L’equipu de Xenética Vexetal del Serviciu Rexonal d’Investigación y Desenvolvimientu Agroalimentario (Serida) escoyó y caracterizó trés variedaes d’escanda asturiana, qu’entraron nel rexistru colos nomes de roxa, azul y blanquina, na categoría de variedaes de caltenimientu. Estos nuevos tipos fueron presentaos esta mañana na Xornada de la Escanda.
L’investigador del Serida Juan José Ferreira foi l’encargáu d’esplicar les nueves variedaes énte los productores. “Conclúyese un programa de meyora col que s’establecen unes llinies homoxénees d’escanda asturiana bien caracterizaes y diferenciables morfolóxicamente”, afirmó’l responsable del equipu de Xenética Vexetal.
Les trés variedaes, anguaño calteníes nel bancu de semientes del Serida, pueden estremase a güeyu poles tonalidaes de coloración qu’adquieren les sos espigues na maduración: nel casu de la blanquina, son blanques; nel de l’azul, tórnense azulaes; y nel de la roxa, pardes. Tamién hai diferencies na fuerza de panificación de les sos farines: na blanquina y l’azul, ye baxa; na roxa, moderada.
P’acompañar a estes iniciatives, l’equipu de Xenética Vexetal empezó a trabayar cola Asociación Asturiana de Productores d’Escanda (Asapes), nel desenvolvimientu d’un programa de selección a partir de poblaciones locales, pa contribuyir a la so recuperación.
El procesu d’identificación
El Serida conserva 89 entraes d’esti cultivu nel so el bancu de semientes. Esti material foi caracterizáu en campu, y escoyéronse les plantes más destacaes. De siguío, realizáronse cuatro xeneraciones de selección y multiplicación hasta consiguir llinies homoxénees.
Dempués, estudiáronse les característiques morfolóxiques, agronómiques y calidable harino-panadera mientres dos años en dos localidaes pa, finalmente, llograr trés nueves variedaes “distintes a les primeramente descrites, homoxénees y estables”. Toes elles fueron almitíes nel rexistru comercial cola categoría de “variedaes de caltenimientu”, yá que ye un material xenéticu local afechu a les condiciones.
Les nueves variedaes tán siendo calteníes nel bancu de granes del Serida y nos próximos años entámase realizar ensayos demostrativos con les productores pa que faigan una valoración.
