La Conseyería d’Educación afitó ente los díes 1 y 30 de payares, dambos inclusive, el plazu de presentación de solicitúes pa participar nel procedimientu selectivu estraordinariu de estabilización por concursu-oposición del cuerpu de maestros. La ufierta consta de 479 places de siete especialidaes, lo que supón 81 más que na convocatoria anterior.
Les solicitúes van presentase puramente de forma telemática, al igual qu’asocedió col procesu de estabilización de Secundaria. Tocantes a les pruebes, van desenvolvese en xunu de 2024.
Del total de places, 142 van ser de Primaria, 95 d’Infantil, 71 de Pedagoxía Terapéutica, 70 d’Inglés, 57 d’Educación Física, 22 d’Audición y Llinguaxe y 22 de Música. Coles mesmes, de la cifra global, hai un cupu de 41 acutaes pa persones con discapacidá.
Les pruebes nun van tener calter eliminatoriu y van estremase en dos partes: una tema por escritu y la presentación de la unidá didáctica. Dambes van puntuar por igual. Les persones aspirantes van disponer de dos hores pa desenvolver la tema y 50 minutos pa la unidá didáctica, distribuyíos ente preparación (5 minutos), esposición (30) y defensa (15).
Pa la calificación final, la fase d’oposición supón el 60% y la fase de concursu, el 40% restante, según el baremu de la convocatoria. Na fase d’oposición ye imprescindible llograr una calificación mínima de 5 puntos p’aportar al concursu. Amás, pa llograr la nota máxima por esperiencia tienen d’acreditase diez años na especialidá a la que s’opta.
Cuando remate la estabilización d’estes 479 places del cuerpu de maestros, Educación envalora que la tasa d’interinidá va quedar amenorgada al 8%, l’oxetivu establecíu tanto pol Gobiernu central como pol asturianu.
Los procedimientos de estabilización docente -que s’empecipiaron n’avientu de 2022- van consolidar en total 1.562 puestos que taben ocupaos por profesoráu interín. Estes places axustáronse dientro d’una ufierta estraordinaria d’empléu públicu pa tola Alministración, que cuntó cola aprobación d’UXT, CC.OO. y CSIF.
