Les sableres rurales de Xixón van cuntar dende esti vienres con socorristes. El conceyal de Policía Local y Servicios de Prevención y Estinción de Quemes, José Luis Fernández, manifestó que la partida qu’anguaño se destinó al Serviciu de Salvamentu suma un total de 786.500 euros. La cifrá supón un incrementu de 129.500 euros frente al pasáu añu. L’edil negó que se produxera nengún retayu na plantiya que, nestos momentos, cuenta con 33 socorristes y seis auxiliares.
Son datos ufiertaos na Comisión de Seguridá, Movilidá y Mediu Ambiente, na qu’esplicó que la única diferencia, dende’l puntu de vista del númberu d’efectivos, ye que los nueve componentes del equipu que cada añu s’incorporen 15 de xunu, incorporaránse anguaño’l 1 de xunetu. El conceyal recordó que la declaración del estáu d’alarma tamién atrasó l’entamu de la temporada de baños. Fernández recordó que l’aforu de la sablera de San Llorienzo ye d’un terciu del habitual por cuenta de la pandemia de Covid-19. Coles mesmes, esplicó que, magar la sablera cunta con un socorrista menos que nel añu anterior, les trés zones de bañu de la sablera tán perfectamente cubiertes pol serviciu.
Cola incorporación d’esos nueve efectivos, seis pa les sableres non urbanes de la zona esti y los trés restantes de refuerzu en San Llorienzo y Poniente, la plantiya de Salvamentu va tar formada por un total 42 socorristes y seis auxiliares. A lo último, señaló que los horarios son esactamente los mesmos qu’en temporaes anteriores. Asina, hasta’l 31 d’agostu, el Serviciu de Salvamentu en San Llorienzo va ser de 10 a 21 hores, en Poniente y L’Arbeyal de 12 a 20 hores y nes sableres del este de 12 a 19 hores.
