El Conseyu del Patrimoniu Históricu, máximu órganu de coordinación en materia patrimonial ente’l Ministeriu de Cultura y les comunidaes autónomes, alcordó empecipiar los trámites pa declarar les tenaes elevaes tradicionales como manifestación representativa del patrimoniu cultural inmaterial d’España. A la xunta, celebrada en Bilbo, asistió’l director xeneral de Patrimoniu Cultural, Pablo León.
Na propuesta alquieren un notable protagonismu horros, cabazos y paneres d’Asturies pola so bayura, estáu de caltenimientu y pervivencia. En concretu, destáquense los aspectos inmateriales venceyaos a la cultura de los horros, ente ellos, les conocencies, mañes, técniques y práctiques tradicionales y actuales que faen posible la construcción, caltenimientu y arreglu d’estes edificaciones por aciu el tresformamientu de materiales como la castañal, el carbayu o la piedra, que formen parte del paisaxe y contienen la esencia de la redolada.
Coles mesmes, incídese nel papel d’horros, paneres y cabazos na organización de los pueblos y del so paisaxe cultural, como reflexu d’una forma de vida y d’esplotación del territoriu.
Esta reconocencia foi impulsáu pola acabante crear Rede Horrea, qu’integra diverses entidaes venceyaes a la protección del patrimoniu –nel casu Asturies, l’Asociación del Horru Asturianu- y que cunta col decidíu sofitu del Gobiernu d’Asturies, que yá incluyó la declaración como manifestación representativa ente les midíes recoyíes nel Plan del Horru, aprobáu en marzu de 2023.
