Xixón al día

Autor: xixonaldia

  • Samartín del Rei Aurelio va acoyer en 2025 la Feria pa la Repoblación de la España Rural

    Asturias va acoyer en 2025 la IX Feria pa la Repoblación de la España Rural (Presura). L’alcuentru va celebrase en Samartín del Rei Aurelio, nuna fecha por determinar, y ta previsto qu’axunte a miles de participantes de tol estáu.

    El director xeneral de Retu Demográficu, Marcos Niño, recoyó’l testigu d’esti gran escaparate de la España Rural mientres la clausura de la octava edición de la feria, celebrada en Madrid, a la que tamién asistió la directora xeneral d’Empléu y Asuntos Llaborales, Judit Flórez.  D’esti mou, el Gobiernu d’Asturies y la Fundación Caxa Rural impulsarán la iniciativa, qu’organiza la empresa social El Hueco.

    Presura ye un espaciu d’alcuentru ente la España rural y la España urbana, que se plantea como un gran escaparate de soluciones creatives destináu a revitalizar les árees menos poblaes. Na feria se presentan recursos de tou tipu a persones que tán pensando n’aniciar un proyectu de vida fuera de los grandes núcleos urbanos, cola fin de captar esi talentu emprendedor y fixar población.

  • La villa romana de La Estaca, declarada bien d’interés cultural

    La villa romana de La Estaca, declarada bien d’interés cultural

    El Conseyu de Gobiernu aprobó la declaración de bien d’interés cultural (BIC), con categoría de zona arqueolóxica, de la villa romana de Andayón/La Estaca, nel conceyu de Les Regueres.

    Les investigaciones realizaes nesti enclave dexaron definir un ampliu asentamientu, constituyíu por un gran edificiu residencial y delles edificaciones auxiliares dispuestes na so contorna. La construcción principal tien una planta de cerca de 700 metros cuadraos y cuenta con una organización nuclear en redol a dos patios alredor de los cualos asítiense les estancies, dalgunes d’elles decoraes con pavimentu de mosaicu y pintures murales.

    La Conseyería de Cultura empezó a tramitar esti espediente en payares de 2022 y a lo llargo del procesu percanció informes positivos de la Universidá d’Uviéu, el Real Institutu d’Estudios Asturianos (Ridea) y la Real Academia de la Hestoria, lo mesmo que de la Comisión d’Urbanismu y Ordenación del Territoriu (CUOTA). Nel so informe, la Universidá d’Uviéu constata l’interés del xacimientu como testimoniu del pasáu, según el so valor artísticu y científicu.

    Na bibliografía tradicional, les referencies venceyen esta villa romana de Les Regueres cola localidá de Andayón. Sicasí, nos últimos años, tantu nel ámbitu científicu como a nivel social, sumáronse a la identificación del yacimientu les referencies a La Estaca, polo que tamién s’incluyó esti términu nel espediente de la declaración, que recueye la doble denominación.

  • El Muséu Etnográficu del Oriente d’Asturies va celebrar con un itinerariu de memoria, cultura y naturaleza les Xornaes Europees de Patrimoniu

    El Muséu Etnográficu del Oriente d’Asturies va celebrar con un itinerariu de memoria, cultura y naturaleza les Xornaes Europees de Patrimoniu

    Esti sábadu, 19 d’ochobre, a les 10:30 hores, va dar empiezu nel Muséu Etnográficu del Oriente d’Asturies el programa «Conexones nel Oriente d’Asturies. Itinerarios de cultura, memoria y naturaleza», dientro de les Xornaes Europees de Patrimoniu (JEP), cola ruta empuesta «Nos dejamos llevar por el Ríu Vallina», onde la naturaleza y el patrimoniu etnolóxicu del agua adquieren protagonismu.

    Esta ruta va tar guiada por José Luis Villaverde Amieva, Presidente de la Fundación del Muséu Etnográficu del Oriente d’Asturies. L’actividá ye gratuita, ufierta una dificultá baxa y tien una duración de trés hores, dende’l muséu hasta la sablera de Po. Ta abierta a tolos públicos y les inscripciones pueden formalizase llamando al teléfonu 601 555 496, ente les 10:30 y 14:00 hores.

