Xixón al día

Autor: xixonaldia

  • El Prestoso Fest celebra con tirón diez años de música

    El Prestoso Fest celebra con tirón diez años de música

    El Prestoso Fest ye, ensin dulda, un festival fechu dende’l ciñu y con gran arguyu pol llugar onde se realiza. Namás llegar al recintu afayadizude festival asitiáu en  Las Barzaniellas puedes ver cómo s’integra a la perfección na redolada de monte que l’arrodia. Amás del cartelu musical, mientres el festival hebo munches actividaes paraleles que ponen en valor la forma de vida y el folclor de los habitantes de la contorna.

    El xueves foi’l día de puertes abiertes de festival como recuerdu al so décimu aniversariu. Anque acompaño’l orbayu mientres tol día pudo esfrutase d’un cartelu casi na so totalidá de bandes asturianes. Inaguró el festival Lo Nuëso siguíu de Tania Pereira, Pablo Und Destruktion, Pinguïno, Los Manises y rematando la nueche DJ Chame.

    El vienres empezó la xornada del Prestoso nel Monesteriu de Corias con una sesión vermú de la mano de Marcos Bighouse. Pela tarde, yá nel prau de Las Balzaniellas empezó la tarde con Repion y Belako, siguiendo con Los Bichos, banda formada integramente por muyeres, llegaron dende Londres pa facer baillar a los asistentes al festival al ritmu de la cumbia sicodélica, rematando la nueche con Viva Belgrado y Kokoshca.

    El sábadu, nel escenariu Momentos Alambra pudimos esfrutar d’una sesión vermú con La vilba de Angelin y Los míticos del Chimbozaro. Pela tarde de vuelta al prau de Las Balzaniellas, pudimos esfrutar de Pablo Pablo que conquistó a tolos asistentes, siguíu de Pony Bravo y de cabeza de cartelu Nacho Vegas que actuó con tola so banda y col Coru Antifascista Al Altu La Lleva, onde hebo momentu pa la reivindicación de Les Seis de la Suiza. Yá de madrugada Triángulu d’Amor bizarro y AKDk punxeron a baillar a tol festival rematando l’últimu día con Mediocre DJ.

  • La toponimia de Xixón ye casi nula nes fiestes de la ciudá

    La toponimia de Xixón ye casi nula nes fiestes de la ciudá

    L’escenariu instaláu en Poniente pa los conciertos gratuitos de la Selmana Grande xixonesa ye un exemplu más de la guerra cruciada del gobiernu de Carmen Moriyón contra l’usu del asturianu. La palabra Xixón eliminóse del frontal de la estructura y solo utilizóse el logotipu correspondiente al nome del conceyu en castellán. “Nun tardaron nin dos díes n’incumplir el Plan de Normalización Llingüística aprobáu’l xueves. Nun hai dulda de que la ultraderecha sigue tando mui presente nel gobiernu llocal de la mano del tránsfuga de Vox y responsable de Divertia, Óliver Suárez. Él y la so formación ultraderechista dexaron clares cuáles yeren les sos intenciones cuando Carmen Moriyón dexó les competencies en festexos: vetar l’asturianu. Esi plan ta llegando a bon puertu de la mano de l’alcaldesa y el so equipu”,señala’l conceyal del Grupu Municipal Socialista nel Conceyu de Xixón, Ramón Tuero.

    Énte esti atropellu contra la cultura asturiana, el PSOE anuncia que va denunciar énte’l Conseyu Asesor de la Llingua la eliminación de la toponimia oficial asturiana porque l’oxetivu, apunta Tuero, ye salvaguardar la nuesa llingua y el nuesu patrimoniu cultural. “Utilizar el logotipu de Xixón o’l billingüe ye lo mínimo que debemos facer pa dar visibilidá a aquello que nos identifica. Ye mui murniu que’l tirón d’oreyes al gobiernu local lo diera unu de los nuesos grandes artistes, Rodrigo Cuevas. Nel so multitudinariu conciertuen Poniente, fixo especial referencia a l’ausencia del nome n’asturianu del nuesu conceyu”, añede.

    El conceyal recuerda que nun ye la primer vegada qu’asocede una situación similar. Apocayá’l gobiernu camudó’l nome del programa municipal ‘Préstame facer deporte’ pa desaniciar l’asturianu y pasó a llamase ‘Me gusta hacer deporte’. Amás, retiró’l conveniu al traviés del cual el UC Ceares y el Gijón Femenino patrocinaben ‘Xixón’ nes sos camisetes. “Quieren borrar l’asturianu de toes partes pa que nun quede nin rastru del so usu”, conclúi Tuero.

