Antonio Trevín Lombán, l’home que foi maestru, presidente d’Asturies, delegáu del Gobiernu, conceyal y alcalde que dio forma a la so Llanes d’adopción, finó esti miércoles a los 69 años na so casa de Llanes tres meses lluchando contra un cáncer de páncrees. En xineru’l presidente Adrián Barbón anunció que se-y apurriría’l máximu galardón institucional de la comunidá, la Medaya d’Asturies, pola so entrega vital al serviciu públicu».
Dende tolos muérganos políticos vienen dándose pesames y reconocencies a la so figura, especialmente na FSA, de la que formaba parte. “Güei los y les socialistes d’Asturies lloramos la perda d’unu de los nuesos, d’un socialista comprometíu, d’una persona con fondos valores de xusticia, solidaridá ya igualdá, de daquién que trabayó mientres tola so vida con tenacidá, seriedá y sentíu de serviciu públicu”, señala’l secretariu d’Organización de la FSA-PSOE, Luis Ramón Fernández Huerga.
Pela so parte, dende FORO Asturies, l’alcadesa de Xixón Carmen Moriyón llamentó «fondamente’l fallecimientu del presidente Antonio Trevín, a quien aínda-y quedaba muncha vida per delantre. La so figura forma, de xuru, parte intrínseca de la política asturiana».
Asociaciones como Iniciativa pol Asturianu tamién amosaron el so pesar, destacando que’l presidente Trevín foi ún de los primeros dirixentes de la FSA-PSOE que, a mediaos de los noventa, apostó claramente pola oficialidá. Asinamesmo, mostró siempres una defensa del patrimoniu llingüísticu, reconociendo la difícil situación del idioma pola perda de falantes. Foi de los primeros conceyales en xurar el so cargu n’asturianu na corporación llanisca. L’ex alcalde de Llanes y ex presidente del Gobiernu asturianu recordaba tamién nos debates sobre esta cuestión y n’entrevistes que la previsión constitucional sobre les llingües ye mui clara. Siempres insistía nel mandatu sobre les llingües que recueye la Carta Magna: “La riqueza de las distintas modalidades lingüísticas de España es un patrimonio cultural que será objeto de especial respeto y protección”. Trevín trató siempres de quitar prexuicios sobre la oficialidá dientro del so partíu y tamién dende la sociedá civil. Collaboró como patronu de la Fundación Caveda y Nava, coleutivu apartidista que, demientres una década, dedicóse a consiguir nuevos consensos sobre la oficialidá de les llingües propies.
