Xixón al día

Autor: xixonaldia

  • Albert Serra va presentar «Tardes de soledad», recién ganadora de la Concha d’Oru, nel FICX

    Albert Serra va presentar «Tardes de soledad», recién ganadora de la Concha d’Oru, nel FICX

    El prestixosu cineasta Albert Serra vuelve al FICX pa presentar «Tardes de soledad» (España, Francia, Portugal), una de les obres más arriesgaes de la so carrera hasta la fecha. Dotáu d’una caligrafía audiovisual apolmonante, el director ufierta un poliédricu y nunca enantes visto acercamientu cinematográficu a la tauromaquia que resultó premiáu como Meyor Película de forma unánime pol Xuráu Internacional de la recién concluída edición del Festival de San Sebastián, que calificó al filme como “una obra d’arte cinematográficu que va perdurar como documentu ineludible”. Amás del máximu galardón de la Sección Oficial, la película recibió en San Sebastián el Premiu del Atenéu Guipuzcoanu y el Premiu Feroz Zinemaldia.

    El certame xixonés cuntó en delles ocasiones cola presencia de Serra, qu’ostenta, ente otres reconocencies internacionales, el Lleopardu d’Oru de Locarno, el Premiu Especial del Xuráu Un Certain Regard en Cannes, el Premiu Jean Vigo y dos nominaciones a los Premios César de l’Academia Francesa. El cineasta, qu’en 2023 fixo entrega en Xixón del Premiu d’Honor a la directora de fotografía francesa Agnès Godard y un añu enantes presentó Pacifiction nel FICX, torna en 2024 col so últimu trabayu xunto cola productora Montse Triola.

  • La Universidá d’Uviéu va cuntar con una cátedra sobre la cultura minera

    La Universidá d’Uviéu va cuntar con una cátedra sobre la cultura minera

    La Conseyería de Cultura, Política Llingüística y Deporte impulsa la creación d’una cátedra dedicada a la cultura minera na Universidá d’Uviéu. L’anunciu fíxolu la conseyera del ramu, Vanessa Gutiérrez, na so intervención na inauguración del Festival d’Arquitectura, Cultura y Territoriu ECOS que tuvo llugar nel Pozu Sotón. Esti eventu ye’l primeru d’arte efímeru que se lleva a cabu dafechu n’entornos vinculaos al patrimoniu industrial d’Asturies, empieza güei hasta’l 13 d’ochobre.

    Sobre la cátedra nueva, Vanessa Gutiérrez defendió la creación de manera que «la máxima institución académica asturiana s’encargue del estudiu, análisis y difusión de la cultura minera». Una cultura vinculada al patrimoniu industrial del nuestru territoriu, afondó la conseyera, que «ye fundamental pa conocer el pásau y presente d’Asturies y construir el so futuru».

    Asina mesmo, Gutiérrez destacó la collaboración cola Universidá d’Uviéu y el sindicatu mineru SOMA-FITAG-UGT, instituciones coles que mantuvo una reunión esta mesma selmana p’abordar la creación de la cátedra de la cultura minera.

    L’apoyu a la conservación, recuperación, difusión y valorización del patrimoniu cultural asturianu ye una prioridá pa la Conseyería de Cultura. Esti compromisu demostróse, ente otres acciones, col aumentu de la cuantía del presupuestu destinada a esta área, que s’incrementó nun 75 por cientu dende l’añu 2019.

  • Tres persones mancaes nun accidente na AS-II

    Tres persones mancaes nun accidente na AS-II

    Trés persones, dos varones y una muyer, resultaron mancaos nun accidente de tráficu nel AS-II, al altor del puntu quilométricu 14,500, sentíu Xixón, en Xixón. Según los datos facilitaos pol Serviciu d’Atención Médica Urxente (SAMU) los trés afectaos, dos de calter leve y unu con pronósticu reserváu por cuenta de nueva valoración médica y más pruebes, fueron treslladaos por dos ambulancies de soporte vital básicu al Hospital Universitariu Central d’Asturies (HUCA).

    El Centru de Coordinación d’Emerxencies recibió l’avisu a les 6:51 hores. Na llamada indicóse que se produxera un choque ente dos turismos y una persona taba atrapada. Nel momentu movilizóse a cinco efectivos de Bomberos del Serviciu d’Emerxencies del Principáu d’Asturies (SEPA), con base en Llamorgal, que se treslladaron col furgón multisocorru y el vehículu primera salida y a los efectivos de Bomberos de Xixón.

