El ministeriu de Cultura anunció ayeri la candidatura de les nueve ciudaes españoles qu’opten a convertise en Capital Europea de la Cultura en 2031, añu nel que correspuende a España y a Malta acoyer les Capitales Europees de la Cultura.
Les ciudaes candidates son Burgos, Cáceres, Granada, Xerez de la Frontera, Les Palmes de Gran Canaria, Uviéu, Palma, Potries y Toledo. Pa ser Capital Cultural, les ciudaes tendrán de pasar una primer fase de selección. En marzu van anunciar les ciudaes finalistes y n’avientu va conocese la ciudá escoyida.
Esta selección va ser realizada en toles sos fases por un comité formáu por diez persones espertes internacionales, designaes poles instituciones europees arreyaes na Capitalidá Europea de la Cultura, mesmo que dos espertos españoles designaos pol Ministeriu de Cultura. La composición d’esti Comité va ser anunciada.
La Ciudá Capital Europea de la Cultura 2031 va acoyer un programa cultural a lo llargo de tol añu que dura la so capitalidá, y que va incluyir actividaes con artistes locales y europeos y programes de cooperación internacional.
El Serviciu de Salú del Principáu (Sespa) y el Sindicatu Médicu Profesional d’Asturies (SIMPA) suscribieron na tarde d’ayeri un alcuerdu que pon fin a la fuelga empecipiada’l pasáu 14 de xineru y sienta les bases pa reforzar el sistema sanitariu públicu dende’l diálogu y la corresponsabilidá.
Tolos puntos incluyíos nel alcuerdu busquen caltener y ameyorar la calidá de l’asistencia emprestada a los usuarios de la sanidá pública per aciu l’amenorgamientu de les llistes d’espera, la optimización de l’accesibilidá al sistema sanitariu y el fomentu de la captación y fidelización del talentu médicu, como condición necesaria pa la sostenibilidá y la continuidá asistencial. Too ello incide directamente nuna meyor respuesta del sistema públicu de salú.
El documentu afronta de manera integral cuestiones como la organización de la xornada, la conciliación y la salú llaboral, la meyora de les condiciones retributives y la reconocencia profesional. Igualmente, incorpora midíes específiques pa médicos residentes y pa les especialidaes d’atención primaria, urxencies y emerxencies.
Por casu, facilítase la reorganización del trabayu na rede de primaria, mientres que nos servicios hospitalarios nos que seya posible van entamase guardies de doce hores. Tamién se van impulsar iniciatives p’ameyorar la captación y fidelización de profesionales.
L’alcuerdu va ayudar a dotar al sistema sanitariu de mayor estabilidá, al definir criterios más claros pa planiar plantiyes, cubrir incidencies y xestionar la movilidá por razón de serviciu, garantizando la continuidá asistencial.
Una mesa de siguimientu va ser la encargada de velar pol cumplimientu efectivu de los compromisos adquiríos ente dambes partes.
El Gobiernu d’Asturies abrió güei la escuelina Los Nuberinos, asitiada nel Colexu Asturias del distritu Xixón-Sur, que se convierte na cuadraxésimu quinta de la nueva rede pública, autonómica y gratuita y la primera que’l gobiernu asturianu constrúi nesti conceyu.
La escuelina -que consta de trés unidaes- empieza la so andadura con 31 neños y neñes, que se van dir incorporando progresivamente, a partir de les nueve de la mañana, dientro del periodu d’adaptación. El personal ta compuestu por una directora y seis técniques d’educación infantil (TEI), dos per cada unidá.
Los Nuberinos pertenez a la fase I de la rede autonómica de Les Escuelines/As Escolías. La obra encargóla’l gobiernu d’Asturies a la empresa Citanias y tuvo un costu de 372.529 euros, con financiamientu de los fondos europeos del Mecanismu de Recuperación y Resiliencia (MRR).
La escuela ocupa la planta baxa del colexu y tien un accesu independiente. Amás de les trés aules dotaes con un aséu caúna, el centru dispón d’un cuartu bañu afechu y trés sales pa xuntes, la dirección y una polivalente. Nesta postrera va emprestase’l serviciu de comedor. Tamién cunta con un patiu de xuegos y una zona esterior urbanizada. En total, suma casi 400 metros cuadraos de superficie construyida.
