El Gobiernu d’Asturies aprobó güei el proyectu de Llei d’Impulsu Demográficu, la primer iniciativa lexislativa d’esti mandatu. La norma combina de forma equilibrada polítiques empobinaes al fomentu de l’actividá económica y la cohesión social, per un sitiu, y tendentes a fomentar l’aumentu de la población, por otru. Amás, refuerza l’ampliu consensu algamáu la pasada llexislatura nel parlamentu col dictame sobro’l retu demográficu, yá que non sólo recueye munches propuestes incluyíes naquel documentu, sinón que tamién incorpora otres nueves, frutu de la última ronda de xuntes y conversaciones con tolos grupos.
L’impulsu demográficu ye «la prioridá indiscutible” pal nuevu mandatu, tal que precisó Adrián Barbón nel so discursu de investidura, nel qu’esplicó que l’ésitu nesti ámbitu va depender del bon desempeñu de toles polítiques del Executivu. L’oxetivu que se busca ye responder al descensu d’habitantes, l’avieyamientu y el despoblamientu con iniciatives eficaces a mediu y llargu plazu.
El proyectu qu’agora s’unviará a la Xunta Xeneral consta de 81 artículos yá introduz la perspectiva demográfica en toles polítiques públiques, al entender que solo con un planteamientu coordináu y tresversal va poder contenese y revertise l’enclín poblacional.
El Gobiernu del Principáu incluyó midíes específiques pa contener el cayente demográficu n’Asturies, la comunidá más avieyada d’España, en tolos presupuestos de la última llexislatura. El vixente, por casu, aumenta les ayudes directes a la natalidá, ameyora les deducciones fiscales y habilita, per primer vegada na hestoria, ayudes pa les families con menores de cuatro años: hasta 1.500 euros per fíu o fía que nun tenga escueles infantiles públiques nel so conceyu o escareza de plaza.
El proyectu de llei respuende a la mesma estratexa, pero con un planteamientu más ampliu y ambiciosu: dotar d’un marcu xurídicu afayadizu y estable a toles actuaciones empobinaes a encarar el desafíu demográficu con una perspectiva a mediu y llargu plazu. Ente otres llinies d’actuación, establez les siguientes:
• Clasificación de conceyos. van establecese cuatro categoríes de conceyos: demográficamente dinámicos, inestables, en crisis demográfica y en riesgu de despoblamientu.
• Fiscalidá estremada. Especifica la necesidá d’establecer beneficios pa contribuyentes que vivan en conceyos con especiales dificultaes demográfiques, mesmo qu’a determinaos grupos sociales o colectivos, tal que yá se ta aplicando.
• Atención a la población migrante. L’articuláu dedica atención al sofitu ya integración de la población inmigrante por aciu midíes que favorezan el so enraigonamientu na comunidá. Coles mesmes, va articulase una estratexa de sofitu a la torna d’asturianos y asturianes nel esterior.
• Fomentu de la igualdá y la conciliación. Plantega otorgar prioridá a les muyeres nel accesu a ayudes y sovenciones en conceyos con especiales dificultaes demográfiques, impulsar midíes de conciliación con especial atención al mediu rural y dar prioridá a les families monoparentales.
• Arquitectura normativa ya institucional. Tolos proyectos de llei, decretos y planes estratéxicos que s’impulsen tendrán de dir acompañaos d’un informe d’impactu demográficu. Coles mesmes, prevese la creación d’una comisión gubernamental como órganu d’asesoramientu, sofitu y coordinación.
