Humildá, cercanía, audacia y un fondu amor a Asturies. Son los requisitos que pidió güei el presidente del Principáu, Adrián Barbón, a los nuevos conseyeros y conseyeres, quien tomaron posesión de los sos cargos na Xunta Xeneral. Mientres la so intervención, el presidente incidió nesi mensaxe a los miembros del so Executivu: “Nun vos quiero zarraos nos vuesos despachos envueltos pola burocracia. Tenéis De tar a ras de tierra, dispuestos a escuchar les crítiques y necesidaes de la sociedá, porque quiero conseyeros y conseyeres que sepan pisar el barru”, sorrayó.
Tres la promesa de los cargos nun actu institucional que cuntó cola presencia de les principales autoridaes xudiciales, civiles y militares de la comunidá, Barbón animó al so equipu a convertise en protagonistes activos “de la década del cambéu”, especialmente énte la fola involucionista” que percuerre Europa. “Tenemos que pone-y frenu porque somos un gobiernu qu’exemplifica la política progresista”, sorrayó.
«L’honor inmensu” que, en palabres del presidente, supon formar parte del Gobiernu d’Asturies, vien xuníu irremediablemente a “la enorme responsabilidá que trai’l cargu”. Por ello, Barbón recordó que’l motor que tien de mover al so gabinete “ye’l de la vocación de devolver a Asturies tolo qu’esta tierra nos dio”. “Tenéis de ser dignos herederos de los anteriores gobiernos del Principáu, que dieron lo meyor de sí en favor d’esta rexón”, encamentó.
El nuevu Executivu cunta con diez conseyeríes, les mesmes que la pasada llexislatura, anque afeches a los nuevos retos. Trátase d’un gobiernu paritariu que per primer vegada cunta con una muyer como vicepresidenta, Gimena Llamedo, quien tamién va ocupar la cartera de Presidencia, Retu Demográficu, Igualdá y Turismu.
