Ayudes al alquiler p’afectaos pola Covid-19: cuándo y cómo solicitales

L'ayuda va concedese mientres seis meses y va abonase nun únicu pagu con un máximu de 500 euros por mes

0
732

La Conseyería de Derechos Sociales y Bientar activó una llinia d’ayudes directes al arriendu destinada a persones afectaes económicamente pola crisis del coronavirus. L’ayuda va concedese mientres seis meses y va abonase nun únicu pagu con un máximu de 500 euros por mes. Les solicitúes d’esta subvención, publicada esti viernes nel Boletín Oficial del Principáu (Bopa), van poder presentase dende’l llunes 20 d’abril hasta’l 30 de setiembre y van tramitase por orde de pidimientu.

Los fondos van dir destinaos al abonu de les mensualidaes dende abril a setiembre. Van pagase directamente a los propietarios de los inmuebles, cola fin d’ufiertar seguridá al arrendador y garantizar el destín de les ayudes. La tramitación va facese por aciu un cenciellu formulariu nel que se va incluyir una declaración responsable y que va poder rellenase dende l’ordenador o’l móvil.

Van poder acoyese a estes subvenciones les persones es aquelles que quedaren en paru a partir del 1 de marzu, les afectaes por un ERTE dende’l 1 de marzu, los autónomos que tuvieren que cesar o amenorgar la so actividá y los llares con ingresos que nun superen los 400 euros dende’l 14 de marzu. “Garantizar que la población más vulnerable tenga accesu a una vivienda siempre foi una de les nuestres prioridaes y sigue siéndolo” destacó la conseyera Melania Álvarez.

Midíes complementaries

La Conseyería de Derechos Sociales y Bientar ta trabayando n’otres midíes complementaries a estes ayudes. Ente elles, la implantación de nuevos programes d’accesu a la vivienda pa colectivos vulnerables. Van tener prioridá les víctimes de violencia de xéneru y trata, les persones ensin techu, los mozos extutelaos y les persones que tuvieren nun centru penitenciariu. Melania Álvarez tamién avanzó que se ta collaborando estrechamente col Gobiernu central pa impulsar acciones que prevengan los desagospios por impagos d’hipoteca o arriendu.