  • Estopa da un conciertu con compromisu y pal recuerdu en Xixón

    Estopa da un conciertu con compromisu y pal recuerdu en Xixón

    Esti pasáu sábadu, Xixón recibío colos brazos abiertos a Estopa, que dieron un conciertu de los que se recuerden mientres dos hores y media. Los hermanos Muñoz salieron al escenariu con una enerxía contaxosa y fixeron vibrar al públicu dende’l primer momentu. Pero, más allá de la música, el conciertu tuvo cargáu de mensaxes. Con humor y sin pelos na llingua, los artistas nun dudaron en referise contra «los fachas» con mensaxes que sacaron rises y aplausos de los asistentes.

    Nun momentu emotivu, Estopa dedicó unes pallabres a la Revolución d’Ochobre del 34, recordando la llucha del pueblu asturianu pola xusticia y la llibertá. Estes allocuciones, xunto col ambiente festivu y reivindicativu que se respiraba, fixeron que la nueche fuera inolvidable. Los asturianos despidieron al dúu con una gran ovación, agradeciendo non solo la so música, sinón tamién la valentía pa tratar temes sociales y políticos. En definitiva, un conciertu onde’l compromisu y la diversión fueron de la mano.

  • Foro vota en contra de la retirada del monumentu de Simancas en Xixón

    Foro vota en contra de la retirada del monumentu de Simancas en Xixón

    Nel plenu del Conceyu de Xixón que se celebró esta mañana, Foro, partíu gobernante, votó en contra de la retirada del monumentu franquista de los golpistes de Simancas en Xixón onde se cantó’l Cara al sol va un mes y que creó la polémica na ciudá y nes redes sociales. Xunto a Foro, votaron tamién en contra Vox y el Partíu Popular.

    La propuesta, llevada al plenu por IU Xixón y Podemos, buscaba la retirada del monumentu denomináu «Héroes del Simancas», creada por Luis Moya y Álvarez Laviada, autores tamién de la intervención de La Llaboral. Anque’l monumentu ta nun edificiu priváu, la llei avala la so retirada al tener proyección al espaciu públicu.

    La petición argumentábase dende’l cumplimientu de les lleis estatales y autonómiques de memoria democrática y tien l’aval d’entidades como la Federación Asturiana Memoria y República (Famyr), Asturias Laica, la Cultural Gijonesa, la Asociación Memorialista de Asturias, l’Asociación Lázaro Cárdenas, l’Atenéu Republicanu d’Asturies y les loxes Rosario d’Acuña y El Trabayu.

  • El Gobiernu d’Asturies va suspender les autorizaciones urbanístiques pa la instalación de parques de bateríes en suelu non urbanizable

    El Gobiernu d’Asturies va suspender les autorizaciones urbanístiques pa la instalación de parques de bateríes en suelu non urbanizable

    El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, anunció l’entamu del trámite pa la suspensión d’autorizaciones urbanístiques relatives a la instalación d’almacenes de bateríes en suelos non urbanizable, tres alcordase pola Comisión Permanente de la CUOTA.

    El conseyeru añedió qu’esta suspensión va recoyer nun decretu, que se ta ellaborando por trámite d’urxencia, que va contemplar el cambéu del Reglamentu d’Ordenación del Territoriu y Urbanismu d’Asturies (ROTU) pa incorporar amás d’esta paralización, un nuevu epígrafe nel que se van declarar incompatibles los usos d’estes bateríes nos núcleos rurales.

    Zapico señaló que con estes midíes y hasta l’aprobación definitiva d’unes directrices sectoriales “damos tranquilidá al mundu rural” y aportunó en que “la transición enerxética tien que ser xusta colos territorios, coles persones, con el trabayadores, y por eso tien de faese de forma ordenada, pautada y apautada”.

    Nesti sentíu, el conseyeru incidió na necesidá de cuntar con una empresa pública nacional d’enerxía “yá que se trata d’una sector estratéxica qu’amás d’otres cuestiones, podría desenvolver esti tipu d’instalaciones pa evitar la especulación”.

    Pela so parte, Ruiz Latierro esplicó que la CUOTA aprobó emitir una instrucción a los conceyos “yá que munchos d’ellos manifestárennos les sos duldes no referente a la tramitación d’estes infraestructures”, na que s’establez qu’esta tramitación tien de facese por aciu un estudiu d’implantación “lo que da un ampliu marxe de maniobra a los conceyos”.

