La vida de la militante histórica asturiana, Anita Sirgo, remató ayeri a los 93 años d’edá. Lo facía 5 díes enantes de cumplir los 94 años y unos meses dempués de que Lada, la llocalidá onde residía, rindiera homenaxe a la so figura poniendo’l so nome al centru social.
Referente del Partíu Comunista y de la izquierda, la llangreana tuvo un papel destacáu mientres la fuelgona de los mineros. Organizó a les muyeres cuando los ánimos faltaben ente los trabayadores. Llegó a zarrase con 40 muyeres más más na catedral d’Uviéu y col sofitu del obispu auxiliar.
Vivió dos años nel esiliu en Francia, xunto con dirixentes del Partíu Comunista como Santiago Carrillo, y ellí aprendió a lleer y escribir. Pero volvió a Asturies. La muerte del so home coincidió cola etapa de la Transición y la llegalización del so partíu, al que foi siempres fiel. Militó hasta los sos últimos díes, participando en manifestaciones sindicales y tamién sumándose a los actos de reivindicación feminista como’l Tren de la Llibertá o les Marches pola dignidá.
A los 93 años, Anita Sirgo dixo adiós a la vida, pero siempres amosando una dignidá na so llucha. Y asina marcho, ensin dexar nunca de llau la llucha polos derechos de les muyeres y de les trabayadores.
