Nun guardar rensía ye un pasu necesariu pa dir p’alantre nel llogru la oficialidá. A dellos les sos incumplíes promeses, a otros la so antigua belixerancia a la escontra, y asina dirá faciéndose con tolos que s’arrimen con sinceridá al carru de la dignidá d’esti pueblu. La xenerosidá del mesmu ye pergrande y acoyerá colos brazos abiertos a tolos que se xunten pa emburriar pol so futuru. Vengan d’onde vengan. Los ataques y los erros del pasáu quedarán quiciabes na memoria, pero non nel facer conxuntu pol espoxigue del país. El perdón ye un determín, non un sentimientu, porque cuando se perdona nun se siente más la ofiensa.
Fai dos años cellebróse’l 75 aniversariu de la Declaración Universal de los Drechos Humanos. El documentu más tornáu de la hestoria. Un llogru de la Humanidá pesie a qu’en munchos llugares nun se respeten. Queda pendiente esi puntu pa que la so universalidá seya un fechu real. Equí, van dos años de la perda de la mayor oportunidá hestórica pal algame de la oficialidá. Anque cueste trabayu, hai de siguir sumando voluntaes pa la xera.
Los Drechos Llingüísticos son Drechos Humanos. Poro l’algame la oficialidá n’Asturies ha ser un llabor de toes y toos. La reconocencia llegal dará carta de natura a la llibre espresión de les asturianes y asturianos na llingua qu’escueyan en toles estayes de la so vida. Tres tantos años de represión, intolerancia y arbitrariedá, abriráse’l camín a la integración de toles faces del pueblu asturianu p’afondar na so autoestima y torgar la desapaición de la so singular ayalga de cultura inmaterial.
Tolos que se sientan miembros de la tierrina compartirán un finxu cultural, la llingua na que poner en valir el desendolcu social del territoriu. La bona acoyida ye la que de xuru van tenela toes y toos los bienllegaos a la causa. Que bien pudiera algamase esti añu. Entós, la rempuesta sedrá hestórica por parte d’esti pequeñu pueblu d’una Europa que caltién, nel so discursu, la defensa de los Drechos Humanos.