    Una vegada na zona, los bomberos comprobaron qu’había una persona nunu de los vehículos accidentaos que yá fuera inmovilizada pol equipu sanitariu presente nel llugar. A esti varón estrayéronlu del interior del coche, cola tabla de rescate, pela parte trasera del automóvil. Na zona taben los ocupantes d’otros dos vehículos accidentaos, un varón y una muyer, que salieren de los mesmos pelos sos medios. Los bomberos del SEPA tamién revisaron los turismos accidentaos y desconectaron les bateríes de los mesmos.

  • Podemos pide que Xixón entre a la rede internacional de ciudaes escontra’l VIH/sida

    Podemos pide que Xixón entre a la rede internacional de ciudaes escontra’l VIH/sida

    Podemos va defender nel Plenu municipal del miércoles 9 una proposición pa que Xixón entre a la Rede de Ciudaes Fast-Track, que yá compromete a más de 550 ciudaes del mundu na llucha escontra’l VIH/sida y particularmente en trés oxetivos fitos pa 2030: que’l 95% de les persones que viven col VIH/sida conoza’l so estáu serolóxicu, que’l 95% de quien conozan el so estáu serolóxicu positivu reciban un tratamientu antirretroviral y que’l 95% de les persones en tratamientu lleguen a tener una carga viral indetectable, lo que significa intransmisible.

    L’adhesión a esta iniciativa, promovida a partir de la Declaración de París de 2014 pola Asociación Internacional de Provisores d’Atención del Sida (IAPAC), ONUSIDA y ONU-Hábitat, ye una reivindicación del Comité Ciudadanu Anti-Sida d’Asturies. La presidenta d’esti colectivu, Loly Fernández Horcajo, y el coordinador del Programa d’Amenorgamientu del Dañu, Jesús Cisneros, acompañaron esti miércoles a la vocera de Podemos Xixón na Casa Conceyu, Olaya Suárez, na presentación de la proposición plenaria.

    “Xunise ye importante porque queda enforma que trabayar nel terrén del VIH”, esplica Fernández Horcajo, que señaló que nel conxuntu d’España cumplió yá unu de los oxetivos del 95%, pero persisten problemes como la dificultá d’accesu a los tratamientos, sobre manera pa les persones migrantes; o la estigmatización, que se venceya a una mayor dificultá p’aportar al diagnósticu y tamién a peor salú mental, soledá y aislamientu social”. La presidenta del Comité Anti-Sida reivindicó “la visibilidá de les persones con esta infección como un actu de dignidá” y la so “aportación a la respuesta global contra esta pandemia y les conquistes d’igualdá pa les persones vulnerables”, resaltando a los colectivos dientro de la población con VIH qu’enfrenten retos particulares, como les muyeres o les persones mayores de 50 años.

    Pela so parte, Olaya Suárez destacó que la proposición de Podemos tamién reclama que’l Conceyu xixonés ellabore un plan estratéxicu cuntando col texíu asociativu que trabaya nel ámbitu del VIH/sida, mesmo que se desenvuelvan acciones de formación y sensibilización col personal municipal, especialmente empobinaes a aquellos y aquelles profesionales que la so llabor tien una mayor incidencia social.

  • Salú avanza na tramitación del conveniu cola Xunta de Galicia pa emprestar asistencia sanitaria en zones fronterices

    Salú avanza na tramitación del conveniu cola Xunta de Galicia pa emprestar asistencia sanitaria en zones fronterices

    El Principáu avanza na tramitación del conveniu cola Xunta de Galicia pa la prestación d’asistencia sanitaria en zones de llende de dambes comunidaes. La conseyera de Salú, Concepción Saavedra, informó güei na Xunta Xeneral sobre esti alcuerdu, que yá recibió’l vistu bonu del Conseyu de Gobiernu’l 19 de xunetu, como trámite previu a la so aprobación pol Senáu, últimu pasu antes de la firma.

    “La tramitación d’esti conveniu evidencia la importancia de cooperar ente comunidaes fronterices en daqué tan esencial y necesario como la salú de les persones”, señaló Saavedra. “El Serviciu de Salú, como serviciu públicu, universal, accesible y de calidá, tien de procurar les meyores prestaciones a la so población”, amestó.

