La conseyera de Cultura, Política Llingüística y Deporte, Vanessa Gutiérrez, presentó nel Muséu de la Sidra d’Asturies, en Nava, el Diccionariu de la mazana, el pumar y la sidra, una obra del escritor y filólogu Xuan Xosé Sánchez Vicente que se consolida como referencia fundamental pa la preservación y tresmisión del patrimoniu sidreru asturianu.
El diccionariu publícase tres la reconocencia mundial de la cultura sidrera como patrimoniu cultural inmaterial de la humanidá pola Unesco. Un finxu qu’asitia esti legáu nel mapa internacional y refuerza’l compromisu institucional cola so protección y espardimientu. La edición del volume enmárcase nel Programa pluriañal d’acciones de preservación y promoción de la cultura sidrera asturiana, qu’axunta más d’un centenar de midíes empobinaes a fortalecer, visibilizar y garantizar la tresmisión d’esti patrimoniu inmaterial.
La obra configura un mapa léxicu que recueye, amás del vocabulariu, saberes y espresiones tradicionales, técniques y oficios que conformen una forma d’entender el territoriu y la so cultura. Con una tirada inicial de 2.500 exemplares, la conseyería va distribuyir el diccionariu nos principales equipamientos culturales públicos, según n’espacios venceyaos a esta tradición ancestral. L’oxetivu ye asegurar un accesu ampliu y directu a un recursu que combina valor divulgativu, educativu y patrimonial.
