Camión de basures
Un camión de recoyida de basures de Coxersa.

El Consorciu pa la Xestión de Residuos Sólidos d’Asturies (Coxersa) va invertir 854.924 euros na ampliación de los accesos rodaos al centru de tratamientu de residuos, allugáu en Serín, y na modernización del procedimientu de pesaxe de camiones. Dambes actuaciones pretenden aumentar la seguridá y eficiencia de les instalaciones. El conseyu d’alministración de la entidá adoptó esta decisión nuna xunta presidida pol vicepresidente y conseyeru d’Infraestructures, Mediu Ambiente y Cambéu Climáticu, Juan Cofiño. A ella tamién asistieron la viceconseyera de Mediu Ambiente y Cambéu Climáticu, Nieves Roqueñí, y el xerente del consorciu, Santiago Fernández.

L’ampliación d’accesos va incluyir la creación d’un nuevu carril de salida ensin pesaxe, ente que l’actual vial va pasar a ser namás d’entrada. Tamién se va dotar a la instalación d’un nuevu equipu de pesaxe de camiones y va modernizase la informática de los yá esistentes. Coxersa va empecipiar agora los trámites d’axudicación del proyectu. Les obres van tener un plazu d’execución de seis meses.

Per otra parte, el conseyu aprobó tamién una inversión de 300.000 euros pa mercar contenedores destinaos a envases y a papel y cartón. D’esta manera se va facer frente a la creciente demanda que se ta produciendo gracies al aumentu sosteníu del reciclaje de residuos. Amás, Coxersa dio lluz verde al programa d’educación ambiental, al que van poder optar conceyos con una población inferior a 25.000 habitantes. Esti plan pretende concienciar a la ciudadanía sobre la necesidá de que se recicle, siquier, el 50% del pesu de los residuos actuales.