Galicia va computar el casu positivu de Covid-19 detectáu esti miércoles nun consultoriu del área sanitaria de Xarrio. La paciente vive y trabaya na provincia de Lugo, onde se rexistra anguaño un biltu pol nuevu coronavirus. Los servicios de vixilancia epidemiolóxica consensuaron con criterios técnicos qu’esti positivu seya notificáu pola comunidá vecina. El Serviciu de Vixilancia de Contactos Estrechos va realizar el siguimientu de siete contactos de la muyer que viven n’Asturies, de los que cinco son personales y dos llaborales.
El presidente del Gobiernu asturianu, Adrián Barbón, señaló que, magar qu’Asturies foi la primer comunidá autónoma n’algamar un ciclu completu d’incubación ensin una andada de COVID-19, nun ta llibre de rexistrar nuevos casos. «Siempres quixi fuxir de trunfalismos y esta situación puede asoceder una vegada reestablecida la movilidá». Barbón realizó un llamamientu especial a les persones nueves, a quien pidió que cumplan les midíes y sían conscientes de que «hasta que nun apaeza una vacuna, tou precuru ye poco».
Por ello, el xefe del Executivu encamentó a la ciudadanía a estremar la distancia de seguridá y a cumplir les midíes d’hixene. L’Executivu asturianu ta estudiando’l nivel de posibles andaes na redolada de la persona afectada. «Con toa contundencia, van adoptase les midíes necesaries nesa área pa evitar una andada comuñal», añadió.
Otramanera, Barbón incidió na importancia de l’apertura de los consultorios periféricos de forma gradual siempres que se garanticen les midíes de seguridá. «Esta persona nun allegó al so consultoriu habitual, que ta zarráu, sinón a otru centru de salú que cumple col doble circuitu sanitariu», esplicó. Esti casu, de computase n’Asturies, nun se consideraría un biltu del virus al rexistrase menos de trés positivos con un nexu epidemiolóxicu.