Per otru llau, el Gobiernu d’Asturies tien programaes otres trés escuelines en Xixón dientro de la fase II de la rede. La de Montevil, de cuatro unidaes, ta en fase d’execución. Y tán a puntu de recibir los proyectos de les previstes nos colexos Rei Pelayo y Santa Olaya, de dos unidaes caúna. Amás, el Conceyu de Xixón ta construyendo otru centru nel barriu d’El Llanu, que va asumir el gobiernu en cuanto tea concluyíu.
Con esta nueva apertura, la rede autonómica de 0 a 3 años ta formada por 45 escuelines/escolías, 23 de la fase I y 22 municipales yá integraes. Esti mes ta prevista la inauguración de Los Ablaninos, n’Ayande.
En febreru, van empezar la so andadura la escolía El Cabás, de Tapia, y les escuelines Les Xanines, de Caravia, y El Reblincu, de Quirós. Toes elles formen parte de la fase I de la rede, sacante la d’Ayande, incluyida yá na segunda.
Nes cais de la ciudá sentíense los comentarios d’indignación xeneralizada cola acaldesa forista Carmen Moriyón pola mala xestión de la cabalgata, que nun s’adelantó y acabó en moyadura memorable nel día de Reis de más fríu en décades pa les miles de families que taben esperando’l pasu de los Reis Magos.
Les redes sociales recoyíen tamién comentarios de padres y madres que nun entendieron la decisión: «Nun puedo entender porque cola previsión del tiempu que se tenía, nun se pudo adelantar una hora como en munchos sitios. ¿Había tanta necesidá de moyase y desllucilo?», reivindicaba en Facebook una madre. Otru comentariu en X dicía: «Oyi @CarmenMoriyon y @gijon La cabalgata de güei foi absolutamente LLAMENTABLE. Tengo al críu que nun pilló hipotermia de petaca, tolos críos igual. Les bandes de música marchando corriendo. Llevaben avisando una selmana ¿El trásfuga que taba nel Ventorro?».
La banda de música tuvo qu’abandonar la cabalgata en llegando a l’altor de Los Campos, cuando la lluvia entamó a volvese bastiazu, poco dempués la Banda de Gaites y les bandes de les cofradíes. Una cabalgata en silenciu y embaxo la lluvia y el fríu xelador.
Pese a les numberoses señales de bastiazu que dieron los servicios metereolóxicos, que fixeron a otros conceyos asturianos, como Uviéu o Llangréu, adelantar la hora de la cabalgata, en Xixón l’alcaldesa y el so equipu nun tomó nenguna midida, nun momentu de saturación de los hospitales nos qu’en nada va ayudar el fríu y la pingadura vivíos por neños y neñes, padres y madres y güelos y güeles.
El PSOE de Xixón declaró «En Xixón naide al frente», denunciando que «Mientres el restu de ciudaes d’Asturies y España adelantaben les cabalgates de Reis Magos polos avisos meteorolóxicos emitíos poles autoridaes dende va delles hores, Xixón fixo casu omisu d’estes y nun emitió nengún avisu o cambéu dalgunu», lo que pa los socialistes demuestra como «Una vegada más la inacción de Moriyón y del conceyal tránsfuga repercute nos vecinos y vecines, nesti casu especialmente ente les y los más pequeños».
Una cabalgata que terminó de manera innecesaria en fríu y moyadura, pudiendo evitase con un cambiu d’horariu que tendría reducío abondo les consencuencies.
Xixón prepárase pa vivir unu de los díes más máxicos del añu cola llegada de los Reis Magos d’Oriente. Melchor, Gaspar y Baltasar, acompañaos de S.A.R. el Príncipe Aliatar, van facer vibrar la ciudá dende primera hora de la mañana con un programa cargáu d’emoción, fantasía y tradición.
La llegada de Sus Maxestaes ta prevista pa les 10:15 hores nel Puertu Deportivu, onde van desembarcar nel pantalán más cercanu a l’Antigua Rula. Dempués d’atender a los medios de comunicación, van desfilar en vehículu y a pie pola cai Claudio Alvargonzález hasta la Plaza del Marqués. Ellí van saludar a les neñes y neños aconceyaos delantre del Palaciu Revillagigedo y van ser recibíos poles autoridaes municipales. La comitiva real va permanecer na Plaza del Marqués hasta les 11:30 hores. Durante’l desembarcu y la llegada va haber un puntu reserváu pa persones con discapacidá xunto al árbol de la sidra.
Al mediudía, ente les 13:00 y les 15:00 hores, los Reis Magos van recibir a les neñes y neños nel Salón de Recepciones del Conceyu de Xixón, onde van poder entregar les sos cartes. L’accesu a la cola va interrumpise a les 11:30 hores y va habilitase un accesu rápidu pa persones con discapacidá nel llateral del edificiu municipal.
