Güei xueves, día 7 de xineru, el Presidente de l’Academia de la Llingua Asturiana (ALLA), Xosé Antón González Riaño, aconceyó col Presidente del Principáu d’Asturies, Adrián Barbón. Nun comunicáu l’Academia calificó esti alcuentru como «mui positivu, nun clima de confianza mutua y alcuerdu».
Nel conceyu tratáronse dellos aspectos rellacionaos cola política llingüística actual, acordies col marcu llegal vixente. D’esti mou, falóse de les nueves posibilidaes que s’abren pa la enseñanza del asturianu cola Llei d’Educación (LOMLOE), acabante aprobar nel Parllamentu español; de la presencia del asturianu nos medios de comunicación públicos (TPA), asina como nel ámbitu institucional, y el papel y posición alministrativa de l’ALLA.
Nesti análisis global que se fixo de la situación del asturianu, entrambes partes tuvieron d’alcuerdu dafechu y quedaron na necesidá d’afondar nesta política llingüística de dignificación y de recuperación del asturianu y del eonaviegu o fala. Sicasí, el noyu central de la entrevista ente los presidentes d’entrambes instituciones foi la oficialidá y, más específicamente, de cómo tratar y tramitar el llogru d’esta per aciu de la reforma estatutaria, que tien que s’aprobar por 3/5 de los diputaos de la Xunta Xeneral, ye dicir, una mayoría mui cualificada.
L’Academia de la Llingua Asturiana entiende que na Xunta Xeneral hai güei esi númberu de 27 diputaos y, que darréu d’ello, pue entamase esti procesu, yá que nesta llexislatura les fuerces parllamentaries favoratibles a la oficialidá son ampliamente mayoritaries.
Tamién nesti aspectu hebo un alcuerdu plenu ente les dos partes nel sentíu de garantizar que nesta llexislatura, va algamase la necesaria reforma estatutaria empobinada a la inclusión nel Estatutu d’Autonomía de la cooficialidá de les llingües propies d’Asturies.
L’Academia de la Llingua Asturiana tresmitió-y al presidente qu’esti procesu tien qu’entamase nel 2021 y tien la plena seguranza de qu’esto va ser asina.
En tou casu, l’ALLA treslladará’l resultáu d’esti aconceyamientu a les fuerces parllamentaries, qu’amás de la FSA-PSOE, según la nuesa opinión, sofiten agora mesmo la oficialidá: Izquierda Xunida, Podemos y Foro Asturies. Ábrese un futuru de recuperación llingüística n’Asturies que, dende llueu, pue considerase históricu y que, a lo cabero, va asegurar el futuru del asturianu como llingua de cultura nel Principáu.
