Tres la salida del anterior director de la RTPA, Francisco G. Orejas, ábrese un periodu nel que la Xunta Xeneral del Principáu d’Asturies tien que nomar un nuevu director de la radiotelevisión pública asturiana. Pa Iniciativa pol Asturianu «trátase d’un momentu clave pa demostrar el sofitu de los partíos a la normalización y a la presencia del asturianu nos medios de comunicación públicos».
Esti oxetivu apaez yá nel Estatutu d’Autonomía de 1981 y na propia Llei d’Usu y Promoción del Asturianu de 1998, espliquen dende la entidá. Esta reclamación ta tamién sofitada pola Carta Europea de les Llingües Rexonales o Minoritaries, ratificada pol Estáu español en 2001, recueye nel so artículu 11, relativu a los medios de comunicación, la importancia d’implementar polítiques efectives nos medios, estableciendo claramente la garantía de la creación polo menos d’una emisora de radio y d’un canal de televisión nes llingües rexonales o minoritaries.
Dende la ONG recuerden que los propios principios rectores del ente públicu asturianu reflexen claramente esta cuestión. L’añu pasáu aprobóse’l Mandatu Marcu, que establez precisamente una mayor presencia de les llingües propies d’Asturies nes emisiones de la radiotelevisión pública. «Sicasí, dende entós nun se vieron pasos alantre significativos», denuncien.
Pa Iniciativa pol Asturianu resulta evidente que los avances nesti ámbitu van dase con mayor facilidá si la persona que tea al frente de la RTPA ye una persona con sensibilidá cola normalización llingüística y con conocimientu de la realidá sociollingüística asturiana. Amás, por supuestu, de cuntar con un proyectu que venceye la realidá asturiana a esti mediu informativu. «La llingua asturiana precisa de manera urxente contar con una mayor presencia en tolos medios, tanto na televisión como na radio y n’Internet, y ye equí onde la radiotelevisión pública tien d’aumentar la so presencia», espliquen.
Iniciativa pol Asturianu esixe que esti seya un procesu «tresparente y nel que se tengan en cuenta de manera destacada los méritos llingüísticos, yá que ún de los oxetivos principales nuna comunidá onde esisten dos llingües propies tien de ser, sobre too, la presencia de la llingua propia y la so normalización social».
Per otra parte, l’asociación entamará un ciclu de contactos colos partíos políticos del parllamentu asturianu p’amosar la so postura y conocer los sos oxetivos, teniendo en cuenta la importancia d’esta cuestión.
Pa la organización de reivindicación llingüística ye una oportunidá hestórica pa que la llingua asturiana y l’eonaviegu puedan contar con unos medios de comunicación verdaderamente útiles pa la so difusión y pa garantizar que les persones falantes y que tola población d’Asturies tenga accesu a unos medios nos que puedan escuchar la so propia llingua y familiarizase col so usu n’ámbitos formales ya informales. La radiotelevisión pública tien de difundir, por supuesto de manera tresversal, l’usu del asturianu dende la población infantil hasta la adulta, dende los conteníos d’entretenimientu hasta los informativos, pasando polos deportes y por tolos conteníos que emita l’ente.
