El Gobiernu d’Asturies llamentó güei que’l presidente del Partíu Popular (PP), Álvaro Queipo, respondiera “con un portazu” a la invitación pa consensuar la oficialidá del asturianu y del eonaviegu. “L’asturianismu nun se diz, practícase”, afirmó’l voceru del Executivu y conseyeru de Facienda, Guillermo Peláez.
El presidente, Adrián Barbón, convocó a tolos grupos parlamentarios –cola escepción de VOX- a una xunta’l día 23. L’oxetivu ye alcordar una proposición de llei que remate na reforma del Estatutu d’Autonomía y la reconocencia de la oficialidá de les llingües propies d’Asturies. Nesi alcuentru va participar tamién el presidente de l’Academia de la Llingua Asturiana, Xosé Antón González Riaño.
González Riaño foi, precisamente, quien propunxo la selmana pasada al gobiernu que realizara un esfuerzu p’algamar la oficialidá. El xefe del Executivu asumió en persona esti planteamientu y decidió convocar a les fuerces parlamentaries pa que la oficialidá pueda facese realidá esta mesma llexislatura, en llinia col programa electoral del PSOE, qu’apuesta pola reconocencia oficial de les llingües propies nel marcu de la reforma y actualización del Estatutu d’Autonomía.
Queipo anunció esta mañana que’l PP va dir a la cita, pero va caltener el so vetu a la oficialidá. El sofitu del Partíu Popular ye imprescindible pa la reforma del Estatutu, por culpa de qu’esixe un mínimu de 27 votos favorables. «Magar d’esti portazu, vamos llegar hasta’l final. Primero, porque somos un gobiernu de diálogu y consensu y nun arrenunciamos a que’l PP rectifique”, añedió Peláez. “Y, segundu, porque ye tiempu d’amosar l’asturianismu con fechos, non cola boquina. La política seria nun va de quedar bien con tol mundu. Nun se trata de dicir a cada cual lo que quier oyer”, aportunó.
“Esto nun va de presumir d’asturianista pela mañana y d’antiasturianista pela tarde pa quedar bien con unos y con otros. Na política seria hai que dir cola verdá per delantre”, añeden fontes del Executivu.
El voceru tamién s’amosó sosprendíu pol fechu de que Queipo afirmara que la oficialidá estrema a la sociedá. “¿A quién estrema, si precisamente buscamos el máximu consensu? Pienso en Galicia, onde’l PP considera que’l gallegu ye patrimoniu de tola sociedá. ¿Por qué equí s’alloña y quiebra lo qu’ellí xune y cohesiona? Nunca vimos que los populares gallegos aseguren que la oficialidá ye una imposición que taraza les sos llibertaes, sinón tolo contrario. Otra cosa ye que la oficialidá estreme al PP asturianu. Si ye asina, que lo reconozan”, indicó.
En llinia con esti razonamientu, el conseyeru emplazó al PP a facer el so propiu cambéu, “como fixo la Federación Socialista Asturiana en 2017 col lideralgu audaz d’Adrián Barbón”. “Namá faen falta trés coses: lideralgu, audacia y respetu a la cultura asturiana. Porque col asturianismu nun se xuega, merezse un respetu”, señaló Peláez.
El voceru del gobiernu animó al PP a dialogar y axustar “pa tomar la única midida que puede torgar la desapaición del asturianu y del eonaviegu, que ye la oficialidá. Pa ello va ser necesario que’l Partíu Popular abandone’l so refugu históricu a la cultura asturiana, pero puede facese”. Sicasí, si’l PP s’enfota nel inmovilismu, “que nun busque escuses pa xustificar la so negativa. Los discutinios inútiles nun nos interesen. El Gobiernu ta p’alcordar y pa responder a los retos d’Asturies, y unu d’ellos ye defender nuesa mesma cultura con arguyu d’identidá”, manifestó.
