El gobiernu de Carmen Moriyón cambia’l nome del programa «Préstame facer deporte» pa desaniciar l’asturianu y, d’equí p’arriba, va pasar a llamase ‘Me gusta hacer deporte’. Trátase de la ufierta municipal na que s’axunten actividaes deportives que se realicen nes distintes sableres del conceyu qu’empezó en 2010.
Na Xunta Rectora del Patronatu Deportivu Municipal celebrada esti mediudía, l’equipu de l’alcaldesa, col conceyal del ramu Jorge Pañeda al frente, xustificó a entrugues del PSOE xixonés el motivu d’esta decisión de la siguiente forma: nun confundir a les neñes y los neños colos idiomes. “Ye un atropellu a la promoción del asturianu. Amosemos abiertamente la nuesa quexa y defendemos ensin dulda l’usu d’una espresión asturiana como esta” añede’l conceyal del Grupu Municipal Socialista, Jacobo López.
El gobiernu llocal foi capaz d’asegurar que yera la primer vegada qu’otru programa, el de Vacaciones Deportives, incluyía los bolos asturianos y la petanca. “La petanca nun ye un deporte tradicional asturianu, ye d’orixe francés. Vox yá nun ta nel gobiernu, pero les idees de la ultraderecha siguen presentes con Foro, PP y el tránsfuga y esa obsesión por eliminar cualquier rastru que nos lleve a la llingua y a la cultura asturiana”, concluyó López, del PSOE.
