¿Pa colonizar la Lluna tendremos de volver a ser muyeres y homes de los covarones? Esta ye la entruga a la que busca respuesta l’Axencia Espacial Europea por aciu una serie de proyectos y, nunos d’ellos particularmente interesante, collaboren investigadores de la Universidá d’Uviéu, la Universidade de Vigo y l’empresa EOSOL Inxeniería.
Los y les investigadores recuerden que, anguaño, esiste un gran interés por volver a la Lluna, pero esta vegada pa quedanos. El problema ta en que la superficie llunar ye una redolada por demás contraria, con temperatures que ronden los 150 graos centígrados de día, 150 graos centígrados baxo cero de nueche y gran cantidá de radiación solar potencialmente canceríxena. “Una posible solución atopóse nos tubos de lava llunares, cuévanos formaos mientres erupciones volcániques nel remotu pasáu llunar, que podríen danos abellugui”, destaca Germán León Fernández, investigador del Departamentu d’Inxeniería Eléctrica, Electrónica de Computadores y Sistemes de la Universidá d’Uviéu.
El primer pasu pa la so colonización consiste na esploración robótica del so interior y ye ende onde s’enmarca’l proyectu Antennas for Underground Communications, financiáu pola Axencia Espacial Europea. L’oxetu d’esti proyectu ye diseñar, fabricar y probar antenes pa que los vehículos d’esploración, más conocíos como rovers pola so denominación n’inglés, se comuniquen dientro de les cueves y puedan unviar información del so interior.
Les cueves volcániques de Lanzarote constitúin un gran análogu de les cueves llunares y ende tánse realizando los ensayos nel marcu d’esti proyectu. Les midíes tomáronse na cueva de Los Naturalistas y nel tubu de lava del volcán de La Corona.
“Diseñemos un sistema de midida llixeru y portátil, pa poder tresportalo dientro d’estes cueves. Realicemos midíes en distintos escenarios (coldos, estrechamientos, desprendimientos…) pa caracterizar el mayor númberu de casos al que pueda enfrentase un robot esplorador na lluna”, sorraya l’investigador.
“Coles midíes realizaes buscamos validar los modelos físicos desenvueltos pol nuesu equipu d’investigadores. Tantu estos modelos como les midíes realizaes van utilizase pa optimizar el sistema de comunicaciones de los futuros robots esploradores”, añede Alejandro Gómez San Juan, investigador del centru atlanTTiC de la Universidade de Vigo.»
