La sablera de San Llorienzo, unu de los escenarios más emblemáticos de Xixón, acoyó esti martes la presentación de la nueva camiseta del primer equipu del Real Sporting pa la temporada 2025/26. L’actu, que se celebró xunto a la escalera 12, contó con una gran presencia d’aficionaos, aproximao unos 600, que nun quixeron perder el momentu.
La nueva equipación, que podrá mercase dende les 10:00 hores d’esti miércoles tanto na tienda oficial como na plataforma online del club, llama l’atención pol so diseñu d’estilu clásicu con toques modernos. Destaca’l cuellu blancu con un ribete coloráu, que s’estiende tamién a les manegues, amás de les rayes verticales que, esti añu, baxen hasta’l final de la camiseta, a diferencia d’otres temporaes.
La elección del arenal de San Llorienzo como llugar pa esti actu nun ye casualidá: foi nesa mesma sablera onde l’equipu tuvo los sos entamos hai yá 120 años. De fechu, parte de la nueva campaña de socios grabóse nesi escenariu tan simbólicu. Nos años anteriores, les presentaciones fixéronse en llugares como’l Palaciu de Revillaxexéu, l’Acuariu de Xixón o’l muelle.
Nel actu participaron xugadores del primer equipu como Nacho Martín, César Gelabert y Lucas Perrin, y les xugadores Antía y Rosa del equipu femenín. Toos ellos formaron parte d’un entreteníu partidillu na arena xunto a un grupu de guajes sportinguistes. Esta ye la cuarta temporada na que’l club viste con ropa de la marca Puma y la segunda cola empresa asturiana Siroko como patrocinador principal de la camiseta.
Mentanto, l’equipu siguió colos sos entrenamientos nesta pretemporada. Esti martes pela mañana, los xugadores volvieron a exercitarse na Escuela de Fútbol de Mareo, onde se xuntaron dellos seguidores pa velos. Pa mañana ta prevista una doble sesión: pela mañana a les 09:30 hores, abierta al públicu, y pela tarde a les 18:00 hores, a puerta zarrada.