    El documentu, consensuáu por dambes alministraciones, afecta a los vecinos de la parroquia de Os Coutos, en Ibias, que van poder recibir atención na provincia de Lugo, pol so mayor proximidá. Ellí van tener accesu a servicios d’atención primaria, urxencies, atención hospitalaria y tresporte sanitariu. Les localidaes que se beneficiaren del conveniu son les siguientes: Folgueiras Os Coutos, Lagúa, La Muria, Parada, Santa Comba Os Coutos, Valdeferreiros, Vilarello, Villaselande y Viñal.

    En concretu, el conveniu asigna a estes poblaciones al centru de salú de Navia de Suarna, a la zona especial d’urxencies d’este mesmu conceyu (de 15:00 a 22:00 hores) y al puntu d’atención siguida de Becerrea (de 22:00 a 08:00 hores. Como centru de referencia establez l’Hospital Universitariu Lucus Augusti de Lugo.

    L’alcuerdu, con una duración de cuatro años, preve que’l Serviciu Gallegu de Salú tenga accesu a les hestories clíniques de los pacientes y que’l Sespa compense a la sanidá gallega polos gastos en qu’incurra pol desplazamientu de los sos profesionales sanitarios o por necesidaes de refuerzu del so personal.

    Pa beneficiase d’esti conveniu, ye necesariu que les persones interesaes llogren una tarxeta d’asistencia a movíos nel centru sanitariu gallegu más próximu a la so casa. Amás, van caltener la tarxeta sanitaria d’Asturies.

    Nel casu de que precisen dalguna prestación ortoprotésica o terapia respiratoria domiciliaria, el pidimientu va realizalo’l facultativu qu’empreste l’asistencia y va tener validez n’Asturies, onde’l Sespa va encargase d’asumila y financiala.

    El documentu tamién recueye la creación d’una comisión de siguimientu compuesta por cuatro miembros, dos de cada serviciu de salú, y un representante de caúna de les xerencies que se beneficien d’esti alcuerdu.

  • Joan Manuel Serrat aldericará col periodista Iñaki Gabilondo sobre la trayectoria vital y profesional nel teatru Xovellanos

    Joan Manuel Serrat aldericará col periodista Iñaki Gabilondo sobre la trayectoria vital y profesional nel teatru Xovellanos

    Joan Manuel Serrat, Premio Princesa d’Asturies de les Artes 2024, va aldericar col periodista Iñaki Gabilondo sobre la so trayectoria vital y profesional nel marcu de la Selmana de los Premios. L’actu, sol títulu Partidariu de vivir, va tener llugar el miércoles, 23 d’ochobre, a les 19:30 hores, nel Teatru Xovellanos de Xixón.

    El galardonáu tamién va caltener un alcuentru con una representación de profesores y alumnos que participaron nes actividaes «Contrapunto a Serrat» y «ConVersos a Serrat», del programa cultural «Toma la palabra» pa centros educativos d’Asturies. Esti actu celebraráse’l martes 22 d’ochobre nel Institutu d’Educación Secundaria Ríu Nora, en La Pola Siero.

  • El conxuntu de Los Selgas n’El Pitu, declaráu Bien d’Interés Cultural

    El conxuntu de Los Selgas n’El Pitu, declaráu Bien d’Interés Cultural

    La conseyera de Cultura, Política Llingüística y Deporte, Vanessa Gutiérrez, presidió na tarde d’ayeri plenu del Conseyu del Patrimoniu Cultural d’Asturies, l’órganu asesor máximu en materia patrimonial del Gobiernu asturianu. Na sesión plenaria, el Conseyu analizó cuatro propuestes de protección patrimonial: trés relatives a declaraciones como Bien d’Interés Cultural (BIC) y una d’inclusión nel Inventariu del Patrimoniu Cultural d’Asturies (IPCA).

    D’esta manera, el Conseyu alcordó informar favorablemente la declaración como BIC del conxuntu patrimonial de los Selgas n’El Pitu, asitiáu nel conceyu de Cuideiru. Esta aprobación constituye’l pasu previu a que’l Conseyu de Gobiernu apruebe’l decretu que va materializar esta protección definitivamente.

