El Día de les Lletres Asturianes, 3 de mayu, ye tamién el Día del Llibru asturianu nes llibreríes d’Asturies. Con motivu d’esta fecha marcada cada añu nel calendariu, les llibreríes asturianes ufierten un 10% de descuentu nos llibros que se merquen n’asturianu o eonaviegu. Amás d’ello, va regalase a cada persona que merque un llibru va llevar de regalu la obra «‘Conceyu Bable. El frutu y la semiente». Trátase d’un llibru n’homenaxe al llabor de l’asociación asturianista que marcó los finxos de l’Asturies d’anguaño.
Nel llibru, coordináu pol escritor y periodista Francisco Álvarez, intervienen hasta 12 persones que, dende perspectives estremaes, analicen el desenvolvimientu y la relevancia que Conceyu Bable tuvo na hestoria recién d’Asturies. L’exemplar recueye cómo yera la vida política, la sociedá, l’asturianismu, el periodismu, la música y l’aportación de les muyeres a l’asociación.
D’otra banda, tamién se publica otru volume n’eonaviegu, que va regalase en delles llibreríes: ‘Dedín, dedín…’, de Belén Rico Prieto.
En total, son 53 les llibreríes participantes, va repartise’l llibru-regalu «Conceyu Bable: el frutu y la semiente» pa los llibros n’asturianu y el llibru infantil «Dedín, dedín…» de Belén Rico Prieto pa los llibros n’eonaviegu.