    El director xeneral señaló que los criterios aprobaos pola CUOTA pa la implantación d’estos parques de bateríes, los denominaos “stand alone” que les sos potencies d’almacenamientu superen los 3 MW y nun se llinden al autoconsumu, señalen qu’al tratase d’instalaciones asimilables a les d’usu industrial, los suelos más afayadizos y prioritarios pa la so implantación van ser los suelos urbanos o urbanizables, nos que yá tuvieren previstos nos planiamientos o fueron presistentes, los usos industriales, estractivos o enerxéticos.

    No que fai a los suelos non urbanizables, Ruiz Latierro puntualizó que de la suspensión mentada esclúyense aquellos suelos que seyan o fueren industriales, mineros o enerxéticos, coles mires de poner en valor unos suelos que na actualidá atópense mayoritariamente abandonaos y degradaos.

  • Les 6 de La Suiza: anatomía d’un casu de sindicalismu

    Les 6 de La Suiza: anatomía d’un casu de sindicalismu

    Pa conocer l’aniciu del casu de «Les 6 de La Suiza» hai que remontase a 2017, cuando llega una trabayadora a CNT, en Xixón, p’asesorase y denunciar les sos condiciones llaborales nuna pastelería, la que da nome al propiu casu, onde-y llegaren a provocar una amenaza d’albuertu. A ello sumábase un casu d’acosu sexual nel trabayu. El so estáu emocional yera preocupante porque, dempués de la baxa de maternidá, tenía que reincorporase al so puestu, lo que-y provocaba munchu mieu.

    El sindicatu fixo un trabayu de mediación ente la persona y la empresa implicada. D’esta manera, intentaron aconceyar cola empresa, pero nun amosaron nenguna intención, asina que’entamaron cola movilización, que llogró un cambéu d’actitú y que dos persones del equipu d’acción sindical aconceyaren cola empresa. Na xunta, CNT buscó la meyor solución: alcuerdu de cantidaes debíes, salida apautada de la empresa y, un últimu puntu, totalmente secundariu: ver la posibilidá de que la empresa retirara una denuncia penal contra’l noviu d’esta.

    Tres nun topar solución, entamó la movilización y l’acción colectiva del sindicatu. Tamién denunciaron toes aquelles irregularidaes que se cometíen y l’acosu sexual, finalmente archiváu por supuesta falta de pruebes, pero que nun s’investigó, como se demostró nel sobreseimientu del casu. Les acciones en sofitu de la trabayadora de La Suiza coincidieron con una campaña del sindicatu escontra la esplotación nel comerciu y la hostelería, lo que dio más altavoz al casu con concentraciones y manifestaciones.

    Tres ello, lleguen una serie de socesos que van acabar coles sentencies de carcel pa seis de les persones que sofitaben el casu. En pallabres de les protagonistes «detuvieron a les trés compañeres que concretáramos la xunta, supuestamente por un intentu de obstrucción a la xusticia y denunciáronnos, en más d’una decena d’ocasiones, por esa mesma obstrucción a la xusticia, por coacciones graves, amenaces… inclusive asociación ilícita a la CNT».

    En tolos casos archiváronse les causes, mesmo nel xulgáu que na Audiencia provincial. Pero tamién s’abrió una instrucción por calumnies que, tres trés años y cuando diba concluyir el procesu d’instrucción, cambió nuna investigación por obstrucción a la xusticia y coacciones. Magar de que se recurriere porque l’Audiencia dixera en repitíes ocasiones que nun había casu, finalmente xulgáronlos por eso. Mientres les distintes instrucciones, más de 40 persones tuvieron imputaes.

    Tres too ello, llegó’l momentu nel que salieron les sentencies condenatories, que suponíen trés años y mediu de carcel a caúna de les seis persones condenaes baxo’l pretestu de delitos d’obstrucción a la xusticia y coacciones graves. Una sentencia que les protagonistes ven como una condena cola que dar exemplu y persiguir l’acción sindical y de la que resalten que «condenó a 2 persones por dir a una xunta, a 3 por solicitar esa xunta, a 1 por coyer un megáfonu nuna manifestación amás, de condenar a la trabayadora por cuntalo».

    Agora, tres la sentencia, les movilizaciones poles 6 de La Suiza siguen el so camín baxo’l lema «Facer sindicalismu nun ye delitu». El 28 de setiembre, nuna unión sindical poques veces vista, una manifestación va percorrer Xixón. Va empezar a les 12:00 hores na plaza del Humedal y va percorrer delles places del centru de la ciudá hasta rematar nel Náuticu.

