La conseyera de Derechos Sociales y Bienestar, Melania Álvarez, asumió esti vienres el compromisu de resolver en plazu tolos espedientes rellacionaos coles ayudes a la dependencia y el salariu social, pa dar cobertura lo primero posible a les persones que soliciten dalguna d’estes prestaciones. La titular del área reconoció retrasos na tramitación alministrativa y pidió disculpes a la ciudadanía. «En política, como na vida, ye bono pidir disculpes, y güei quiero facelo pola demoranza nes valoraciones de la dependencia y na xestión del salariu social», señaló.
Álvarez espunxo na Xunta Xeneral el programa de gobiernu de la so área y detalló les midíes que van llevar a cabu p’amenorgar les esperes. Asina, anunció meyores na xestión y meyores na adaptación a les demandes sociales nueves al traviés de modelos d’atención anovaos. Tamién se va impulsar un plan de choque cola mira de simplificar la tramitación y aforrar duplicidades.
Nesti mandatu va desenvolvese la Llei Integral de Persones Mayores
La conseyera esplicó que nesti mandatu va desenvolvese la Llei Integral de Persones Mayores, empobinada a ameyorar la so calidá de vida, facilitar la so atención sociosanitaria, la so participación social y el so accesu a la cultura. “Nun pue gobernase de llombu a un colectivu que representa más del 25 % de la población asturiano”, alvirtió. En cuantes a l’atención a mayores, anunció cambeos na estructura del organismu autónomu Establecimientos Residenciales p’Ancianos d’Asturies (ERA), qu’incorpora un área asistencial nueva centrada na calidá, la seguranza y l’atención sociosanitaria.
Emancipación de mocedá
Les prioridaes en materia de vivienda van centrase na llucha contra la esclusión residencial, pa lo que Derechos Sociales va trabayar en collaboración colos conceyos. L’oxetivu principal ye cubrir les necesidaes de los colectivos d’emerxencia social y implantar modelos innovadores como’l Housing first (viviendes pa persones que viven na cai), favorecer l’accesu a la vivienda a precios accesibles y ayudar a emancipase a la población menor de 35 años.
Prioridá llexislativa
L’Executivu va volver ponese col proyectu de Llei de Garantía de Derechos y Prestaciones Vitales, que va llevar al Parlamentu nel primer periodu de sesiones. Esta iniciativa va dexar consolidar y ameyorar el salariu social básicu.
Amás, primero que remate l’añu, va presentar la Estratexa d’atención a persones con diversidá funcional, que defende un modelu nuevu d’atención basáu na persona. “Nun vamos aforrar esfuercios nesti ámbitu”, afirmó la conseyera.
Atención a la infancia
Pela so parte, l’Institutu Asturianu pa l’Atención Integral a la Infancia y a les Families va reforzar los programes d’acoyimientu temporal y permanente de menores de 0 a 3 y de 4 a 6 años. Nel mesmu sentíu, van reforzase los programes de transición, pa favorecer la incorporación de menores tutelaos a la vida autónoma.
Estratexa de llucha contra la probeza y la esclusión
La conseyera informó de que’l so departamentu trabaya nel desenvolvimientu de la Llei d’Acción Concertada con entidaes d’iniciativa social y de que yá se punxeron les bases pa entainar na definición d’una Estratexa de llucha contra la probeza y la esclusión. Amás, comprometióse a tratar la reforma de la Llei de Servicios Sociales.
Álvarez añedió qu’ún de los sos propósitos principales va ser facer más comprensible y cenciella la terminoloxía de los espedientes, de manera que la ciudadanía pueda entender ensin dificultá’l llinguaxe énte cualquier trámite. Trátase d’apostar pola llectura fácil y ameyorar les canales de comunicación cola población.
