La celebración del Xacobéu 2021 adáptase a la situación actual consecuencia del andanciu de la Covid-19. El Gobiernu d’Asturies va presidir el grupu de trabayu del Conseyu Xacobéu encargáu d’analizar y readaptar la programación cultural. Asina lo decidió la comisión executiva del organismu nuna xunta celebrada por videoconferencia.
Nel alcuentru, alcordóse analizar tola programación cultural de Xacobéu 2021 cola cuenta de valorar la so adecuación a l’actual situación. De la mesma, el grupu de trabayu va estudiar la posibilidá d’incorporar nuevos programes culturales, tamién en formatu dixital, que permitan caltener activa la celebración del próximu Añu Santu, independientemente de les restricciones de la movilidá.
El Conseyu Xacobéu, máximu órganu de coordinación del Camín de Santiago, abordó la situación actual de la ruta tres l’impactu provocáu pola Covid-19. Tamién decidió empecipiar el procesu de torna a la normalidá na vía xacobea. Un comité va coordinar los trabayos hasta la so reapertura y la de toles sos infraestructures, n’especial, los albergues de pelegrinos. Esti grupu de trabayu va sopelexar nos próximos díes una encuesta ente tolos sectores implicaos na xestión de la ruta xacobea. L’oxetivu ye conocer con detalle la realidá de la vía y les propuestes de cara a la so reapertura.