  • Carlangas, Depedro y Carlos Ares, les propuestes de Directos VibraMahou

    Carlangas, Depedro y Carlos Ares, les propuestes de Directos VibraMahou

    Pasada la temporada de festivales braniegos, Cimbla Mahou, la plataforma de música de Mahou Cinco Estrellas que xenera alcuentros al rodiu del directu, va volver a Asturies cola meyor música. Y va facelo con Directos VibraMahou, unu de los ciclos musicales más
    esperaos del añu pol públicu asturianu, qu’en 2024 va traer a Carlos Ares, Carlangas y Depedro.

    La xira completa va cuntar un total de 31 conciertos que, ente’l 20 de setiembre y el 13 d’avientu, van percorrer les sales de referencia de 11 ciudaes del estáu, ente elles Uviéu y Xixón. VibraMahou impulsa asina la música en vivu nes sales, llugares esenciales pal desenvolvimientu del talentu emerxente y la música directu al traviés d’esperiencies cinco estrelles.

    El ciclu completu presenta a 22 artistes que van defender los sos repertorios en directu: Anabel Lee, La Paloma, Sienna, Rufus T. Firefly, Carlos Ares, The Limboos, Rocío Saiz, Mafalda Cardenal, Eva Sola, Axolotes Mexicanos, Venturi, Métrika, Bum Motion Club, NudoZurdo, Ainoa Buitrago, Nerve Agent, La Habitación Roja, Grande Amore, Sienna, Carlangas y Depedro.

    N’Asturies, el multi-instrumentista, cantautor y productor Carlos Ares, que forxó la so identidá artística al traviés de la música, convirtiéndola nel mediu que reflexa los sos cambeos personal y vital, va ser l’encargáu d’abrir el ciclu na Sala Albéniz de Xixón el 15 de payares. Dempués llegará-y la vez, el 23 de payares, a Carlangas, que va tomar l’escenariu na Sala Tribeca d’Uviéu col so amiestu de música discu, punk y ritmos llatinos que prometen facer baillar a tolos asistentes.

    Y el broche d’oru n’Asturies va ponelu Depedro, que va llegar el 29 de payares a Uviéu, llevando al públicu nun viaxe cultural y emocional cola so fusión de rock, folk ya influencies llatines.

    Les entraes pa tolos conciertos de Directos Cimbla Mahou 2024 yá pueden adquirise equí.

  • Iniciativa pol Asturianu vuelve a la Feria de Muestres con un espaciu anováu dedicáu a la sostenibilidá

    Iniciativa pol Asturianu vuelve a la Feria de Muestres con un espaciu anováu dedicáu a la sostenibilidá

    Iniciativa pol Asturianu vuelve a la Feria Internacional de Muestres d’Asturies (FIDMA) con un espaciu anováu. La entidá de reivindicación llingüística torna al eventu más multitudinariu del branu n’Asturies con un puestu remocicáu qu’afonda na sostenibilidá, el respetu al mediu ambiente y la naturaleza. La cita va celebrase nel recintu ferial Luis Adaro de Xixón del 3 al 18 d’agostu.

    Trece empreses van tar presentes nesta edición nel espaciu d’Iniciativa pol Asturianu. Les compañíes formen parte de sectores tan diversos como l’agroalimentariu, editorial, audiovisual, moda, infantil, telefonía, industrial y la seguridá. Nesta ocasión repiten Acuto Xuegos, Asturcón Seguridá, Cartonaxes VIR, Cuatro Gotes Producciones, Cerveza Caleya, Mondo Manzana, Nordés Telefonía, Pan Duru, Puru Remangu, Ediciones Radagast, Ringo Rango, Tiza y Peonza y Ediciones Trabe.

    Al traviés d’esta iniciativa, l’asociación pretende facer llegar a los y les visitantes de la Feria de Muestres que l’asturianu ye un elementu que favorez la creación d’empreses y que xenera actividá económica, puestos de trabayu y, polo tanto, riqueza. Amás, con tola variedá de productos y servicios de les empreses, la organización quier amosar que la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses.

    Iniciativa pol Asturianu, que nun recibe nengún tipu d’ayuda pública, quier qu’esti espaciu seya un llugar d’alcuentru y un escaparate a la sociedá asturiana de la importancia que tien l’asturianu na economía asturiana. L’espaciu va topase nel pabellón 3-4 del Palaciu de Congresos nel stand 14.

