonatu del Mundu, pero foi la so incorporación al Proyectu Especial d’Atletes de Red Bull, dirixíu por Robert Trenkwalder, entrenador que cooperaba col equipu estadounidense d’esquí, lo que supunxo una gran progresión na so carrera. L’añu 2009 marcó l’ascensu d’esta al proclamase doble campeona del mundu en descensu y supergigante y revalidar el de campeona na xeneral de la Copa del Mundu.

    El xuráu d’esti Premiu convocáu pola Fundación Princesa d’Asturies tuvo presidíu por Abel Antón Rodrigo ya integráu por Alejandro Blanco Bravo, Vicente del Monte González, marqués de Del Bosque, Miguel Carballeda Piñeiro, María Paz Corominas i Guerin, Alex Corretja Verdegay, Joaquín Folch-Rusiñol Corachán, Ernest Folch i Folch, Juan Ignacio Gallardo Tomé, Joan Llaneras Roselló, Sylvana Mestre Alexandre, Luis Nieto Tortuero, Santiago Nolla Zayas, Edurne Pasabán Lizarribar, Paloma del Río Cañadas, Sitapha Savané Sagna, Alberto Suárez Laso y Patricia García Rodríguez (secretaria).

  • Peybernes: «Faltónos matar los partíos»

    Peybernes: «Faltónos matar los partíos»

    Peybernes asume la cita d’esti vienres en La Romareda como “un partíu complicáu énte un equipu que se xuega la vida nel so campu y que va querer ganar, como nós: los dos precisamos la victoria”. “Nada ye imposible, pero sí ye cierto que la situación ta complicada”, respondió’l central francés del Sporting a entrugues de los periodistes. Considera que les resultancies nun pudieron ser meyores nel últimu mes «por pequeños detalles”. Piensa que «faltónos matar los partíos, porque tuvimos ocasiones pa ello; faltónos contundencia defensiva y ofensiva nuna categoría na que cuesta enforma marcar”.

    No personal ta satisfechu, porque “toi xugando”, anque “dolíu porque tamos llueñe l’oxetivu”. Ta seguro de que si non se llogra esta temporada consiguir la próxima” y quier vivilo, por eso amuésase deseosu de siguir nel Sporting: “Tanto la mio familia como yo tamos bien contentos equí, anque nun depende namá de nós; el mio representante saber”.

  • Pedro Díaz, Cordero y Christian Joel, col primer equipu

    Pedro Díaz, Cordero y Christian Joel, col primer equipu

    Con Álvaro Jiménez, nel ximnasiu por cuenta d’una afección vírica, y Traver, por prevención, pa evitar una sobrecarga muscular, amás de les yá conocíes baxes por problemes físicos d’Aitor, Ivi, Isma Cerro y Diego Mariño, lo mesmo que de Nacho Méndez por tarxetes, José Alberto caltuvo entrenándose güei col primer equipu a los xugadores del filial Pedro Díaz, Carlos Cordero y el porteru Christian Joel, que yá se sentó nel banquín d’El Molinón la pasada xornada.

    L’Sporting emplegó esta mañana en Mareo nuna sesión de puertes abiertes, que tuvo’l so arranque nel ximnasiu. La de mañana va adelantrar a los nueve de la mañana, va ser n’El Molinón. va desenvolver a puerta zarrada. Tres l’entrenamientu conocerá la llista de convocaos, va comparecer José Alberto énte los medios de comunicación y l’equipu va entamar viaxe escontra Zaragoza per carretera, con parada pa comer en Hoznayo.

    Víctor, con toos disponibles

    Víctor Fernández tien a la totalidá de la plantiya a la so disposición, ensin mancaos nin sancionaos, ente ellos, el exsportinguista Guitián, sancionáu contra l’Estremadura, nuna selmana na qu’amás abasnó molesties físiques. D’otru llau, Saúl Ais Reig, del Comité Valencianu, va ser l’encargáu de dirixir l’alcuentru del vienres (21 hores) en La Romareda.