Les Caseríes llamenta l’olvidu de la zona rural de Xixón

La entidá celebró'l miércoles la so primer asamblea dempués del plenu d'investidura

0
96
Les Caseríes llamenta l'olvidu de la zona rural de Xixón
Un momentu del conceyu del miércoles. / Les Caseríes

La Federación d’Asociaciones de Vecinos Rurales Les Caseríes celebró na tarde del miércoles la so primer asamblea dempués del plenu de investidura del pasáu sábadu. Nel alcuentru asociativu Manuel González-Posada, presidente de la federación, amosó’l so malestar pola nula referencia a la zona rural de Xixón per parte de los voceros de los grupos políticos municipales.

El presidente de Les Caseríes apuntó que «nel plenu municipal hubo intervenciones de siete partíos políticos distintos. Caún d’ellos cuntó con diez minutos d’intervención nos que nun hubo la más mínima referencia a la zona rural de Xixón. Esto ye, en 70 minutos de discursos nengún voceru de nengún partíu políticu alcordóse de la zona rural. Resultó decepcionante comprobar que nun somos relevantes pa nengún partíu, cuando fai unes selmanes aconceyaron con nós”.

Manuel González-Posada, que tuvo esti sábadu presente nel Salón de Plenos, añedió que «solo hubo referencies a la ciudá de Xixón y a los sos barrios, como si’l restu del conceyu y les sos parroquies nun tuviéramos problemes y nun esistiéramos. Paez que los partíos políticos namás s’alcuerden de la zona rural cuando precisen votos o terrén”.

«Nesta llexislatura qu’empieza queremos que la zona rural tenga relevancia na acción de gobiernu, que s’escuchen les nueses demandes y solucionen los nuesos problemes» apuntó González-Posada. Dientro d’esta primer asamblea realizóse tamién un analís sobre’l Plan Integral de Borrafes.