    La Conseyería de Cultura empezó’l procesu pa protexer el conxuntu de los Selgas en xunu del 2023, llogrando d’entós p’acá informes favorables de la Real Academia de la Historia, el Real Institutu d’Estudios Asturianos y la Real Academia de Belles Artes de San Fernando, amás de la Comisión d’Urbanismu y Ordenación del Territoriu d’Asturies.

    El conxuntu ta integráu pol palaciu de los Selgas, n’El Pitu; los sos xardinos; la ilesia de Xesús Nazarenu; la casa rectoral y les escueles d’El Pitu. De la mesma manera, inclúyese na declaración BIC la colección artística vinculada al heriedu de los Selgas, amás de la so colección documental y bibliográfica.

    Tal como señala nel so informe la Real Academia de la Historia, el complexu de la Quinta de los Selgas “ye una de les posesiones privaes surdida nes décades últimes del sieglu XIX más relevantes ente les calteníes n’Asturies y el restu de la mariña cantábrica”. Destaca tamién la Real Academia “los sos valores patrimoniales nel conxuntu de los sos inmuebles, les sos colecciones artístiques, de moblame, fondos documentales y bibliográficos, al par de los valores paisaxísticos y ornamentales de los sos xardinos históricos, tan estensos”. Nesti sentíu, indica’l documentu, calteníu hasta anguaño “coles sos característiques orixinales y nunes condiciones de caltenimientu xeneralmente notables”.

    Xunto a ello, alcuérdase tamién la declaración como Bien d’Interés Cultural de la villa romana de La Estaca-Andayón, en Les Regueres y el Conseyu empieza los trámites pa protexer Os Castros, en Taramundi, ya incluyir el molín d’Agones, en Pravia, nel Inventariu del Patrimoniu Cultural d’Asturies.

  • CONECTA va integrar nos próximos meses la gratuidá de la cercaníes ferroviaries y va dexar acutar taxis en toa Asturies

    CONECTA va integrar nos próximos meses la gratuidá de la cercaníes ferroviaries y va dexar acutar taxis en toa Asturies

    El conseyu d’alministración del Consorciu de Tresportes d’Asturies (CTA) abordó güei la fueya de ruta que nos próximos meses va siguir la plataforma de movilidá CONECTA cola incorporación de nueves prestaciones al so catálogu de servicios. Asina, el CTA yá trabaya con Renfe na integración de la gratuidá de les cercaníes ferroviaries hasta 2026, de cuenta que CONECTA opere como un billete únicu con tarifa plana en tolos medios de tresporte públicu.

    Na actualidá tamién se tán desenvolviendo les ferramientes tecnolóxiques que van facer posible la reserva de taxis en toa Asturies al traviés de l’aplicación. Amás, el CTA collabora colos conceyos asturianos pa facilitar el pagu cola tarxeta CONECTA n’aparcamientos seguros pa bicicletes y en parkings intermodales. Estes nueves prestaciones en desenvolvimientu complétense cola posibilidá de que los usuarios del tresporte rural a demanda puedan pagar el serviciu con CONECTA.

    Hasta’l momentu, el CTA emitió 230.680 tarxetes CONECTA y la previsión ye que nos próximos meses algámense les 250.000, una cifra que va suponer qu’una de cada cuatro persones que viven n’Asturies va esfrutar de la tarifa que dexa movese por tola comunidá en tresporte públicu por un máximu de 30 euros al mes.

    Los númberos de CONECTA revelen qu’un terciu de los usuarios son menores de 30 años, que se decanten pol tresporte públicu en desterciu del vehículu priváu, consolidando asina vezos de movilidá sostenible dende bien llueu. CONECTA asitióse como eferente nacional d’impulsu a un tresporte accesible, eficiente y sostenible pa toos.

  • Iniciativa pol Asturianu esixe qu’arranque’l trámite parllamentariu p’aprobar un Plan de Normalización

    Iniciativa pol Asturianu esixe qu’arranque’l trámite parllamentariu p’aprobar un Plan de Normalización

    Iniciativa pol Asturianu reclama al Gobiernu asturianu qu’entame de forma urxente la tramitación parllamentaria del Plan de Normalización. La Conseyería de Cultura, Política Llingüística y Deporte informó nel mes d’abril de que’l documentu “taba mui avanzáu”. Sicasí, a pocos meses de llegar a la primer metá de la llexislatura, sigue pendiente aprobar un plan que permita conocer los oxetivos del Gobiernu nesti ámbitu asina como poder evaluar si se tán cumpliendo.

