Xixón al día

Etiqueta: HUCA

  • Los inmuebles del antiguu HUCA van tar adscritos a Asturies

    Los inmuebles del antiguu HUCA van tar adscritos a Asturies

    El Conseyu de Ministros dio güei lluz verde al cambéu normativu que va dexar adscribir a Asturies los trés inmuebles allugaos nos terrenos del antiguu HUCA, n’El Cristu, que son propiedá de la Tesorería Xeneral de la Seguridá Social. D’esta miente, avancen satisfactoriamente los contactos que’l Gobiernu d’Asturies y el Gobiernu d’España caltienen dende va meses coles mires de que los edificios de Maternidá, Consultes Esternes y Silicosis pasen a manos de l’Alministración autonómica, con cuenta de que nel futuru alluguen equipamientos de la Universidá d’Uviéu, tal que anunció’l presidente nel últimu Alderique d’Orientación Política.

    L’alcuerdu del Conseyu de Ministros consiste nel cambéu del real decretu sobre patrimoniu de la Seguridá Social que, ente otres cuestiones, introduz la figura de la adscripción gratuita de bienes inmuebles de la Tesorería Xeneral a otres alministraciones. Primeramente, nos presupuestos del Estáu p’anguaño yá s’introdució una disposición adicional (25ª) al envís de camudar la Llei Xeneral de la Seguridá Social. Trátase de que la Tesorería tuviera les ferramientes xurídiques oportunes p’atender pidimientos de adscripción gratuita d’edificios como la que pretende’l Principáu.

    Esti alcuerdu supón un pasu más escontra l’oxetivu de llevar a cabu una operación vital pal futuru de la Universidá d’Uviéu y, por estensión, pa la capital asturiana, ya qu’el treslláu de dependencies académiques a El Cristu va favorecer la consiguiente unificación de sedes xudiciales nes actuales dependencies de Llamaquique, que güei ocupen distintes facultaes.

    El Gobiernu d’Asturies tien el firme propósitu de tresformar l’espaciu qu’ocupaba l’antiguu HUCA. Asina, los presupuestos pa esti exerciciu inclúin xuna partida de 1,2 millones pa empecipiar el valtamientu de los inmuebles propiedá de l’Alministración autonómica. Los trabayos, nos que se van invertir en total 3,5 millones, van empezar anguaño y van enllargase hasta 2024.

  • Asturies va invertir 13,6 millones pa implantar la ciruxía robótica nel HUCA y el Hospital de Cabueñes

    Asturies va invertir 13,6 millones pa implantar la ciruxía robótica nel HUCA y el Hospital de Cabueñes

    El Principáu va invertir 13,6 millones para enllantar la ciruxía robótica nel Hospital Universitariu Central d’Asturies (HUCA) y l’Hospital Universitariu de Cabueñes. El Conseyu de Gobiernu dio güei un pasu clave para avanzar escontra ese oxetivu, cola aprobación d’un gastu de 5.517.600 euros que va dexar adquirir el próximu añu los dos equipos para los centros de cabecera de les árees sanitaries IV y V.

    Esti sistema, que cunta con financiamientu del Fondu Européu de Desenvolvimientu Rexonal (Feder), podrá aplicase en siete especialidaes quirúrxiques: uroloxía, xinecoloxía, otorrinolaringoloxía y ciruxía xeneral, torácica, pediátrica y maxilofacial.

    L’alquisición d’estes plataformes tecnolóxiques d’última xeneración va dexar llevar a cabo intervenciones quirúrxiques mínimamente invasivas per vía laparoscópica con visión tridimensional. D’esta miente, la robótica va ayudar a los profesionales a efectuar operaciones complexes con mayor seguridá, precisión, flexibilidá y control que coles técniques convencionales. Amás, esti tipu de ciruxíes favorecen una recuperación más rápida de los pacientes, impliquen menos tiempu d’hospitalización y faciliten una torna más rápida a la vida cotidiana.

    La ciruxía robótica xuniráse a la inversión en tecnoloxíes que yá ta en cursu nel sistema sanitariu públicu y que va movilizar más de 24 millones hasta finales de 2023. D’ellos, 12,9 correspuenden al Plan Inveat, a los que’l Principáu va añedir 2,7 millones para nuevos equipos y 8,7 más para obres rellacionaes con ellos. En total, van anovase cinco aparatos (trés TAC y dos resonancies) y van adquirise otros 12 que van ampliar la capacidá diagnóstica y terapéutica en seis centros.

