Facebook Instagram Twitter
Entamu Blogue Páxina 4

Izquierda Xunida denuncia la eliminación del asturianu na rotulación d’EMTUSA

Por
xixonaldia
-
0

El conceyal d’Izquierda Xunida, Alejandro Farpón, denunció la esistencia d’una instrucción directa per parte del conceyal de Tráficu, el forista Pelayo Barcia, pa que la rotulación gráfica d’EMTUSA se realice esclusivamente en castellanu. Esta midida afectaría a los nuevos autobuses que la empresa municipal incorpore a la so flota.

Farpón señala que se trata d’una “midida arbitraria, ensin rigor, contraria al trabayu coordináu que realiza la Oficina de Normalización Llingüística con otros departamentos municipales pa la promoción y usu del asturianu. Nesti casu, EMTUSA lleva años usando una rotulación billingüe ensin que supunxera problema dalgunu pa la ciudadanía, nin fuera motivu de debate o quexes”. Insiste’l conceyal en que “el sellu de la conceyalía de Barcia ye xenerar problemes onde nun los hai, pudiendo afirmar que cada midida adoptada pola conceyalía de Tráficu nesti mandatu supón un retrocesu pa Xixón”.

Dende Izquierda Xunida anuncien que presentarán una iniciativa pa que la rotulación gráfica de la empresa pública de tresporte urbanu vuelva al formatu billingüe, en castellanu y asturianu. Alejandro Farpón entrúgase “si VOX sumó un nuevu conceyal nel Gobiernu llocal”, recordando “los votos discrepantes de Barcia cola so formación énte’l debate sobre la prohibición del burka n’espacios municipales, el negacionismu climáticu pa nun desenvolver la zona de baxes emisiones o derogar la ordenanza de Movilidá Sostenible, a lo que se suma agora enarbolando la bandera contra l’usu del asturianu”.

El gobiernu asturianu reitera a Tresportes la solicitú de suspensión del peaxe del Güerna

Por
xixonaldia
-
0

El Gobiernu d’Asturies unvió una nueva comunicación al Ministeriu de Tresportes y Movilidá Sostenible na que reitera formalmente la solicitú de suspensión temporal del peaxe de l’autopista del Güerna (AP-66), énte les afecciones acreditaes a la movilidá derivaes de les obres n’execución y de les llendaciones recurrentes na rede viaria alternativa.

Esta nueva reclamación da continuidá a la comunicación unviada al ministeriu’l pasáu 5 de febreru y a otres previes, treslladaes nos últimos meses, cuyos argumentos se reiteren íntegramente nel nuevu escritu.

El gobiernu insiste en que l’AP-66 atópase afectada de manera simultánea y prolongada poles obres de modernización de los túneles del Güerna y poles actuaciones d’emerxencia y estabilización del argayu rexistráu en payares de 2024, circunstancies que supunxeron amenorgamientos de carril, circulación por calzada contraria, estrechamientos y llendaciones de velocidá.

Según los rexistros oficiales de la Dirección Xeneral de Tráficu, estes intervenciones xeneraron episodios reiteraos de circulación irregular, retenciones prolongaes, velocidaes mui amenorgaes y aumentos significativos nos tiempos de percorríu, con impactu direutu nel nivel de serviciu de la infraestructura.

A esta situación súmense les llendaciones severes na rede alternativa gratuita, especialmente na N-630 al so pasu pol puertu de Payares, onde los temporales de ñeve provocaron restricciones al tráficu pesáu, esixencia de cadenes o neumáticos d’iviernu y zarramientos puntuales.

Amás, el gobiernu alude nesta nueva comunicación al desprendimientu rexistráu la selmana pasada na N-630 nel entornu del puertu de Payares, que obligó a establecer un pasu alternativu reguláu y a restrinxir la circulación mientres se retiraba’l material. Esta incidencia xeneró retenciones significatives y volvió llendar la capacidá operativa de la principal vía alternativa gratuita.

