El Gobiernu d’Asturies publicó güei una convocatoria d’ayudes pa sovencionar proyectos d’educación pal desenvolvimientu y acciones de sensibilización por un importe de 250.000 euros. El plazu de solicitú va tar abiertu hasta’l 16 d’abril.
L’oxetivu de la convocatoria publicada güei nel Boletín Oficial del Principáu (BOPA), que pue consultase nesti enllaz, ye fomentar ente la ciudadanía asturiana la solidaridá, el compromisu colos drechos humanos y el desenvolvimientu sostenible. Trátase de xenerar una conciencia crítica p’algamar una sociedá más participativa y xusta, qu’al traviés de les sos demandes, esmoliciones y análisis incida na toma de decisiones polítiques, económiques y sociales.
Les ayudes inclúin llinies d’actuación. La primera ta dirixida a proyectos que promuevan procesos educativos que favorezan una meyor comprensión de los problemes qu’afecten a los países en desenvolvimientu, xeneren una actitú positiva pa con ellos y estimulen la solidaridá y la cooperación activa. Estes iniciatives van poder realizase nel ámbitu de la educación formal, non formal y informal. L’importe de la sovención pa estos proyectos nun va poder pasar los 12.000 euros.
Anguaño, por cuenta de la crisis sanitaria provocada pola covid-19, nel ámbitu de la educación formal va dase prioridá a les actuaciones telemátiques, p’aforrar los riesgos inherentes a la presencia en centros escolares de persones ayenes, sacante que les resoluciones socesives de midíes urxentes de prevención, contención y coordinación faigan posible la modalidá presencial.
La segunda llinia subvenciona acciones puntuales de sensibilización que promuevan actitúes solidaries y básense na organización de xornaes, alcuentros, esposiciones, conferencies, ciclos de cine, publicaciones, recursos didácticos o cualquier otra intervención asemeyada. Nesti casu, la subvención máxima va ser de 6.000 euros.
El Gobiernu d’Asturies sofitó l’añu pasáu 21 proyectos con 220.045 euros, de los que 191.495 destináronse a actuaciones d’educación pal desenvolvimientu y 28.550 a acciones de sensibilización.