  • El HUCA realiza ún de los primeros tratamientos endovasculares d’un arcu aórticu completu del estáu

    El HUCA realiza ún de los primeros tratamientos endovasculares d’un arcu aórticu completu del estáu

    El Serviciu de Angiología, Ciruxía Vascular y Endovascular del Hospital Universitariu Central d’Asturies (HUCA) enllantó per primer vegada un nuevu dispositivu de triple caña pa l’arcu aórticu, que dexa’l riegu sanguíneu del celebru y de los miembros cimeros cuando se produz un aneurisma o una disección aórtica aguda. La intervención realizada en mayu ye una de les primeres efectuaes nel estáu. Hasta entós namás podía encetase esta intervención con una endoprótesis de doble caña que precisaba la realización d’un bypass pa revascularizar l’arteria subclavia esquierda.

    Esti dispositivu, que se diseña y fabrica a midida pa cada paciente, dexa un abordaxe endovascular (dende dientro de la estructura vascular) mínimamente invasivu, lo que favorez el posoperativu. Amás, como nun se trata d’una ciruxía abierta, puede acelerar la recuperación.

    El cuerpu principal del dispositivu introduzse al traviés de la vería pa, de siguío, esplegase nel arcu aórticu. Les otres dos cañes pa les arteries carótidas enllántense al traviés de dambos llaos del pescuezu y la tercer caña, pa l’arteria subclavia esquierda, introdúcese poles arteries de los brazos, anque tamién quepe la posibilidá de faelo vía inguinal. D’esta miente, reconstrúyese tola anatomía del arcu aórticu del paciente por aciu l’allugamientu de la endoprótesis ensin necesidá de realizar nenguna ciruxía complementaria de revascularización invasiva.

    La esperiencia asturiana va presentar nes xornaes Complex aorta symposium Uviéu (CASO) que, a partir de mañana y hasta el vienres, va axuntar nel HUCA a un centenar d’especialistes nacionales nel tratamientu de l’aorta y va cuntar con una amplia representación d’espertos europeos. Na xunta tamién va participar el profesor Michael Jacobs Maastricht, una de les máximes autoridaes mundiales nesti tipu de ciruxía.

    L’Hospital Universitariu Central d’Asturies foi’l primer hospital del país n’enllantar les endoprótesis con cañes d’arcu aórtico n’ochobre de 2017. Dende entós los especialistes intervinieron a 16 pacientes por aciu esta técnica, de la que tutelaron los primeros implantes n’otros hospitales d’España y Portugal, según esplicó’l xefe de serviciu de Ciruxía Vascular, Manuel Alonso.

    Anguaño, l’equipu de profesionales médicos del HUCA ufierta tratamientu, tantu abiertu como endovascular, a tol espectru de patoloxía aórtica complexa, por aciu un enfoque nel que, amás de tar arreyaos los servicios d’Anestesia, Ciruxía Cardiaca y Ciruxía Vascular, collaboren de los servicios de Radioloxía y Neurofisiología.

  • Dos persones mancaes nun accidente de tráficu n’Uviéu

    Dos persones mancaes nun accidente de tráficu n’Uviéu

    Dos persones resultaron mancaes nun accidente de tráficu nel que se vieron implicaos dos turismos na A-66, al altor del puntu quilométricu 24,200, en sentido Llión, Uviéu.

    Según los datos facilitaos pol Serviciu d’Atención Médica Urxente (SAMU) los mancaos, un varón de 54 años y una muyer de 50, fueron treslladaos con pronósticu reserváu, por cuenta de más pruebes, al Hospital Universitariu Central d’Asturies (HUCA) n’Uviéu. Hasta’l llugar movióse l’equipu médicu d’una UVI-móvil y dos ambulancies de soporte vital básicu. Los mancaos fueron sacupaos nestes.

    Los afectaos tuvieron que ser escarcelaos del interior d’unu de los coches por efectivos de Bomberos del Serviciu d’Emerxencies del Principáu d’Asturies (SEPA) con base nel parque de La Morgal. El turismu taba entornáu. Los bomberos dieron en retirar la puerta del conductor y a quitar la pilastra central. En inmovilizándolos con collarín estrayer pol llateral con ayuda de la tabla de rescate.