El Gobiernu d’Asturies dedica’l 8M a reivindicar los derechos de les muyeres col lema ‘Igualdá, motor de la democracia’

Por
xixonaldia
-
0

El Gobiernu d’Asturies dedicará’l 8M, Día Internacional de la Muyer, a reivindicar los drechos de les muyeres con una programación amplia y diversa baxo’l lema: Igualdá, motor de la democracia. La vicepresidenta, Gimena Llamedo, presidió güei la xunta del Conseyu Asturianu de la Muyer, na que se presentó’l cartelu y el programa, y destacó que “la igualdá ente muyeres y homes ye una conquista colectiva sostenida pola determinación y la valentía de millones de muyeres”. “Ensin igualdá nun esiste democracia, por eso Asturies va siguir avanzando, pasu ente pasu, escontra una sociedá más xusta, llibre ya igualitaria”, garantizó.

L’actu institucional va tener llugar el sábadu 7 de marzu, a les 12:00 hores, nel Muséu Marítimu de Lluanco, en Gozón, y va contar cola intervención del presidente d’Asturies, Adrián Barbón.

L’axenda diseñada pol Gobiernu d’Asturies con motivu del 8M abarca dende finales de febreru hasta abril y combina reflexón, sensibilización, cultura, deporte y reconocimientu institucional.

Ente los hitos de la programación destaca la presentación del documental (In)visible, dirixíu por Estela Cubilla, que busca visibilizar la violencia de xéneru y sexual dende una doble perspectiva: per un llau, recueye esperiencies de la mocedá; per otru, incorpora un diálogu interxeneracional con persones espertes n’igualdá qu’arriquez el debate públicu. L’estrenu va tener llugar el 5 de marzu na sala Paraninfo de La Llaboral, en Xixón, y la pieza va emitise’l 11 de marzu na Televisión del Principáu d’Asturies (TPA).

La programación refuerza, amás, l’impulsu a la coeducación cola presentación del sellu Centru Coeducador, una distinción del Gobiernu d’Asturies pa colexos ya institutos que destaquen pol so llabor na educación n’igualdá. Nesi marcu va rindise homenaxe a centros y profesoráu pol so trabayu sosteníu como palanca de tresformación social dende les aules.

El capítulu de rellatos y referentes amplíase cola grabación del videu pódcast Construyendo futuru: voces de muyeres que faen territoriu, nel que delles emprendedores que dinamizen el territoriu dende ámbitos y conceyos distintos van compartir les sos esperiencies, retos y aprendizaxes. D’esta manera, va consolidase un espaciu de conversación que pon nel centru’l lideralgu femenín n’Asturies.

La propuesta cultural inclúi la esposición Asturies, muyeres y movimientos, que va contar cola participación de la cantante Marisa Valle Roso. Per otru llau, en collaboración cola Axencia Asturiana de Cooperación Internacional, va celebrase la xornada Drechos de les muyeres: avances, resistencies y desafíos globales, que va contar cola intervención de la xurista Mar Esquembre, presidenta de la Rede Feminista de Derechu Constitucional, pa abordar los desafíos actuales.

Los equipamientos culturales súmense a la conmemoración con actividaes que averen la igualdá al públicu xeneral y a les families. Asina, en La Morgal va celebrase la xornada Muyer y deporte, centrada en visibilizar el lideralgu y la participación de les muyeres nel ámbitu deportivu. El Muséu Arqueolóxicu d’Asturies va acoyer la charra Muyeres na práctica museal: diálogos ente Asturies y América Llatina, con espertes que van analizar la función de les muyeres nos museos y na investigación cultural. Nel Centru d’Arte Rupestre Tito Bustillo va impartise’l taller infantil Grandes muyeres vistes al traviés del collage y el Parque de la Prehistoria de Teberga va ufiertar una visita guiada sobre la representación femenina nel arte paleolíticu. Pela so parte, el Muséu Etnográficu de Grandas de Salime Pepe el Ferreiro va inaugurar la esposición En el umbral del olvido. Fotografíes d’Analía Pello, un proyectu que rescata oficios tradicionales en peligru.