      III Día de la Llingua Asturiana

    Lo que tamién vuelve a la Feria de Muestres ye la celebración del Día de la Llingua Asturiana. Iniciativa pol Asturianu, en collaboración cola Cámara de Comerciu de Xixón, entama un añu más, y yá van tres, la celebración d’esta xornada dedicada al idioma. La cita va ser el sábadu 17 d’agostu. La organización ta rematando estos díes el programa de la xornada cultural que va ufiertar un bayurosu programa d’actividaes per tol recintu ferial. La entidá de reivindicación llingüística anima a la sociedá civil a participar nesta xornada de valoración y reivindicación del idioma.

  • La ilesia de la Universidá Llaboral recupera casi 30 años dempués la réplica de la Cruz de la Victoria restaurada

    La ilesia de la Universidá Llaboral recupera casi 30 años dempués la réplica de la Cruz de la Victoria restaurada

    La ilesia de la Universidá Llaboral de Xixón recuperó, casi 30 años dempués de la so retirada pol deterioru que presentaba, la so Cruz de la Victoria, una réplica del principal símbolu d’Asturies. El Gobiernu d’Asturies amplió’l pasáu payares les obres que realiza nel complexu patrimonial pa incluyir l’arreglu de la pieza, mesmo que la de la cruz del remate de la llinterna, que se va asitiar llueu.

    Encargada en 1952 al escultor José Espino Alonso, la pieza, de 2,10 metros d’altor y 1,50 d’anchu, presentaba deformaciones, corrosión y perda de anclaxes. Pa la restauración integral de les dos cruces y l’allugamientu nel so llugar orixinal, la Conseyería de Cultura, Política Llingüística y Deporte destinó más de 80.000 euros

    Los trabayos pa recuperar l’elementu per parte d’un taller especializáu incluyeron un escáner en trés dimensiones de los cinco partes nes que s’atopaba almacenada, un pasu previu a la llimpieza, protección con pigmentos minerales, reposición de xemes y el montaxe y soldadura. Coles mesmes, mientres el procesu detectóse la mala traza de caltenimientu de la estructura de soporte de la pieza, qu’hubo de sustituyise. D’esta miente, la cruz corona de nuevu’l grupu escultóricu de Santiago Caballero.

  • Piloña renueva la xestión del Centru Asesor de la Muyer

    Piloña renueva la xestión del Centru Asesor de la Muyer

    El Gobiernu d’Asturies y el Conceyu de Piloña anovaron el conveniu pa la xestión del Centru Asesor de la Muyer del conceyu (CAM), qu’en 2023 atendió a 367 usuaries, de les que 206 yeren víctimes de violencia de xéneru. En concretu, el CAM ufiertó asesoramientu xurídicu a 227 persones y atención psicolóxica a 140.

    Tres la firma, Llamedo destacó que’l pactu d’Estáu dexó reforzar los CAM con psicólogues qu’ufierten asistencia especializada a les muyeres y a los sos fíos y fíes. Amás, señaló que nos equipamientos que nun cunten con personal especializáu, l’asistencia garantízase al traviés del Programa d’Atención Psicosocial a la Muyer de los servicios de salú mental del Sespa.

    “El nuesu compromisu nesta llexislatura ye siguir reforzando estos centros y asegurar que les muyeres de tolos puntos d’Asturies que lo precisen tengan atención xurídica y psicolóxica con facilidá y rapidez”, sorrayó la vicepresidenta.

    Nel CAM de L’Infiestu trabayen una psicóloga y una abogada qu’empresten asistencia gratuita en tolos campos a usuaries de Piloña, Parres, Amieva, Cangues d’Onís, Onís y Ponga, con especial atención a los casos de violencia de xéneru.

    Les trabayadores de los CAM exercen unu llabor fundamental na detección de posibles casos de violencia de xéneru. Nesti sentíu, dende la proximidá qu’ufierten los centros, distribuyíos por toa Asturies, les profesionales exercen como responsables de casu y ufierten itinerarios personalizaos pa cada usuaria. Tamién tán en contactu permanente con otros servicios na atención integral a les muyeres maltrataes, como la vez d’oficiu, les cases d’acoyida, les fuerces y cuerpos de seguridá, los servicios sociales y el Serviciu Públicu d’Empléu (Sepepa). Igualmente, actúen como especialistes en diversos mecanismos municipales y de la comunidá.