    La celebración, que va siguir hasta’l día 27 d’ochobre, cuenta cola participación de los centros educativos CRA Llanes 1 (Llanes) y CEIP Manuel Fernández Xuncos (Ribeseya).

    El programa consta de delles actividaes interrelacionaes, que busquen fomentar la comprensión interxeneracional, l’intercambiu cultural y el respetu pola naturaleza. Nelles, el ríu Vallina convirtióse nun poderosu símbolu de la vida y les sos memories, que flúi conectando pasaos y presentes diversos, pa dar forma a la identidá colectiva del Oriente d’Asturies.

    Los díes 22, 23 y 24 van desenvolvese los talleres educativos «Infancies conectaes» nel CRA Llanes 1 y CEIP Manuel Fernández Xuncos (Ribeseya). Estos articúlense en dos sesiones:

    Na primera, denominada «¿A qué xuegues?», Manolo Noriega, artesanu nonaxenariu de Porrúa, va amosar al alumnáu d’Infantil y hasta 6º de Primaria cómo fabricar y prestase con unu de los xuegos más significativos de la so infancia: les vaques de palu, y tamién los va enseñar a estremar tipos d’árboles poles sos fueyes y corteces. Pela so parte, l’alumnáu amosará-y los sos xuguetes favoritos (que llevaríen al aula pa la ocasión) y cómo se presta con ellos. L’oxetivu de l’actividá ye que dambes xeneraciones se repregunten, entiendan y construyan un espaciu común d’esperiencies sobre la infancia.

    Na segunda, que lleva por títulu «Tú me inspiras», l’alumnáu va realizar una creación artística inspirada na sesión anterior. Pa ello, va utilizar los materiales que Manolo Noriega tenía pa xugar na so infancia, casi toos provenientes de la naturaleza: palinos, quixarros, fueyes, granes… que van ser apurríos pol muséu. La sesión va terminar espresando nuna asamblea lo que se quixo tresmitir con cada obra y esponiéndoles nel aula a manera de galería d’arte.

    Los domingos 20 y 27 d’ochobre van ser díes de xornaes de puertes abiertes nel muséu.

  • El Gobiernu d’Asturies sofita per primer vegada la oficialidá nel conseyu de gobiernu

    El Gobiernu d’Asturies sofita per primer vegada la oficialidá nel conseyu de gobiernu

    El Principáu sofita la oficialidá del asturianu y del eonaviego, que va suponer “oportunidaes de desenvolvimientu tecnolóxicu, cultural y económicu”

    El gobiernu sofitó esti xueves la toma en consideranza de la proposición de reforma del Estatutu d’Autonomía defendida pola FSA-PSOE, Convocatoria por Asturies y la diputada Covadonga Tomé «p’acabar cola discriminación llingüística”.

    El Gobiernu d’Asturies manifestó’l so criteriu favoratible a tomar en consideranza de la proposición de reforma del Estatutu d’Autonomía pa que l’asturianu y l’eonaviegu seyan declaraes llingües oficiales. L’Executivu entiende qu’esa decisión “abriría la puerta a nueves oportunidaes de desenvolvimientu tecnolóxicu, cultural y económicu”.

    El presidente d’Asturies, Adrián Barbón, anunció en mayu la so intención de promover la oficialidá. Dempués de caltener una ronda de xuntes con tolos grupos parllamentarios -cola esceición de VOX-, adelantó que “llegaría hasta’l final” pa consiguir esti oxetivu.

    Nesta ocasión, la iniciativa llexislativa quedó en manes de los grupos parllamentarios. El 8 d’ochobre, 17 diputaos de la Xunta Xeneral presentaron la correspondiente proposición pa la reforma de la norma institucional básica de la comunidá, que cunta col respaldu de la FSA-PSOE, Convocatoria por Asturies y la parllamentaria Covadonga Tomé.

