El Gobiernu d’Asturies va estrenar el próximu martes, día 21 de mayu, coincidiendo cola puesta en marcha de los nuevos trenes AVE ente Asturies y Madrid, el serviciu Llanzadera Alta Velocidá pa facilitar la llegada de los viaxeros a les estaciones de l’alta velocidá dende distintos puntos. Nuna primer fase, van ponese nueves rutes dende Avilés y el valle del Nalón hasta Uviéu y Mieres del Camín. Estes llinies van tar incluyíes dientro de la plataforma de movilidá CONECTA. Esti nuevu serviciu va dexar aportar n’autobús a les estaciones de tren pa dar cobertoria a aquelles rutes d’alta velocidá qu’hasta agora nun disponíen d’una combinación posible cola ufierta del Consorciu del Tresporte d’Asturies (CTA) o les cercaníes ferroviaries de Renfe. Sicasí, nun van ser de baldre, anque’l gobiernu nun especifica’l so preciu.
► Avilés
Asina, Avilés va cuntar dende’l próximu martes con una nueva llinia exprés escontra Uviéu, que va salir a les 5:30 hores de la estación d’autobuses y va aportar a la capital asturiana a les 6:00 hores. D’esta miente, les persones usuaries de la ruta van poder tomar el primer tren de la mañana, que va salir d’Uviéu a les 6:30. Esta llanzadera va tar operativa de llunes a vienres. El restu d’horarios de l’alta velocidá cunten yá con combinaciones accesibles na actual ufierta del CTA y cercaníes ferroviaries.
► Valle del Nalón
Nel casu del valle del Nalón, van entrar en funcionamientu dos nueves danzaderes. La primera d’elles va xunir La Pola Llaviana (Luis Alonso, 5) y Uviéu, con paraes en L’Entregu (Avda. La Vega, 51) y La Felguera (Estación d’autobuses), pa tomar el primer tren de la mañana. La salida ta prevista a les 5.15 hores y la llegada, a les 6:05.
La segunda llanzadera va partir dende La Pola Llaviana y va comunicar con Mieres del Camín, incluyendo paraes en L’Entregu, La Felguera, estación d’autobuses de Mieres del Camín y finalmente, la estación de tren.
Esta nueva ruta llanzadera Alta Velocidá, amás de conectar coles salíes y llegaes de tolos servicios d’alta velocidá con parada nel conceyu de Mieres, va dexar, gracies a la parada na estación d’autobuses y la conexón directa per autopista, ameyorar la movilidá en tresporte públicu ente los valles del Nalón y el Caudal. La ruta va tener seis frecuencies diaries: trés pa llegar a la estación de Renfe de Mieres del Camín a les 11:52, les 15:52 y les 21:47 hores; y otres trés pa dar serviciu a los viaxeros que vuelvan de Madrid y que van salir a diariu a les 13:50, 18:15 y 21:55 hores.
Segunda fase
El Gobiernu d’Asturies yá trabaya na segunda fase d’implantación de llanzadera Alta Velocidá coordinando horarios y llinies que faciliten l’accesu a l’alta velocidá dende les ales y otros puntos del centru d’Asturies.
La previsión ye habilitar les conexones necesaries ente’l suroccidente y Uviéu y tamién dende’l noroccidente a la capital y a Avilés, nel momentu que entre en funcionamientu’l serviciu d’alta velocidá que va llegar a la capital avilesina.
Asturies peracaba, amás, rutes dende l’oriente a Uviéu y Mieres del Camín y conexones específiques ente Ayer y L.lena.
El CTA tamién impulsa los desenvolvimientos tecnolóxicos necesarios pa dexar que la plataforma CONECTA pueda incorporar la gratuidá d’un primer trayectu na rede del CTA a quien merquen un billete d’alta velocidá, igual que yá asocede nel casu de les cercaníes ferroviaries.