El programa d’actividaes, que combina formación, sensibilización pública, cultura, deporte y reconocimientu institucional, reafirma’l compromisu del Gobiernu del Principáu cola igualdá como política pública sostenida nel tiempu.

L’oxetivu ye consolidar una mirada integral que, amás de celebrar llogros, permita siguir avanzando na reducción de breches y na garantía efectiva de drechos.

Guerra económica

Por
Efrén D'Andrés
-
0

Iniciativa pol Asturianu denuncia l’ausencia del idioma nel estand d’Asturies en FITUR

Por
xixonaldia
-
0

La presencia de la llingua asturiana desapaeció nel estand del Principáu d’Asturies na última edición de la Feria Internacional de Turismu (FITUR). L’asturianu y l’eonaviegu nun s’utilizaron en nengún de los elementos comunicativos, nin siquiera nel llogotipu institucional “Principáu d’Asturies”, que sí figuraba en delles ediciones anteriores de la feria.

Por esti motivu,  delles persones asistentes al eventu turísticu, celebráu recientemente en Madrid, treslladaron una quexa a Iniciativa pol Asturianu. La reclamación foi recibida al traviés del Buzón del Asturianu, un espaciu habilitáu na web de la entidá, pa recoyer felicitaciones, quexes y reclamaciones sobre l’usu del idioma, como ye esti casu.

La presidenta d’Iniciativa pol Asturianu, Arantza Margolles, llamentó esti retrocesu nel usu institucional del idioma nun espaciu de promoción turística, nel que la llingua propia pue desempeñar un papel relevante como elementu diferenciador y como valor añadíu nel mercáu turísticu. Margolles recordó que “otres comunidaes con llingua propia tamién faen promoción turística nel so idioma ensin xenerar esti apueste una merma de visitantes”.

Amás, Margolles apuntó que “l’usu del idioma propiu contribúi a crear una imaxe de marca propia, como demuestren otres comunidaes con llingua propia, como mesmamente ye’l casu de Galicia. La promoción turística del Xacobeo a nivel estatal faise en gallegu, ensin que ello supunxera problemes pa los visitantes nin una perda de pelegrinos”.

L’asociación señala tamién que l’ausencia del asturianu en FITUR nun s’axusta a los criterios llingüísticos sobre l’usu del asturianu y l’eonaviegu na Alministración, aprobaos pol mesmu Gobiernu del Principáu d’Asturies en febreru de 2024. En concreto, recuerden que dichos criterios recueyen, nel so apartáu de Criterios Xenerales de Comunicación, que se debe favorecer la integración del asturianu xunto col castellán nos mensaxes y comunicaciones del sector públicu.

El PSOE pide la constitución urxente del Conseyu de Memoria Democrática tres una nueva concentración fascista n’Héroes del Simancas

Por
xixonaldia
-
0

El PSOE esixe, una vegada más, la constitución del Conseyu de Memoria Democrática. Failo tres una nueva concentración fascista atribuyida a un partíu ultraderechista na escultura Héroes del Simancas. Como defendió la vocera del Grupu Municipal Socialista, Carmen Eva Pérez Ordieres, esti órganu tien, ente otres atribuciones, la d’espublizar los valores democráticos de tolerancia y respetu frente a la connivencia de les ideoloxíes contraries al civismu. “Ye urxente la constitución d’un órganu que sirviría pa promover los valores cívicos frente a les manifestaciones antidemocrátiques como la vivida esta fin de selmana. Ye más necesario que nunca dar cumplimientu a les lleis de memoria democrática énte les meyores de la estrema derecha”, señala.