  • Salú confirma’l primer casu n’Asturies de la variante Ómicron silenciosa

    Salú confirma’l primer casu n’Asturies de la variante Ómicron silenciosa

    La Conseyería de Salú confirmó güei el primer casu de variante Ómicron silenciosa n’Asturies. Trátase d’una muyer d’ente 40 y 50 años, non vacunada, que presentó síntomes leves el 19 de xineru de los que yá ta restablecida.

    La sección de Viroloxía del Llaboratoriu de Microbioloxía del Hospital Universitariu Central d’Asturies (HUCA) detectó esta variante nuna amuesa d’una PCR positiva de la paciente, que nun presentaba les mutaciones habituales de la Ómicron clásica.

    Esti tipu de muestreo aleatoriu ye habitual del procedimientu de vixilancia y control de la covid pa buscar variantes y llinaxes del SARS-COV-2, polo que nun se refuga que se diagnostiquen más casos de la conocida como Ómicron sigilosa (BA.2), que se denomina asina al pasar desapercibida porque nun tien tantes mutaciones como la variante clásica (BA.1).

    La Ómicron silenciosa caracterízase epidemiológicamente por tener una mayor transmisibilidá y ser una infección de calter leve, según esplicó’l coordinador de area asistencial de la Dirección Xeneral de Salú Pública, Mario Margolles.

  • L’HUCA, ún de los primeros centros sanitarios del país n’implantar la ciruxía xinecolóxica de puertu únicu vaxinal

    L’HUCA, ún de los primeros centros sanitarios del país n’implantar la ciruxía xinecolóxica de puertu únicu vaxinal

    L’Hospital Universitariu Central d’Asturies (HUCA) ye ún de los primeros centros del país n’implantar la ciruxía vaxinal de puertu únicu, una intervención mínimamente invasiva que nun precisa incisiones pa llegar a la cavidá abdominal de les pacientes.

    Esta técnica denominada vNOTES (Natural orifice transluminal endoscopic surgery) ameyora la recuperación de les muyeres que se someten a una intervención xinecolóxica, al menguar el dolor postoperatoriu amás de posibles complicaciones vinculaes a la ciruxía abdominal convencional. Trátase d’una alternativa quirúrxica segura, qu’amenorga la necesidá de cuidaos y la estancia hospitalaria.

    La intervención consiste n’acceder a la cavidá abdominal al traviés de la natura. Pa eso, asítiase un dispositivu especial que dexa a los especialistes introducir l’instrumental necesariu, ensin falta d’usar trocares, lo qu’evita que queden repuelgos nel vientre de les pacientes. La técnica pue usase nes más de les patoloxíes xinecolóxiques benignes y en delles malignes, y ta indicada sobre manera en muyeres con riesgu de complicaciones na ciruxía convencional, como les que presenten sobrepesu.

    El Serviciu de Xinecoloxía y Obstetricia del HUCA realizó pela primer vez esta intervención novedosa a mediaos d’ochobre a una paciente con una lesión premaligna uterina y con comorbilidá asociada que quitaba de facer una intervención convencional. Les xinecólogues Beatriz Duplá y Soledad Fidalgo practicaron una histerectomía total con doble anexectomía, quier dicise, estirparon l’úteru y los ovarios de la muyer con esta técnica novedosa.

    La técnica usóse la primer vez n’animales nel 2004 y ocho años depués, n’humanos.

  • Asturies participa per primera vez nun ensayu clínicu de persones con enfermedá de Huntington

    Asturies participa per primera vez nun ensayu clínicu de persones con enfermedá de Huntington

    La unidá multidisciplinar pa la enfermedá de Huntington del Hospital Universitariu Central d’Asturies (HUCA) participa per primer vez nun ensayu clínicu financiáu pol Institutu de Salú Carlos III con persones portadores d’esta patoloxía neurodexenerativa poco frecuente y complexa. El centru sanitariu va portar una docena de pacientes nos próximos dos años al estudiu doble ciegu sobre la metformina, un antidiabéticu que demostró la so eficacia pa frenar el deterioru que causa esta dolencia n’animales.

