Primer fin de selmana d’estáu d’alarma: 60 persones y 30 locales sancionaos

Salir a la cai ensin motivu sanciónase con cuantíes que pueden superar los 3.000 euros

0
670
Policía llocal Xixón
Vehículos de la Policía Llocal de Xixón. / Archivu

La Policía Local de Xixón propunxo pa sanción, a lo llargo d’esta fin de selmana, a un total de 60 persones y 30 establecimientos. El motivu nun foi otru que l’incumplimientu de les ordes de zarru y confinamientu nes cases. Esta medida, d’obligáu cumplimientu, ta recoyida nel estáu d’alarma decretáu a nivel nacional, pa frenar la espansión del nuevu coronavirus.

Los coches patrulla alviertieron mientres la fin de selmana al traviés de la megafonía y personalmente de la obligación de confinamientu. Sicasí, los axentes tuvieron qu’intervenir nuna trentena de locales d’hostelería, chigres, sidreríes y vinateríes, por permanecer abiertos y negase a cerrar. En dellos casos tuvieron los axentes tuvieron que clausurar hasta en trés causes dichos establecimientos.

Amás, y a pesar de los repitíos avisos realizaos, hasta sesenta persones fueron denunciaes dende ayeri por atopase na vía pública ensin motivu. Delles fueron sosprendíes tomando’l sol nes sableres, xugando al fútbol nos parques o pasiando pol Muru. Esti tipu de conductes tán siendo sancionaes con cuantíes que pueden superar los 3.000 euros.