La temporada d’esquí nes estaciones asturianes va prollongase dende’l 2 d’avientu de 2024 hasta’l 20 d’abril de 2025, siempre que les condiciones meteorolóxiques lo dexen.
Nesti sentíu, la Conseyería de Cultura, Política Llingüística y Deporte caltién los Díes del Esquiador y la Esquiadora, que se van celebrar en temporada baxa: nos miércoles en Fontes d’Iviernu y los vienres en Valgrande-Payares. Nestes feches, el forfait va costar 15 y 16 euros, respectivamente.
Per otra parte, nel abonu de día de temporada alta caltiense con descuentos pa grupos en función del númberu de persones. Amás, el programa de la Selmana Blanca va arrancar, en función de les condiciones meteorolóxiques, el 10 d’avientu. Inclúi un forfait especial gratuitu y tamién se prevén descuentos pa centrales de reserves y axencias de viaxes.
Hai unos meses, el Conseyu de Gobiernu aprobó los precios públicos pa les estaciones asturianes con una clara apuesta pol caltenimientu xeneralizáu de los precios pa billetes, bonos y forfaits, col fin de facilitar l’accesu a los deportes de nieve a la ciudadanía.
Ente las tarifes aprobaes, amás de les citaes, alcuéntrase l’abonu Cuatro díes, cuatro estaciones, que dexa emplegar les instalaciones de los dos equipamientos asturianos y de les estaciones lleoneses de San Isidro y L.leitariegos. Nesti casu, el preciu pa los cuatro díes establezse en 55 euros pa menores d’edá y en 70 euros pa persones adultes.
Esti abonu conxuntu, que lleva delles temporaes en marcha, ye frutu de la collaboración ente l’Executivu autonómicu y la Diputación de Lleón. D’igual manera que’l conveniu robláu de recién ente les dos alministraciones y que va permitir electrificar la Estación Ivernal Fontes d’Iviernu nos meses próximos.
