Investigadores asturianos participaron nel desarrollu d’un prototipu de respirador automáticu que podría ser utilizáu na crisis sanitaria del COVID-19. El respirador creóse por impresión 3D. Nos próximos díes va ser probáu clínicamente nel Hospital Universitariu Central d’Asturies (HUCA). En casu de que’l prototipu denomináu Reesistencia Team llogre la validación de los servicios sanitarios, el Gobiernu asturianu va financiar la fabricación de los respiradores.
El proyectu ta lideráu pol inxenieru informáticu Marcos Castillo, l’inxenieru mecánicu Juan María Piñera Parrilla, l’inxenieru electrónicu Carlos Moreno-Luque Suárez y l’especialista en 3D Bartolomé López Medina. Reesistencia Team lleva trabayando nel desenvolvimientu d’esti respirador desque se decretó l’estáu d’alarma. La documentación necesaria pa fabricalu asoleyóse en códigu abiertu. D’esta manera, cualquier persona con imprentadora 3D va poder imprimir les pieces.
Esti proyectu captó l’interés de la fundación Cotec pa tratar de validar lo antes posible el prototipu y ponelo al serviciu de les autoridaes sanitaries. L’HUCA ta ufiertando’l so sofitu y collaboración pa qu’estos respiradores pa les unidaes de cuidos intensivos (UCI) sían fabricaos lo más rápido posible. El prototipu desenvolvióse siguiendo los aspeutos técnicos riquíos pa esti tipu de respiradores. Sicasí, queda la parte más importante, la valoración clínica.