Pérez Ordieres recordó que’l reglamentu del Conseyu de Memoria Democrática s’aprobó en 2023 pero la llegada de la derecha al Conceyu paralizó la convocatoria. Los socialistes forzaron n’abril del añu pasáu la comparecencia de la conceyala responsable del área, Montserrat López Moro, coles mires de qu’esplicara por qué siguía ensin constituyir l’órganu consultivu, y aseguró entós que se formalizaría enantes de rematar l’añu. La vocera socialista denuncia, poro, que tamos énte un nuevu incumplimientu del gobiernu local, y anunció que volverá preguntar por ello na próxima Comisión de Cultura. “La conceyala de Foro lleva dándonos llargues dende l’entamu del mandatu no que paez un intentu d’aliase colos dogmes de los partíos de dereches colos que tien qu’apautar. El PP y Vox llevaben nel so programa electoral derogar les lleis de Memoria Democrática y, evidentemente, tamién el Conseyu de Memoria Democrática de Xixón. Lo que ta claro ye que Foro ta más allegáu a los postulaos defendíos en Colón que nos que defende la Europa de los derechos y les llibertaes”, añedió.

El PSOE llamenta que precisamente de la mano de Foro la ultraderecha entró a formar parte del gobiernu llocal per primer vegada en periodu democráticu y, de magar, los discursos d’odiu abondaron nel nuesu conceyu. “Frente a ‘Héroes del Simancas’ hubo a lo menos dos concentraciones con espresiones fascistes nos postreros dos años, ensin que’l gobiernu llocal se pronunciara. Esta manifestación esixiría una condena espresa per parte de quien ta al mandu del nuesu Conceyu”, concluyó Pérez Ordieres.

L’apagón que rellumó en California

Por
Martín Peña Alba
-
0

Nel calendariu deportivu mundial, munches feches queden marcaes a fueu. La final de la Champions League europea o los play-offs de la NBA son namás que dalgunes d’elles. Pero ensin dulda una de les que más rescampla ye la Super Bowl, non solo porque define’l campeón de la NFL, sinón tamién pola so vinculación cola cultura musical. Nel descansu de la final de la National Football League actuaron artistes de talla internacional como Michael Jackson, Beyoncé o los mesmos Rolling Stones. Pero la realidá ye que poques actuaciones van recordase d’igual forma que la ufiertada’l pasáu domingo ocho por Benito Antonio Martínez Ocasio, más conocíu como Bad Bunny.

L’actuación del cantante puertorriqueñu empezaba con una escena ambientada nos campos del so país natal, una situación tópica na que los llabradoes o jíbaros recoyíen la collecha no que paecía un llaberintu de cultivos, representando asina una llarga tradición del país al empar que s’amosaba lo que munchos años fuera esclavitú y sufrimientu por aciu d’un colonialismu, del que Bad Bunny yá alvierte nel so caberu discu. La cámara avérase a unu d’ellos que, con una guitarra, dixo “Que rico es ser latino”, una declaración d’autoría del cantante que buscaba asina atentar escontra los prexuicios estadounidenses pa coles persones del sur del continente. Salía entós Benito portando una pelota de fútbol americanu, representativa del eventu. Cantaba «Titi me preguntó», un de los sos cantares más conocíos. Caminando atopóse con vendedores de cocu frío, tacos y piragües, típicos del so llar, hasta llegar a una casina antroxada como una casa tradicional puertorriqueña, que se tresformaría na pieza central del actu.

Ente otros cantares, Bad Bunny cantó sobre’l techu de la morada “Yo perreo sola”, un cantar de 2020 qu’ataca l’actitú misóxina que se suel llevar nesi xéneru musical. Na antoxana de la casina muyeres y homes baillaben y perreaben a lo xole. Ente eses persones atopábense estrelles como les cantantes Cardi B, Karol G o Young Miko y artistes de Hollywood como Pedro Pascal, toos ellos con nacionalidá o ascendencia llatinoamericana.

De sópitu, n’otru puntu del escenariu apaecía una boda y ente los novios surdía una de les figures de la música más importantes de los Estaos Xuníos: Lady Gaga. La estrella neoyorquina cantó parte del so repertoriu sobre una base de salsa característica del últimu álbum de del coneyu malu. Quiciabes esta collaboración ye la que más cafia en comparanza coles demás, yá que ye la única parte del conciertu na que se fala inglés. Podría interpretase como una representación de la unión ente EE. UU. y Llatinoamérica, o a lo menos de los civiles de norte y sur. Teoríes que circulen añeden el factor de que’l color azul del vistíu de la cantante podría ser referencia a la bandera independentista de Puertu Ricu, portada pol protagonista del actu minutos dempués.

