L’asociación de vecinos San Emiliano de Vega sigue cola llucha escontra los sondeos illegales na so parroquia y critica los modos de la paralización. «La intervención del conceyu realízase 20 díes dempués de treslladar dende la AVV San Emiliano de Vega la denuncia con fotografíes, documentación y allugamientu del sondéu illegal; cuatro díes dempués rexístrase de manera oficial l’escritu de denuncia», argumenten. La orde de paralización llega xusto cuando los operarios que taben trabayando na perforación aseguren que “prácticamente yá acabamos”. Mientres les obres, personal de la empresa beneficiaria se ría de que “nun pasaba nada por nun tener llicencia pa esi sondéu porque’l conceyu nun va allegar hasta que terminaren”.
«Nesti sentíu, reulta impensable qu’haya tanta lentitú», denuncien. «Disciplina urbanística cuando quier, resuelve en menos d’una hora y manda a la policía municipal d’urbanismu cola orde de parar la intervención o para echar voz de y faer que se cumpla», añeden.
L’enfadu de los vecinos de Vega xenérase porque’l conceyu tardó catorce díes en dicir a miembros de l’asociación que “too paez indicar que la parcela nun ye la indicada”. «Catorce díes -tiempu que’l conceyal d’Urbanismu califica de ‘inmediatez’- da mano a pensar que nun nos tábamos equivocando cuando dende’l primer momentu teníen tola documentación necesaria para sabelo con solo lleer los arquivos que los unviamos», critiquen los vecinos.
«Dichu d’una manera simple, nin el cascoxu más lentu tardara tantu en dir dende Paniceres hasta’l Conceyu y tornar dende’l Serviciu d’Urbanismu hasta Vega cola correspondiente paralización de la obra illegal sobro la concha», rematen.
