Les fiestes de prau, esi bien del patrimoniu popular d’Asturies, sufren agora l’ataque de la hostelería. Concretamente de l’Asociación Asturias de Noche y lo fai porque les fiestes de prau son consideraes «competencia desleal» polos propietarios de pubs y discotecas, que esigen pa elles «una regulación». Asina lo reflexa’l so comunicáu, onde faen reconocencia del «valor cultural y la tradición d’estas celebraciones», pero consideren «esencial establecer directrices que garanticen el respetu a los horarios y eviten la competencia desleal qu’afecta al sector del ociu nocturnu llegalmente establecío».
La protesta vien dada pol fechu de que «les fiestes de prau s’allarguen más allá de los horarios permitíos pa los bares con llicencia de música amplificada y discoteques», daqué que consideren alarmante. Esa condición, creen «nun afecta namás a la calidad de vida de los residentes, sinón que tamién afuega a los establecimientos llegales, dificultando entá más la so actividá comercial».
Magar de que la propuesta siga o non p’alantre, el comunicáu choca escontra el sentir popular pa coles fiestes de prau. Veremos si la gaita, el tambor y la sidra siguen tando permitíos si se-yos aplica una normativa asemeyada a la de los hosteleros.