La siguiente figura qu’apaeció acompañando al puertorriqueñu foi’l so compatriota Ricky Martin. Unu de los primeros en destacar nel xéneru y n’afondar nel mercáu musical estauxunidense, que vivió momentos complicaos na industria cuando decidió “salir del armariu” y la so carrera tomó un xiru reivindicativu de la so patria al igual que’l rei del trap. Poro, sentáu nes característiques sielles de plásticu del álbum de 2025 cantaba Ricky Martin “Lo que pasó en Hawaii”, un cantar qu’alvierte sobro’l colonialismu contemporáneu, nuna dómina onde val más recordalo.

Siguía’l conciertu col himnu de resistencia “El apagón”, cantar de 2022 que menta les costantes perdes d’enerxía en Puertu Ricu y que nel so estrenu incluyó un documental sobro les desigualdaes nel país. Facía referencia al gran apagón de 2017 tres el pasu d’un furacán y como los mesmos llabradores punxéronse manes a la obra a solucionar el problema. Por eso, trés jíbaros xubieron a los postes de lluz.

Convién resaltar que, sacantes la intervención de Lady Gaga, l’espectáculu foi enteru n’español, daqué que nunca enantes asocediera nel “Súper Tazón” y qu’ensin dulda sigue cola vena patriota cola que Bad Bunny compunxo’l so últimu discu, el gran ésitu «Debí tirar más fotos», del cual los sos cantares ocupen los puestos de los cinco más escuchaos del artista en Spotify. Nel discu, Benitu fai bases musicales introduciendo ritmos clásicos de la illa y fai un alegatu a les desigualdaes y los abusos de la potencia estranxera nel país, esto ye, d’Estaos Xuníos.

Esa intención de reivindicar la so tierra y les sos costumes, y de criticar l’imperialismu americanu nel so país de xuru sía la gran razón pola que l’artista saliera portando la bandera independentista de Puertu Ricu en gran parte l’actuación. Siendo acompañáu a la fin poles banderes de tolos países d’América, mentó los nomes de toos dende Chile hasta Canadá al berru de “Dios bendiga América” mientres les banderes lu arrodiáben.

Tou esto asocede nun contestu de tensión internacional poles deportaciones masives y los abusos y asesinatos cometíos pola ICE, la guardia d’inmigración. Fai yá unos díes, el mesmu cantante facía declaraciones polémiques nos premios Grammy condergando l’actuación d’estes fuerces abusives y caldiando l’ambiente pal actu de la Super Bowl, que de xuru nun dexó indiferente a naide.

Más de 13.000 persones visiten la ilesia de la Llaboral tres la restauración de la cúpula

Por
xixonaldia
-
0

La ilesia de la Llaboral rexistró 13.118 visites nes xornaes de puertes abiertes organizaes pola Conseyería de Cultura, Política Llingüística y Deporte tres la restauración integral de la so cúpula, ún de los símbolos más representativos d’esti conxuntu monumental.

Del total d’asistentes, 4.131 persones escoyeron les visites guiaes programaes en distintos pases, mientres que 8.987 accedieron n’horariu d’entrada llibre hasta completar l’aforu. La respuesta del públicu a lo llargo de los diez díes d’apertura (del 13 al 22 de febreru) confirma la gran expectación xenerada pola reapertura y l’altu interés social pol patrimoniu cultural asturianu.

La restauración de la cúpula supunxo una inversión de 814.000 euros. L’actuación resolvió los problemes de filtraciones y permitió recuperar les pintures murales, amás de garantizar la estanqueidá y la estabilidá estructural del templu, asegurando la so correcta conservación. Esta intervención intégrase nun plan sosteníu d’inversión nel conxuntu de la Universidá Llaboral, al que’l Principáu destinó más de dos millones d’euros nos últimos trés años pa caltenimientu y conservación, xunto con otres actuaciones empobinaes a modernizar y revitalizar l’espaciu.