La tarde va tar protagonizada pola tradicional Cabalgata de Reis, que va dar entamu a les 18:30 hores dende’l Colexu Públicu Begoña. El desfile va tar formáu por 11 carroces, 8 vehículos d’apoyu y alredor de 800 persones a pie, llevando la maxa a cada rincón de la ciudá. El percorríu va pasar poles cais Poeta Ángel González, Anselmo Solar, Ramón y Cajal, Uría, Jovellanos o Los Moros, hasta llegar a los Xardinos de la Reina. Va habilitase un espaciu reserváu pa persones con discapacidá enfrente del Hospital del Carmen, na cai Ramón y Cajal.
Tres la cabalgata, alredor de les 21:30 hores, Sus Majestaes van dirixise a la ciudadanía col so tradicional discursu dende’l balcón del Conceyu, poniendo’l broche final a una xornada inescaecible.
Dende l’Ayuntamientu recomiéndase l’usu del tresporte públicu, yá que se van producir restricciones de tráficu y modificaciones nes llinies d’EMTUSA. Tamién se pide a toles persones asistentes que sigan en tou momentu les indicaciones de los cuerpos de seguridá y de la organización, que caltengan la distancia de seguridá coles carroces y que recuerden que les neñes y neños son los verdaderos protagonistes d’esta fiesta.
Cola llegada de los Reis Magos, Xixón vuelve enllenase de suaños, ilusión y maxa na nueche más especial del añu.
Cerca d’un centenar de persones concentráronse esti llunes pela tarde nel barriu d’El Llano de Xixón nuna orixinal y reivindicativa acción con bengalas pa esixir la llibertá de Les 6 de La Suiza y denunciar lo que consideren una criminalización del sindicalismu.
La protesta, entamada pol colectivu Sofitu a les 6 de La Suiza, consistió nuna cadena humana qu’enllenó de color el cielu nocherniegu con bengales de lluz naranxa, simbolizando tanto la indignación como la esperanza énte la situación d’estes seis sindicalistes condergaes a trés años y mediu de prisión.
Los participantes axuntáronse na avenida del Llano y, pasaes les 19:00 hores, activaron al unísonu les sos bengales, nun actu ensin incidentes so la mirada de la Policía Local, que supervisó la concentración respetando los permisos de xunta.
Les voceres esplicaron que la iniciativa buscaba “visibilizar la demanda de llibertá” de los seis persones condergaes y tamién denunciar lo que consideren un “grave ataque a los derechos sindicales”. Reivindicaron qu’esta acción ye clave p’amosar que les sindicalistes “nun van tar soles” y pa evidenciar que’l so procesamientu xudicial nun constitúi otra cosa sinón un intentu de criminalizar l’acción sindical lexítima”.
El IV Semando Fest va celebrase’l sábadu 7 de febreru de 2026 na Sala Lata de Zinc d’Uviéu. El festival, centráu na música moza n’asturianu, va empezar a les 20:00 hores y va cuntar con delles actuaciones en directu a lo llargo de la nueche. Nesta cuarta edición, el cartelu del festival ta integráu polos proyectu Rellume, Entós, Fruela 757 & Lucía Rojo y PVXARRA. Caúna d’estes propuestes desenvuelve la so actividá dientro de la escena musical asturiana contemporanea, con formatos y planteamientos diversos, que van dende trabayos venceyaos a la tradición oral y musical hasta proyectos de creación actual.
El Semando Fest nació coles mires de sirvir como espaciu de visibilización y alcuentru pa grupos qu’utilicen l’asturianu como llingua de creación artística. Dende la so primer edición, el festival apostó por axuntar nun mesmu escenariu distintes propuestes musicales, favoreciendo l’espardimientu de nuevos proyectos y la continuidá d’iniciatives yá consolidaes dientro del panorama musical del país.
Les entraes pal IV Semando Fest tan a la venta al traviés de la plataforma Entradium, onde’l públicu puede consultar los precios, les modalidaes disponibles y la información actualizada sobre l’aforu. La organización encamienta la compra antemanada, dáu’l calter
llimitáu del espaciu.