    Al tratase d’una proposición que xurde de la Cámara -y non del propiu Executivu, como ye habitual-, el gobiernu pue dar el so criteriu sobre la mesma. Al so xuiciu, nun caben duldes: la regulación actual del asturianu y del eonaviegu ye insuficiente, asitia a dambes llingües nuna situación d’inferioridá frente a otros idiomes cooficiales y torga aprovechar el so potencial cultural y económicu.

    El Conseyu de Gobiernu entiende que cola reforma propuesta “protéxense los derechos llingüísticos de los falantes d’estes llingües, respetando’l pluralismu de la sociedá asturiana en llinia colo que determina la Constitución Española nel so preámbulu: protexer a tolos españoles y pueblos d’España nel exerciciu de los derechos humanos, les sos cultures y tradiciones, llingües ya instituciones”.

    Pal Executivu, la Llei d’Usu y Promoción del Asturianu, que data de 1998, nun garantiza l’exerciciu de talos derechos llingüísticos. Como exemplu, cita les dificultaes a les que s’enfrentaron dellos conceyos a la de facilitar l’empléu del asturianu na tramitación alministrativa. Tamién argumenta les torgues esistentes nel ámbitu educativu “tanto pal alumnáu como pal profesoráu qu’imparte estes llingües que, al nun ser oficiales, nun tienen reconocida la so especialidá docente”.

    El gobiernu nun escaez les consecuencies económiques. Por nun ser oficiales, l’asturianu y l’eonaviegu queden al marxe de programes europeos y tampoco se beneficien de llinies de financiamientu pa proyectos culturales, lliterarios o audiovisuales. “Esto afecta gravemente la creación artística y la producción cultural, una y bones munches iniciatives nun cunten colos recursos necesarios pa desenvolvese, lo que tien un impactu directu na espublización de llibros, la producción d’obres de teatru, cine y televisión, y la creación de música nes llingües propies”, añadió l’Executivu.

    La oficialidá, otra manera, fadría posible acabar cola discriminación llingüística” de quien falen asturianu o eonaviegu, dexaría la normalización na educación, la xusticia, la sanidá y l’Alministración, facilitaría l’accesu a nueves oportunidaes de desenvolvimientu y contribuyiría a la supervivencia de dambes llingües al fortalecer “la so presencia nel día ente día”.

    Col pronunciamientu favorable del Conseyu de Gobiernu, el trámite siguiente va ser tomar en considerancia de la proposición per parte del parllamentu. Darréu, vendría’l so alderique y votación. Pa la reforma del Estatutu ye necesariu un respaldu mínimu de 27 diputaos (trés quintes partes de la Cámara). Dada la composición actual de la Xunta Xeneral, namás saldría adelantre si cuntara col sofitu del PP.

  • Los dos hospitales públicos d’Uviéu xúnense a la celebración del Desarme con motivu del X aniversariu del HUCA

    Los dos hospitales públicos d’Uviéu xúnense a la celebración del Desarme con motivu del X aniversariu del HUCA

    L’área sanitaria IV, con cabecera n’Uviéu, súmase esta fin de selmana a degustación del menú de Desarme, una de les fiestes gastronómiques más antigües d’España, nel marcu de les celebraciones del X aniversariu del Hospital Universitariu Central d’Asturies (HUCA).

    Los equipos de cocina del HUCA y del Hospital Monte Naranco, cola collaboración de la Confrería del Desarme, van encargase de preparar mañana y el sábadu los tradicionales garbanzos con bacaláu y espinaques, callos a l’asturiana y arroz con lleche, que van poder esfrutar los pacientes con dieta basal.

    Amás, el sábadu 26 d’ochobre, na ceremonia del XII Gran Capítulu de la Confrería del Desarme, l’área sanitaria IV va ser reconocida como Embaxadora d’Honor de la Fiesta del Desarme 2024, un títulu que destaca’l so esfuerzu por averar esta tradición a los pacientes y profesionales.

    El programa de la celebración del Desarme mañana nel HUCA ye esti:

    •    11:30 hores. Recepción de los cofrades nel antepar d’hospitalización.

    •    12:00 hores. Preparación del menú especial nes cocines del hospital cola collaboración de la Confrería del Desarme.

