Dempués del ésitu de los espectáculos “El Origen”, “Manicomio”, “Cabaré Maldito”, “Apocalipsis” y “Bacanal”, con más de 3.500.000 d’espectadores y cinco países visitaos, el Circo de los Horrores presenta la so sesta entrega, “Réquiem, Sinfonía Final”, el suicidiu escénicu de Suso Silva. El show va tar presente en Xixón del 20 d’ochobre al 1 de payares nel parque Hermanos Castro.
El Circu de los Horrores naz nel añu 2006 col compromisu de concebir un espectáculu de circu orixinal, distintu ya innovador, un conceutu d’espectáculu qu’apurriera un soplíu d’aire fresco nel panorama circense español.
Suso Silva, el so ceador y director, trató de reinventar el Circu col claru propósitu de que’l públicu nuevu recuperara l’interés que tuviera de neñu pol Circu. La so característica frase “El Circu morrió, vamos desenterralo” ye una declaración d’intenciones.
Premiu Nacional de Circu 2003, otorgáu pol Ministeriu d’Educación, Cultura y Deporte, Suso Silva funde como naide’l teatru, el circu contemporaneu y el cabaré, en shows cargaos a partes iguales de terror y d’humor.
Esta sesta entrega, la más teatral del Circo de los Horrores, supón la baxada de Suso Silva de los escenarios, tres 20 años n’escena y nel cumal del so ésitu. Un gran actu final que sirve como despidida del maestru frente a la so obra y qu’homenaxa toa una vida dedicada a los personaxes qu’encarnó mientres toos estos años.
“Esta ye la mio última parodia, la mio última representación…y ye que voi llenu per dientro y desnudu per fuera”.
Suso, l’escritor, nel so escuru y vieyu desván, sentáu ante la so vieya máquina d’escribir, crea los sos personaxes pantasmes. Y mentanto, nel escurrir d’eses lletres impreses que se van convirtiendo en pallabres nel papel, va dando forma a eses pantasmes del Circo de los Horrores, a les creaciones inacabadas que van cobrando vida tresformándose en personaxes etéreos que van formando parte del Circu de los Horrores.
Sol influxu hipnóticu de les sos creaciones, Suso, l’escritor, entra nun estáu de llocura y desasosiegu mientres ye arrodiáu por toos esos personaxes y solombres que lo aterren, acoriquen, curien y primen hasta’l deliriu, faciéndo-y perder la so identidá.
Suso Silva, más introspectivu que nunca, desdóblase y preséntanos a los que fueron los sos distintos alter ego nel Circo de los Horrores, como Suso Clown, l’únicu mortal nel enigmáticu Circo de los Horrores, ye un personaxe central y fundamental na creación y desenvolvimientu del escuru y delirante universu qu’habita so la carpa. A partir d’esti escuru, gamberru y maquiavélicu clown surden otros personaxes más tarrecibles qu’afonden na esencia, les alcordances, los mieos y les pantasmes del Circu de los Horrores: Nosferatu, padre de toles besties del avernu y maestru de ceremonies del Circu de los Horrores representa tolos mieos del ser humanu y utiliza l’humor y el terror pa captar, seducir y treslladar al espectador a los rincones más escuros del Circu; El Rei del Manicomiu, dexeneráu, alvertíu y maliciosamente risonderu, los sos delirios, visiones y llocures componen la personalidá d’esti personaxe que se siente rei del Manicomiu de los Horrores; y Lucifer, el diañu más golfu y gamberru, que comercia coles almes de los mortales en cuenta de fama, dineru, sexu y poder, y seduzlos pa pasase al llau más escuru, el so templu del pecáu, la so casa, onde nun esisten normes nin tabúes.
Toos y cada unu d’ellos van tener un buecu especial en Réquiem pa poder despidise como se merecen de la so hestoria. Pero amás esta despidida nun la fadrá solo…, nun podíen faltar otros emblemáticos personaxes que formaron parte d’esta hestoria acompañarán-y mientres la so última función.
“Réquiem, Sinfonía Final” supon viaxar al pasáu, echar una güeyada al presente y dexar el futuru en nueves manos. Volver afayar y treslladanos a aquellos antiguos llugares que dieron forma nel tiempu al delirante universu del Circu de los Horrores, a aquel risonderu manicomiu o a aquel apocalíptico mundu n’estinción o al selvaxe y sensual cabaré malditu y les sos bacanales más malvaes.
“Réquiem, Sinfonía Final” ye l’apuesta más teatral del Circo de los Horrores, que presenta actos circenses de gran magnitú, monólogos atélites y risonderos, xuníos a una perfecta y acorde iluminación, onde la escenografía y el vestuariu treslládennos a otros escenarios del Circo de los Horrores. Un gran equipu d’artistes y profesionales de distintes nacionalidaes y 1 añu y mediu d’ensayos fueron necesarios pa dar vida a esti magníficu espectáculu que se desenvuelve so una impresionante carpa de 40 m de diámetru y 15 m d’altu.
Tres la retirada de Suso Silva, l’universu del Circo de los Horrores va siguir alantre con nuevos personaxes, hestories y espectáculos. Esto namás ye un puntu y aparte que va apurrir cazumbre nueva nel mundu del Circo de los Horrores.