    Asturies nun tien un plan de normalización vixente dende va cuasi venti años. Pa l’asociación de reivindicación llingüística paez inesplicable qu’un gobiernu sofitáu por fuercies parllamentaries que lleven la oficialidá y la normalización del asturianu nel programa electoral, nun dea esti pasu tan necesariu p’avanzar na normalización de les llingües propies, y polo tanto, na so supervivencia.

    Iniciativa pol Asturianu considera que nun puede terminar esti añu ensin que se ponga en marcha un plan de normalización que tien de ser ambiciosu y llevar hasta’l máximu’l marcu llegal actual, que s’alcuentra na Llei d’Usu y Promoción del asturianu. Mientres ye necesario tamién avanzar nel procesu de reforma estatutaria pa llograr la oficialidá.

    Al paecer d’Iniciativa pol Asturianu son estos dos procesos qu’han dir en paralelu, pa, per un llau, buscar una solución constitucional definitiva pal asturianu, y per otru, dar solución inmediata a la necesidá d’avances inmediatos pal usu y la protección del asturianu y l’eonaviegu.

  • El PSOE acusa a l’alcaldesa d’empecipiar una campaña de propaganda irreal utilizando proyectos socialistes

    El PSOE acusa a l’alcaldesa d’empecipiar una campaña de propaganda irreal utilizando proyectos socialistes

    L’alcaldesa de Xixón empecipió una campaña de propaganda irreal utilizando proyectos socialistes. Asina de contundente ye’l PSOE tres una selmana na que’l gobiernu local utilizó’l nome de ‘Xixón Lidera’ pa llanzar a gaita y tambor una supuesta fueya de ruta de nuevos proyectos que nun-y son propios.

    El conceyal Ramón Tuero, señala que los trés principales idees anunciaes por Carmen Moriyón son frutu del trabayu d’alcaldes socialistes, quien sí empezaron un verdaderu lideralgu de tresformamientu del conceyu. Ha señalase, nesi sentíu, que l’ampliación del Parque Científicu Tecnolóxicu ye una propuesta que’l PSOE llevó a Plenu nel últimu mandatu de Foro (2015-2019) y tanto la rehabilitación de Tabacalera como la recuperación de los antiguos terrenes de Naval Xixón son iniciatives socialistes.

    “El PCT ye una idea qu’empezó l’alcalde Tini Areces y que se desenvolvió mientres los años en que Paz Fernández-Felgueroso tuvo al frente del Conceyu, que yá contempló, amás, nos planiamientos urbanísticos de 2010, l’actual ampliación, mesmo que la recuperación de los antiguos terrenes de Naval Xixón, anque agora l’alcaldesa lo fixera sacando dinero de los xixoneses d’un llau pa metelo n’otru ensin qu’haya beneficiu dalgunu pal Conceyu, en cuenta de axustar la so cesión gratuita. La rehabilitación de Tabacalera tamién empezó con Paz Fernández-Felgueroso. La realidá ye que Carmen Moriyón lleva 9 años al mandu de esti conceyu y nunca empecipió nengún proyectu propiu”, asegura.

    Los socialistes sollerten de que l’actual mandatu de dereches nun tien aldu y agora un conceyu nuevamente paralizáu. “La so inoperancia alministrativa resúmese n’anuncios vacíos, infografías y publicidá. Neso sí son líderes tol equipu y l’alcaldesa, que tamién lidera’l ser la única rexidora xixonesa condergada pol Tribunal de Cuentes”, añede Tuero de la qu’enfea qu’intente camuflar la so falta de lideralgu utilizando precisamente la palabra líder sobre un auténticu plaxu.

    “Mientres los dos mandatos anteriores de Foru, el so gran llogru foi precisamente presentar iniciatives del PSOE camudándo-yos el nome pa que paecieren nueves, como yá asocedió col fondu de capital riesgu municipal, que se creó tamién en 2010 y que volvieron presentar nuevu en 2011”, conclúi’l conceyal del Grupu Municipal Socialista.