    •    13:00 hores. Emplatáu y distribución del menú a los pacientes nel área d’hospitalización.

    •    13:30 hores. Degustación del menú nes cocines del HUCA.

    Nel Monte Naranco, esta comida especial va sirvise’l sábadu 19 con un programa similar al del HUCA.

  • El plan de choque escontra la siniestralidá llaboral arranca con un centenar d’inspecciones

    El Gobiernu d’Asturies y la Inspección de Trabayu van empecipiar de forma inmediata un plan de respuesta contundente contra la siniestralidá llaboral. Ente les primeres midíes inclúyese una campaña de visites a un centenar d’empreses que tienen altos índices d’accidentes llaborales o que fueron investigaes tres un casu grave o mortal. Tamién se va efectuar un siguimientu de los partes d’accidentes, va impulsase la unviada d’actuaciones al ministeriu fiscal y esti mesmu mes van empezar a revisase les acreditaciones de los servicios de prevención ayenos (SPA).

    La xunta rectora del Institutu Asturianu de Prevención de Riesgos Llaborales (IAPRL), integrada pol gobiernu, Inspección, axentes sociales y Federación Asturiana d’Empresarios (Fade), axuntóse esta tarde nuna sesión estraordinaria p’alcordar midíes y un calendariu aproximáu d’execución.

    El conseyeru de Ciencia, Empreses, Formación y Empléu, Borja Sánchez, presidente de la xunta, esplicó les acciones previstes a partir d’esti mesmu mes, que se van llevar a cabu en collaboración ente la Inspección de Trabayu y Seguridá Social y el gobiernu y van centrase nos siguientes cuatro puntos.

    • Refuerzu de los recursos humanos

    Como yá s’anunciara, van crease siete nuevos puestos de técnicos en prevención de riesgos llaborales, con cargu a los presupuestos del próximu añu, y van cubrise cuatro places vacantes nel IAPRL.

    • Campaña conxunta de control nes empreses

    Nesti apartáu inclúyense les siguientes actuaciones:

    • Plan de visites conxuntu a empreses d’alta siniestralidá, que’l so índiz d’incidencia supere nun 50% al del so sector. Prevese qu’ente 40 y 50 empreses cumplan estos criterios. Una vegada escoyíes les compañíes, la campaña va durar seis selmanes.

    • Visites de control d’empreses investigaes tres un accidente de trabayu grave o mortal. Va evaluase l’aplicación de meyores y la corrección de defectos detectaos tres sufrir l’accidente. Nesti casu inclúyense accidentes producíos ya investigaos en 2022, teniendo en cuenta que yá pasó un añu y, por tanto, hubo tiempu d’iguar defectos. La campaña va durar seis selmanes y prevese llegar a ente 50 y 55 empreses.

    • Vixilancia y control de les comunicaciones urxentes y de la cumplimentación y unviada de los partes d’accidentes llaborales. L’Observatoriu de Condiciones de Trabayu del Principáu, xuna ferramienta del IAPRL, va realizar un siguimientu selmanal de les comunicaciones obligatories pa les empreses de los accidentes de trabayu, tanto de les comunicaciones urxentes de los accidentes graves como de los partes d’accidentes leves.

    Nesti sentíu, van revisase tolos accidentes producíos dende’l 1 de setiembre hasta’l 4 d’ochobre d’anguaño. D’equí p’arriba, va realizase un siguimientu selmanal que se va unviar a la Inspección de Trabayu.

    • Impulsar l’unviu d’actuaciones al ministeriu fiscal. Nel casu de que los fechos comprobaos pudieren ser constitutivos de delitu, la Inspección va unviar les sos actuaciones al ministeriu fiscal n’infracciones graves y bien graves nes qu’haya un incumplimientu repitíu per parte del empresariáu a requerimientos de la inspección o se detecte que nun se cumplieron les propuestes realizaes polos servicios de prevención, los delegaos de prevención o’l comité de seguridá y salú de la empresa.