Diseñada pol arquitectu Luis Moya Blanco, la ilesia de la Llaboral ye ún de los fitos arquitectónicos más singulares del sieglu XX n’España. Los trabayos foron executaos por un equipu técnicu especializáu, acordies con criterios de conservación patrimonial y respetando los valores históricos y artísticos del inmoble. La intervención incluyó la restauración de la réplica de la Cruz de la Victoria asitiada na fachada principal. El procesu contempló l’escaneáu tridimensional de les pieces conservaes, la so llimpieza, la reposición d’elementos decorativos y la sustitución de la estructura de soporte pa reforzar la so estabilidá.

Dende’l 23 de febreru, la ilesia y la so cúpula incorpórense de mou estable al percorríu de visites guíaes de la Llaboral. El Gobiernu d’Asturies reafita asina’l so compromisu cola protección d’un patrimoniu públicu que combina memoria, educación y creación contemporánea, y refuerza la candidatura del conxuntu a Patrimoniu Mundial, tres la so inclusión na Llista Indicativa en xineru de 2025.

“Dar xuegu”, un espaciu imprescindible pa los deportes tradicionales d’Asturies na RPA

Por
xixonaldia
-
0
El programa radiofónicu Dar xuegu ta consolidándose como una de les iniciatives más valientes y necesaries dientro de la programación deportiva de la RPA. Dedicáu dafechu a los deportes y xuegos tradicionales d’Asturies, l’espaciu convirtióse nun auténticu altavoz pa un patrimoniu cultural y deportivu que forma parte esencial de la identidá del país.
Nun panorama mediáticu onde predominen los deportes mayoritarios, Dar xuegu apuesta pola divulgación, la información y l’entretenimientu alredor de disciplines con fondes raigaños na tradición asturiana. Dende los bolos hasta’l valtu o la corta de troncos, el programa da protagonismu a les persones, clubes y colectivos que trabayen cada día por caltener vivu esti legáu.
Presentáu por Sergio Buelga, l’espaciu destaca pola so calidá informativa, pola cercanía colos protagonistes y pola capacidá d’analizar non solo’l presente, sinón tamién los retos de futuru d’estes práutiques. Les entrevistes, les secciones divulgatives y el tonu dinámicu faen del programa una propuesta fresca, rigurosa y prestosa pa tolos públicos.
L’impactu del programa, que ta contribuyendo a reforzar la visibilidá y el prestixu social de los deportes tradicionales. Más qu’un simple espaciu radiofónicu, Dar xuegu ye una ferramienta de tresmisión cultural y un exemplu de cómo la comunicación pública puede xugar un papel clave na defensa del patrimoniu inmaterial asturianu.
Con una identidá clara y un compromisu firme col país, Dar xuegu confirma que la tradición, cuando se trata con profesionalidá y pasión, tien presente y tien futuru na radio asturiana.
Jennifer Berrocal 
Alministración y producción

«Inda hai munchos soníos y caminos nuevos por esplorar»: la xira de Morgan fai parada n’Asturies esti sábadu 21

Por
xixonaldia
-
0
Portada del nuevu discu de Morgan, Hotel Morgan

Morgan ta de xira y esta fin de selmana toca Xixón. Entrevistamos a la conocida banda de rock alternativu, aprovechando que’l tour del discu Hotel Morgan pasa per Asturies. El próximu sábadu 21 de febreru, la Sala Acapulco  de Xixón va convertise nel espaciu físicu qu’allugue esi «hotel» al que’l grupu nos convida cola so música. El públicu va ser recibíu y acomodáu nos distintos cantares del discu que da nome a la xira, ensin escaecer dalgunos de los sos ésitos d’álbumes anteriores: espacios sonoros nos que poder esfrutar del bon facer musical de Morgan.

¿Qué simboliza Hotel Morgan? ¿Ye un llugar físicu, emocional o conceptual?

Ye’l llugar conceptual onde conviven estos nuevos cantares, un llugar nel que caún tien el so espaciu pero al mesmu tiempu comparten una estructura común col restu.

¿En qué momentu vital naz esti discu?

