El Gobiernu d’Asturies creó una nueva llinia d’ayudes, dotada con 6,6 millones, pa promover la meyora de la eficiencia enerxética n’agospiamientos turísticos de la comunidá. La nueva convocatoria de sovenciones publicóse nel Boletín Oficial del Principáu (Bopa) y el so financiamientu cuerre al cargu de los fondos europeos Next Generation. El plazu de presentación de solicitúes va tar abiertu dende mañana hasta’l próximu 18 de febreru.
La Conseyería de Cultura, Política Llingüística y Turismu impulsa esti nuevu paquete d’ayudes pa sofitar la implantación d’enerxíes anovables y midíes d’aforru n’hoteles, viviendes d’usu turísticu, agospiamientos rurales, campings y albergues.
Asina, les ayudes van dexar a particulares, empreses, renteros y concesionarios d’agospiamientos encarar actuaciones como la meyora de la envolvente térmica del inmueble o la implantación del usu d’enerxíes anovables nes instalaciones de calefacción, climatización, refrigeración, ventilación y agua caliente sanitaria. La convocatoria cubre tamién la instalación de redes de calor y fríu alimentaes por fontes d’enerxía anovable y calor residual para complexos turísticos de dellos edificios. Igualmente, van sofitase actuaciones qu’ameyoren los sistemes d’iluminación.