    L’Institutu d’Investigación Sanitaria de La Fe (Valencia) llidera la investigación na que participen, amás del hospital de referencia d’Asturies, l’Hospital Xeneral Universitariu d’Elx; los hospitales de San Pablo y Mare de Deu de la Mercè, de Barcelona; y l’Hospital Universitariu de Burgos.

    Les persones con enfermedá de Huntington manifiesten trestornos del movimientu, como corees (movimientos involuntarios abruptos, irregulares y de duración curtia), distonías, alteraciones de la marcha o parkinsonismo; deterioru cognitivu y trestornos psiquiátricos (depresión y psicosis). La edá media a la qu’apaecen estos síntomes asítiase alredor a los 50 años.

    N’Asturies, envalórase que más de 150 persones tienen la mutación que provoca la enfermedá, que la so prevalencia ye de 58 casos por millón d’habitantes.

    N’Europa, más de 40.000 persones sufren esta patoloxía y calcúlase que 160.000 tán en riesgu de desenvolvela, yá que son portadores de la mutación de la proteína denominada huntingtina (encargada del tresporte y la comunicación dientro de les célules nervioses del celebru) qu’anicia esta patoloxía. Esta mutación ye autosómica dominante, esto ye, que la metá de los descendientes tienen la posibilidá d’heredala.

    Conseyu xenéticu

    La unidá multidisciplinar d’enfermedá de Huntington del HUCA, creada en marzu, ta ellaborando un rexistru epidemiolóxicu d’esta patoloxía, que va permitir la participación n’ensayos clínicos ya investigaciones. Amás, centraliza l’atención de pacientes sintomáticos y el diagnósticu precoz de los portadores asintomáticos. Al tiempu, apurre a estos últimos conseyu xenéticu y accesu a técniques de selección d’embriones, con cuenta de los sos descendientes nun seyan portadores de la mutación.

    L’equipu ta integráu por profesionales de neuroloxía, psiquiatría, neuropsicoloxía y enfermería, y recibe el sofitu de los servicios de xenética, rehabilitación, nutrición, trabayu social y llogopedia, al repercutir esta patoloxía na calidá de vida de pacientes y families, amás de causar un gran impactu sociosanitariu.

    Nuna primer consulta y nuna mañana, los profesionales realicen les valoraciones neurolóxica, psiquiátrica y neuropsicológica de los pacientes, tres la qu’ellaboren un informe médicu colos encamientos terapéuticos, farmacolóxicos y non farmacolóxicos.

    Nel casu de los pacientes sintomáticos, sométese-yos a siguimientu trimestral o semestral, en función del so estáu; ente que los portadores asintomáticos tienen una revisión añal con valoración neurolóxica, neuropsicolóxica y psiquiátrica.

    La unidá protocolizó la posibilidá de consulta virtual colaborativa col médicu de familia de les persones trataes, de manera qu’haya una continuidá asistencial qu’evite desplazamientos innecesarios al hospital. Amás, habilitóse una consulta telefónica n’horariu de 8 a 15 hores y un corréu electrónicu p’atender duldes.

    Dende la puesta en marcha d’esta unidá, incluyéronse trés pacientes asturianos con esta patoloxía nel rexistru internacional ENROLL-HD, una plataforma d’investigación clínica integrada por más de 23.000 afectaos de tol mundu. Esti rexistru inclúi un bancu de datos y muestres biolóxiques que permite la selección de participantes n’ensayos clínicos.

  • El Sespa aumenta un 23 % l’actividá quirúrxica nos primeros nueve meses del añu

    El Sespa aumenta un 23 % l’actividá quirúrxica nos primeros nueve meses del añu

    L’actividá quirúrxica aumentó n’Asturies un 23 % nos primeros nueve meses del añu, al pasar de 42.733 intervenciones a 52.664, lo que supón 9.931 más que nel mesmu periodu del 2020. En setiembre, cuando se rexístren davezu peores cifres, el númberu d’operaciones medró un 9 % al respective del mesmu mes del exerciciu anterior. Al zarrar setiembre contabilizábense 21.147 ciruxíes pendientes, según l’últimu informe publicáu esta tarde pol Serviciu de Salú del Principáu (Sespa).