    Tamién se van unviar les actes d’infracciones n’accidentes de trabayu mortales y de aquellos que provoquen remortines que puedan ser motivu de declaración d’incapacidá permanente, total o absoluta. Van unviase de forma inmediata tolos espedientes actuales y va realizase un siguimientu periódicu.

    • Vixilancia y control d’accidentes de trabayu leves. Van escoyese y van visitar empreses que sufrieren accidentes leves que respuendan a determinaos criterios: accidentes nos qu’intervengan menores, empreses de trabayu temporal y compañíes nes que’l personal afectáu tenga menos de trés meses d’antigüedá nel puestu.

    • Unviu de cartes d’alvertencia a toles empreses que superen la media del índiz d’incidencia del so sector, encamentándoles a que revisen el so sistema preventivu. Esta midida va empezar n’ochobre y va cuntar con un siguimientu añal.

    • Actuación sobre los servicios de prevención ayenos

    Cerca del 90% de les empreses tien esternalizada l’actividá preventiva. Antes de finales d’ochobre, va comunicar a estos servicios que se va entamar una revisión de les condiciones d’acreditación.

    Esa revisión, que va empezar esti mes y va enllargase mientres el próximu, va incluyir la comprobación de les ratios de trabayadores cubiertos, personal técnico contratáu, instalaciones y subcontrataciones de servicios.

    Los incumplimientos detectaos van comunicar a l’autoridá llaboral. En casu de que nun haya subsanación, va podese desacreditar la entidá. Tamién se va llevar a cabu una campaña de revisión de la calidá de les actuaciones d’estos servicios de prevención ayenos en 2025.

    • Analís de patrones

    Va poner en marcha un estudiu específicu a partir de los datos que consten nel Observatoriu de Condiciones de Trabayu pa determinar, de forma ampliada, patrones concretos que motiven accidentes de trabayu. Van tomase como referencia los años 2021, 2022 y 2023. Ta previsto cuntar colos primeros resultaos nel primer trimestre de 2025.

  • El show Despotorre escosa les entraes pa l’actuación de Mieres en 48 hores

    El show Despotorre escosa les entraes pa l’actuación de Mieres en 48 hores

    “Caja de Resistencia”, la iniciativa del Conceyu de Mieres contra la censura na cultura, vuelve collechar un nuevu ésitu, escosando en 48 hores les reserves d’entrada –quien acutaron yá pueden pasar a recoyeles– pa “Despotorre”, la primer cita d’esti trimestre d’esta propuesta que nació coles mires d’impulsar la solidaridá, garantizar la llibertá y sofitar a los y les trabayadores del sector cultural y que se convirtió yá nuna referencia como espaciu seguru pa que la industria cultural pueda desenvolvese en llibertá.

    Asina, el Auditoriu Teodoro Cuesta enllenará’l próximu 25 d’ochobre con “Despotorre”, una obra de teatru de risa censurada en Logroño. Un espectáculu pa mayores de 16 años nel que l’humor choni-punk, vascoestremeñu, feminista, descaráu, frescu y politizáu ye protagonista. Tou al traviés de monólogos nos que Raquel Torres y Ane Lindane afronten tou tipu de temes y cuestiones ensin tabúes. Rises y esfrute con un humor que pica nun
    espectáculu nuevu y tresgresor.

    Dende la conceyalía de Cultura que dirixe Rocío Antela destácase la importante respuesta que tien “Caja de Resistencia” en caúna de les cites programaes y agradezse a la ciudadanía la so participación y el so compromisu con un ciclu qu’inclúi propuestes bien distintes pero con una base común: la defensa de la llibertá na creación cultural y la llucha contra la censura, la persecución ideolóxica y los autoritarismos.

  • Alicia Flórez, de la Universidá d’Uviéu, algama’l premiu nacional ‘Xóvenes inxenieros por un mundu meyor’

    Alicia Flórez, de la Universidá d’Uviéu, algama’l premiu nacional ‘Xóvenes inxenieros por un mundu meyor’

    Alicia Flórez Berdasco, inxeniera ya investigadora de la Universidá d’Uviéu, recibió en Madrid el primer premiu del concursu «Xóvenes inxenieros/es por un mundu meyor», qu’apurre l’Institutu de la Inxeniería d’España (IIE). La primer edición d’esti galardón nacional reconoció la so contribución a facilitar la vida de les persones con discapacidá visual cola aplicación de nueves tecnoloxíes, al traviés d’un proyectu tituláu Diseñu d’antenes pa un sistema radar d’ayuda al desplazamientu autónomu de persones con discapacidá visual.