L’eventu va tener llugar na Sala Lata de Zinc, un recintu habitual de conciertos y actividaes culturales n’Uviéu, que va acoyer nuevamente’l festival tres ediciones anteriores. La programación va desenvolvese íntegramente n’horariu de tarde-nueche. Con esta nueva edición, el Semando Fest sigue la so trayectoria dientro del calendariu cultural asturianu, calteniendo’l so formatu de festival de sala y el so enfoque na música en asturianu, con especial atención a les nueves xeneraciones d’intérpretes y creadores.
L‘Unión Club Ceares (UCC) abre esti Nadal una Pop Up Store col fin de reforzar el vínculu col so entornu social, facilitar l’accesu a productos oficiales del club y promover una campaña de sofitu al so proyectu deportivu y comunitariu.
La tienda efímera abre les sos puertes los díes 22, 23, 24, 29, 30 y 31 d’avientu, amás del 5 de xineru, en horariu de 17:00 a 20:00 hores, y ta allugada na Avenida Hermanos Felgueroso, númberu 42, baxu, nel propiu barriu de Ciares.
Baxo’l lema “Esti Nadal… Regala Ciarismu”, la iniciativa quier poner en valor los principios que definen al UCC: fútbol popular, compromisu social, participación ciudadana y arraigu col territoriu. La Pop Up Store conviértese nun espaciu d‘alcuentru ente club y afición, nel que se van poder mercar camisetes, merchandising oficial y otros artículos venceyaos a la identidá del UC Ceares.
Esta acción navidiega busca tamién ufiertar una alternativa de regalu consciente, apostando pol consumu llocal y pol sofitu a un proyectu deportivu que va más allá de la competición. L‘UCC ye reconocíu pol so papel activu na vida social del barriu, pola promoción de valores como la igualdá, la inclusión y la solidaridá, y pola so defensa d’un modelu de fútbol participativu y accesible.
La apertura de la Pop Up Store forma parte de les estratexes del club pa diversificar los sos ingresos y garantizar la sostenibilidá del proyectu, ensin renunciar a los sos principios fundacionales. Al empar, supón una oportunidá pa que siguidores y vecindá conozan más de cerca’l trabayu que se desenvuelve dende la entidá a lo llargo de tol añu.
Dende l‘Unión Club Ceares anímase a la ciudadanía a visitar la Pop Up Store, participar na campaña y compartir un Nadal venceyáu a los valores del deporte popular y del compromisu col entornu.
Tigre y Diamante estrenó’l vienres 19 d’avientu «Estafa Piramidal» un discu qu’entemez tensión con fraxilidá, llevando’l grupu a una nueva madurez creativa. Nos testos, caltiense’l so llinguaxe crudu habitual, pero afilen la so vena punk a base de poesía puerco, humor negro y un realismu descarnáu que nun se detien énte les intimidaes más inconfesables… Mentanto, nes músiques siguen presentes les guitarres seques, pero apaecen munches más capes que constrúin un muriu sónicu, onde apruz xuna nueva fraxilidá pop ausente n’entregues anteriores. El grupu llega a Xixón mientres dos díes, 26 y 27 d’avientu, na Sala Código 23.
Estafa Piramidal llega como un discu que golpea pero tamién dexa ver fraxilidá. ¿Dende qué estáu emocional naz esti álbum?
Xúntense dellos estaos emocionales nesti discu… dende la resaca d’Actitud Ganadora, hasta’l cansanciu de la xira, empezar una nueva vida solo…. nun sé, puede que naza del desasosiegu y de l’aburrición, y munches nueches en vela. Entá asina quedó un bon discu.
Nesti trabayu paez qu’aceptáis más la vulnerabilidá ensin perder aspereza. ¿Foi una decisión consciente o daqué qu’apaeció de forma natural?
Ye natural dafechu. Gústame pensar que los cantares tienen, en cierta manera, vida propia… que de dalguna manera rebélense contra l’autor, y son elles les que te guíen.
Siempres esistió esa vulnerabilidá en Tigre y Diamante, solo qu’igual taba más soterrada o amarutada.
El vuesu llinguaxe sigue siendo mui crudu, pero equí suena más poéticu y afiláu. ¿Qué vos interesa provocar güei en quien escucha Tigre y Diamante?
Tamién hai poesía na crudeza. Pero si ye cierto que nesti discu dexemos un pocu al llau esa vena más “macarra”, o non, igual dímos-y un xiru al conceptu… Lo que si ta claro ye qu’en Tigre y Diamante dámos-y muncha importancia a les lletres, de xuru a lo que más.
El discu tresmite una sensación constante de incomodidá emocional. ¿Creyéis que la música ha confrontar más que consolar?