    A la medría de l’actividá ordinaria súmase’l plan de choque p’amenorgar les llistes d’espera quirúrxica. Asina, dende’l 20 de setiembre, realizáronse 267 intervenciones n’horariu de tarde, polo que’l Sespa calcula qu’a partir de payares va notase la mengua del númberu de pacientes qu’aguarden una operación.

    Los profesionales del Sespa atendieron 126.740 consultes esternes el mes pasáu, polo que menguó en siete díes la espera media estructural en comparanza col mesmu mes del 2020 y asitióse en 70. Esta mengua ye destacable sobre manera nes especialidaes de Traumatoloxía y Dermatoloxía, que los sos pacientes aguarden, de media, 41 y 24 díes menos, respectivamente.

    Otra manera, tamién xubió’l númberu de pruebes de diagnósticu al respective d’agostu. De resultes d’esó, menguó la demoranza media d’espera pa una colonoscopia, mamografía y ecografía, y caltúvose pal TAC en referencia a setiembre del 2020.

  • Salú confirma dos nuevos casos de coronavirus importaos

    Salú confirma dos nuevos casos de coronavirus importaos

    La Conseyería de Salú confirmó esti xueves dos nuevos positivos por coronavirus d’una pareya procedente de Barcelona. El varón, que ta ingresáu nel Hospital Universitariu Central d’Asturies (HUCA), foi atendíu primeramente nel Hospital Carmen y Severo Ochoa de Cangas, al presentar síntomes compatibles cola covid-19. El Llaboratoriu de Viroloxía del HUCA confirmó esti positivu y el de la so pareya, que nun manifestó síntomes. La muyer permanez n’aislamientu.

    Dempués de que n’Asturies nun se rexistrara nengún casu mientres 25 díes tres el fin del estáu d’alarma, nesti mes de xunetu confirmáronse 17 casos positivos. Nestos momentos ta realizándose el siguimientu a 73 contactos estrechos, ente los que figuren allegaos d’esos 17 positivos, y tamién d’otros casos que nun tán rexistraos n’Asturies. Les autoridaes sanitaries recuerden que l’usu del mázcaru pa mayores de 6 años ye obligatoriu nes víes públiques, espacios al aire llibre y en cualquier espaciu zarráu d’usu públicu o que s’atope abiertu al públicu. Tamién nel tresporte públicu y priváu, nesti últimu casu, cuando los ocupantes nun seyan convivientes.

    Tamién aportunen na importancia de cumplir colos encamientos de seguridá, como la llavadura frecuente de manos y el caltenimientu de la distancia interpersonal. Amás, el Gobiernu asturianu pide a los ciudadanos que, énte síntomes compatibles col coronavirus, llamen per teléfonu al so centru de salú o al 112 pa recibir indicaciones precises del personal sanitario.

  • Mancáu grave en volcando col quad en Bimenes

    Mancáu grave en volcando col quad en Bimenes

    Un home resultó mancáu de considerancia n’entornando col quad que conducía. Los fechos tuvieron llugar, en circunstancies que se desconocen, nuna pista forestal ente les localidaes de Navagua y Fayacaba, en Bimenes. L’afectáu, un varón de 59 años, foi evacuáu al Hospital Universitariu Central d’Asturies (HUCA), n’Uviéu, con traumatismu torácicu de pronósticu reserváu, por cuenta de más pruebes y hasta nueva valoración media.

    El mancáu foi treslladáu dende’l llugar del accidente, ensin accesu p’ambulancia, hasta’l so alcuentru colos servicios sanitarios inmovilizáu, nuna tabla de rescate. El Centru de Coordinación d’Emerxencies del 112 Asturies recibió l’avisu a les 16.03 hores. Na llamada señalaben que una persona resultara mancada n’entornando’l quad que conducía entre Fayacaba y Melendreros. Atopábase nuna pista forestal ensin accesu rodáu pa una ambulancia.

    La Sala 112 del SEPA pasó l’avisu al SAMU que solicitó la intervención del helicópteru medicalizáu de Bomberos d’Asturies y del Grupu de Rescate del que forma parte un médicu rescatador. Daes les condiciones meteorolóxiques na zona l’equipu nun podía intervenir. Paralelamente yá se movilizara, per tierra, una dotación de bomberos. A les 17.16 hores los bomberos informen que yá tán baxando col mancáu nel touterrén al alcuentru del equipu sanitariu.