Naz xusto depués d’acabar una de les nueses xires más llargues y esitoses hasta esi momentu, ún de los momentos de mayor felicidá y estabilidá que vivéramos como banda.

¿Qué diferencia a esti álbum de los vuestros trabayos anteriores?

Ye l’álbum nel que más abrimos l’abanicu d’influencies, estilos y nuevos soníos. Hasta agora intentábemos que los discos tuvieren un soníu concretu que conectare los cantares unos con otros a lo llargo de tol discu, sicasí n’Hotel Morgan busquemos que cada cantar tenga’l so propiu universu sonoru.

¿Cómo foi esta vegada’l procesu de composición?

Xuntámonos por vez primera en xunu del 2024 pa sentir los cantares y idees que Paco y Nina escribieren mientres el parón que fiximos tres de la xira de The River y a diferencia de los trabayos anteriores. nesti casu quiximos ser más directos y rabiones a la d’iguar y ensayar los cantares. Tener munchos meses de composición y ensayos non siempre ye lo meyor y esta vegada decidimos trabayar namás mientres seis selmanes nel llocal al pie de Martín García Duque y dir directos pal estudiu.

¿Cómo ta siendo la recepción del públicu nesta xira?

Ensin dulda ta siendo la nuesa meyor xira hasta’l momentu, el públicu ta respondiendo perbién a los nuevos cantares. L’añu pasáu fiximos una xira per teatros y auditorios na qu’axuntamos a la banda dos coristes pa presentar el nuevu discu y agora tamos somorguiaos na xira de sales na que recuperemos dellos cantares que llevábemos tiempu ensin tocar y el directu ta más equilibráu ente los cuatro discos.

Depués de tantos años xuntos, ¿cómo evolucionó la vuestra relación personal y artística?

Somos amigos dende munchos años enantes de montar la banda y eso fai que l’amistá seya siempre lo primero que nos xune. Ye verdá que cuando una banda empieza a xenerar un nivel de trabayu considerable hai munches situaciones nueves qu’hai qu’aprender a xestionar, y permediar eso llevónos un tiempu. Y a nivel artísticu tamos más seguros y abiertos que nunca.

¿Cómo vivís la industria musical actual, col pesu del streaming y les redes?

Nun somos una banda que teamos demasiao esmolecíos por una cosa nin pola otra, centramos la mayoría de la nuesa enerxía en facer bonos discos y bonos conciertos y como lo que pase depués nun ta de mano nuesa, nun da-y munches vueltes.

¿Sentís presión polos númberos o sois quien a caltenevos al marxe?

Mirámoslos y tamos sollertes a lo que pasa pero lo realmente importante pa nós ye ver que los conciertos y los recintos van medrando con cada xira, esos sí son númberos reales y importantes pa Morgan y non tanto los siguidores que tengamos nes redes sociales.

¿Qué importancia tien pa vós anguaño’l formatu físicu?

Enforma, la venta física pa una banda independiente y autoxestionada como la nuesa ye fundamental pa la sostenibilidá del proyectu. Tamos mui agradecíos a tola xente que pasa pel puestu de merchandising depués de los conciertos porque son una parte bien importante pa que la banda pueda siguir alantre.

¿Qué deprendistis sobre vós mesmos nesti últimu discu?

Que somos capaces de facer un discu en muncho menos tiempu del que tábemos avezaos y qu’inda hai munchos soníos y caminos nuevos por esplorar.

¿Qué significa “ésitu” pa Morgan nesti momentu?

Poder dedicanos namás al grupu pudiendo facer la música que nos apitez y nos presta, siendo llibres y pudiendo llevar la nuesa carrera al nuesu ritmu.

¿Qué mieu sigue presente cuando llanzáis dalgo nuevo?

Nun avezamos tener mieu nesos momentos pero sí munchos nervios y espectación por ver cómo recibe la xente los nuevos cantares.

1...345...406Páxina 4 de 406

Síguinos n'instagram @xixonaldia

Contáctanos: redaccion@xixonaldia.com
Facebook Instagram Twitter
© 2020 - Cuatro Gotes Producciones SL