La música tien de provocar, faer que’l que la escuche sienta, se rebele contra si mesmu y se confronte. Les lletres xueguen un papel crucial nesto, han d’entendese y facer que se te revuelvan un pocu les tripes.
Hai una crítica clara a ciertes dinámiques sociales y culturales, pero ensin discursos esplícitos. ¿Cómo entendéis el papel políticu de los vuesos cantares?
Esiste un compromisu social mui grande nel grupu, y tamién cultural. Los Asesinos de tus hijos ye un claru exemplu del nuesu posicionamientu… Somos abiertamente antisionistes, antifascistes y anti tolo que vaya en contra de los derechos individuales de cada persona.
Musicalmente’l soníu ye más densu y trabayáu, con más capes y contrastes. ¿Qué vos pidía esti discu a nivel sonoru que nun vos pidieron los anteriores?
Pablo Martinez xugó un papel crucial nesto. Como productor trabaya los cantares dende enantes de llegar al estudiu, polo que yá fixo un trabayu d’interpretación musical previu. Muncha d’esa densidá foi suxerida por él y aceptada dafechu por nós. Tien una visón del resultáu del cantar que mui poca xente tien, sabe onde quier llegar colos medios que tien.
N’Estafa Piramidal conviven el ruiu, el pop y el silenciu emocional. ¿Sentísvos más llibres agora pa entemecer llinguaxes ensin pensar n’etiquetes?
Siempres nos sentimos mui llibres a la de facer música. Sí ye cierto qu’esti discu tien un mayor posu emocional y a la de escuchalo unu acoráxase o arrebola un pocu. Nunca me gustaron los discos nos qu’hai un únicu llinguaxe, nos que toes los cantares suenen igual o falen de lo mesmo.
Les collaboraciones paecen integraes de forma mui orgánica. ¿Qué buscáis cuando convidáis a otres voces a entrar nel vuesu universu?
Sobre manera que nos dean una nueva visión del cantar. Camuda dafechu la perspectiva del cantar. El mayor exemplu ye Soy Adicto, na que la voz d’Igor Pascual da-y un aire más histriónicu , Nacho más escura y la mía más obsesiva, ¿non? Ye guapo ver como cada autor la fai suya y la lleva al so tarrén.
Dempués d’esti trabayu, ¿sentís que Tigre y Diamante atopó una voz más definida o, al contrariu, más abierta que nunca?
Esperemos que-y quede llarga vida a Tigre y Diamante y toi seguru que’l futuru va sosprendenos a nós mesmos… porque somos un grupu abiertu a cualquier paleta o gama de colores y testures.
La Conseyería d’Educación aumentó un 34,2% la matriculación n’asturianu y eonaviego nesti cursu escolar, con un total de 30.782 estudiantes. Esi crecimientu, que se rexistra per cuartu añu consecutivu, vien motiváu fundamentalmente pola introducción de la llingua autóctona nel segundu ciclu d’Infantil como elección voluntaria.
Esi novedosu acercamientu a la llingua asturiana, al traviés de dalgunos de los conteníos incluyíos na área de aprendizaje Comunicación y representación de la realidá, enllantóse de forma simultánea nos trés niveles del segundu ciclu d’Infantil. Esti primer añu matriculáronse 7.652 neños y neñes: 6.220 en centros públicos y 1.432, n’alcordaos. La cifra supera’l 48% del total del alumnáu d’esta etapa educativa, un datu mui satisfactoriu pa esti cursu inaugural.
Si se descontara l’alumnáu d’Infantil, el balance resulta tamién positivu. Los estudiantes de Llingua Asturiana y Lliteratura en Primaria, Secundaria y Bachilleratu esperimenten una llixera medría del 0,83% respectu al cursu anterior.
La principal crecedera de matrícula n’asturianu y eonaviego producióse ente l’alumnáu de Secundaria de la rede alcordada, con un 36,5% más que’l cursu 2024-2025, siguíu de Bachilleratu en centros públicos (8,7%) y Primaria na enseñanza alcordada (4,2%). Sicasí, en Primaria y Secundaria de la rede pública producióse un llixeru descensu del 1% y el 0,2%, respectivamente.
Otra iniciativa pionera n’Asturies foi l’entamu esti cursu de la ufierta d’asturianu nes Escueles Oficiales d’Idiomes. El primer pasu diose n’Uviéu, onde se contabilicen 43 persones matriculaes nos trés niveles disponibles: 33 nel A1, estremaos en dos grupos; 3 nel B1 y 7 nel C1. La matrícula caltiense abierta.