    El primer premiu del certame, patrocináu pola Fundación Mutualidá de la Inxeniería, ta dotáu con 1.250 euros. El certame dirixióse a mozos inxenieros ya inxenieres de tol país que, de manera individual o nel equipu, desenvolvieren proyectos ente los años 2022 y 2024 con potencial pa contribuyir a un mundu meyor. Los criterios d’evaluación incluyíen l’impactu n’árees clave como la meyora social, la innovación, la sostenibilidá ambiental, el tresformamientu dixital o’l emprendimientu.

    Alicia Flórez Berdasco amosóse “mui agradecida” pola reconocencia, que recoyó apocayá nun eventu celebráu en Madrid, nel que pudo conocer proyectos d’otros compañeros y compañeres d’oficiu y “compartir idees”. “Ye mui gratificante que’l trabayu y l’esfuerzu invertíos seyan reconocíos d’esta manera. Esti llogru refuerza la mio motivación pa siguir desenvolviéndome y siguir buscando formes d’ameyorar la calidá de vida de les persones al traviés de la innovación”, espresó la investigadora.

  • El Musel mueve 11,8 millones de tonelaes no que va d’añu

    El Musel mueve 11,8 millones de tonelaes no que va d’añu

    A finales de setiembre moviérense nel puertu xixonés 11,8 millones de tonelaes, que suponen un amenorgamientu del 21% respecto al mesmu periodu del añu anterior.

    Per capítulos, los graneles llíquidos crecen el 59% -hasta 1,4 millones – debío, sobre manera, a les operaciones con GNL, qu’algamaron les 813.000 tonelaes. Los graneles sólidos nos muelles comerciales mengüen el 42% poles menores importaciones y esportaciones de carbón, 2,8 millones menos de tonelaes, y tamién el tráficu de cereales pierde cien mil tonelaes con referencia al añu anterior. Ye de reseñar la crecedera de productos dolomíticos – el 234%-, hasta cuatrocientes trenta y cinco mil tonelaes. En total, los graneles sólidos suponen nesti periodu 3,7 millones de tonelaes frente a los 6,3 millones de los nueves primeros meses de 2023.

    La mercancía xeneral crez un 18%, impulsada poles movides en contenedor -797.000 tonelaes, el 29% más- y caltiénense estables les correspondientes a los productos siderúrxicos, casi 600.000. El tráficu en EBHISA mengua’l 19%, 1,3 millones de tonelaes menos, lastráu pol amenorgamientu del carbón térmicu. D’esta forma, el total de tonelaes movíes algamó los 11,8 millones, frente a los 15 millones movíes nel exerciciu anterior, lo que supon un amenorgamientu del 21%

  • Un manifiestu axunta alredor d’un cientu de periodistes pola cooficialidá de les llingües d’Asturies

    Un manifiestu axunta alredor d’un cientu de periodistes pola cooficialidá de les llingües d’Asturies

    Esta mañana presentóse na Universidá d’Uviéu un manifestu tituláu «Periodistes pola cooficialidá de les llingües d’Asturies», qu’axunta la firma de cuasi un cientu de periodistes asturianos y que sigue sumando a más nestos díes. Presentáu por Paco Álvarez, Aitana Castaño y Xuan Cándano, el manifestu esplica qu’esti colectivu nagua «pola cooficialidá del asturianu y del gallego-asturiano o eonaviego», y reclama a les y los representantes del poder llexislativu asturianu na Xunta Xeneral del Principáu «qu’entamen el camín pa facela posible». 

    Pa los periodistes asturianos «sería una noticia hestórica, positiva y esperanzadora p’Asturies». Recuerden qu’anque namás el castellán tien estatus d’idioma oficial, «nes redacciones de los medios de comunicación convivimos dende cuantayá, con respetu y con normalidá, periodistes que falamos y qu’escribimos nuna o n’otra, o que somos billingües; ye’l reflexu de la sociedá asturiana, bayurosa y plural».

    Recuerden tamién que «el llabor de los profesionales del periodismu y la comunicación fizo muncho nos años últimos pola normalización de les dos llingües propies y específiques d’Asturies», y espliquen qu, anque nos medios públicos de titularidá autonómica, «en cumplimientu del so deber y de la so razón de ser, la presencia del asturianu ye mayor, anque inda escasa, y nel casu del gallego-asturiano o eonaviego sigue siendo testimonial».

    «El procesu de normalización d’estes llingues nos medios de comunicación ha de siguir dando pasos, pero ello tien qu’acompañase con un rebalgu social, con un pasu decisivu. L’asturianu y l’eonaviego o gallego-asturiano merecen y necesiten l’estatus de cooficialidá col castellanu pa siguir vives y p’afitase na sociedá a la que pertenecen», reclamen.

    «Con un estatus de cooficialidá como’l qu’algamaron va yá munchos años toles otres llingües peninsulares (cola escepción del aragonés) van ser los asturianos y asturianes los que decidan si quieren manteneles vives, aportando con ello riqueza a la diversidá cultural del mundu», espliquen nel manifestu.

    Firmantes  n’orde alfabéticu

    1. Natalia Alonso 2. Bárbara Alonso Peri 3. Alicia Álvarez 4. Francisco Álvarez 5. Max Álvarez 6. Carlos Álvarez Rodríguez 7. Bernardo Álvarez-Villar 8. Enrique Arenas 9. Alberto Argüelles 10.José Luis Argüelles 11.Xicu Ariza 12.David Artime 13.Rafa Balbuena 14.Mario Bango 15.Juanjo Barral 16.Miguel Barrero 17.Damián Barreiro 18.Pablo Batalla 19.Vicente Bernaldo de Quirós 20.Xuan Cándano 21.Ángeles Caso 22.Aitana Castaño 23.Bibiana Coto 24.Chema Coto 25.Diego Díaz 26.Mariana Díaz 27.Rubén Espiniella 28.Quique Faes 29.Ángel Falcón 30. Sergio Fanjul 31.Daniel Fernández 32.Javier Fernández 33.Marta Fernández Crestelo 34. Luis Fernández Suárez 35.Miguel Fernandi 36. Laura Fonseca 37.Inaciu Galán 38.Illán García 39. Fernando García de Dios 40.Iván G. Fernández 41. Francisco González Orejas 42.Miguel González Somovilla 43.Blanca Gutiérrez Pérez 44.Julio César Iglesias 45.Iván Llera 46.Claudia Lorenzo Rubiera 47.Myriam Mancisidor 48.Pedro Alberto Marcos 49.Pablo Antón Marín Estrada 50.Montse Martínez 51.María Antonia Mateos 52.Julián Menéndez 53. Lucía Menéndez 54.Pedro Menéndez 55.Marcos Merino 56.Carlos Mier 57.Tito Montero 58. Luis Mugueta 59.Cristina Natal 60. Lucía Naveros 61. Luis Ordóñez 62.Eduardo Paneque 63. Luis Palomero 64. Francisco Pañeda 65.Roberto Pato 66.José Ramón Patterson 67.Elena Plaza 68.Carlos Prieto Fernández 69. Leticia Quintanal 70.Toni Rodero 71.Mar Rodríguez 72. Fernando Romero 73.Pilar Rubiera 74.Cristóbal Ruitiña 75.Rafael S. Avello 76.Jaime Santos 77.Carolina Sarmiento 78.Daniel Serrano 79.Patricia Simón 80.Yolanda Sobero 81.Bernardo Solís 82.Mercedes Suárez Marqués 83.Chelo Tuya 84.Estíbaliz Urquiola 85.Rosa Valle 86.Pedro Vallín 87.Naciu Varillas 88.Azahara Villacorta