Xixón al día

Categoría: Economía

  • Asturies ganó 3.240 afiliaos a la Seguridá Social nel añu últimu

    Asturies ganó 3.240 afiliaos a la Seguridá Social nel añu últimu

    L’afiliación a la Seguridá Social aumentó en 3.240 persones (0,90 %) l’últimu añu n’Asturies, hasta asitiase en 363.025 cotizantes. L’afiliación tamién creció en febreru, en concreto en 372 persones, lo que supón la creación de cuasi 13 puestos de trabayu al día. El desempléu baxó en 27 persones (-0,04 %) nel mes de febreru. Un descensu que se rexistró en tolos sectores d’actividá, sacante la construcción y el colectivu ensin empléu anterior, y en tolos grupos d’edá, cola escepción de los menores de 25 años.

    El desempléu redúxose en 3.147 persones al respective del mesmu mes de 2019, lo qu’asitia la cifra de desocupaos en 72.940. El Principáu foi la cuarta comunidá con una mayor cayida interanual per detrás de Castiella y Llión, Galicia y Murcia. El númberu de paraos ye’l más baxu nun mes de febreru dende 2009.

    Por sectores d’actividá, destaca la cayida nel colectivu ensin empléu anterior (-8,67 %), los servicios (-3,96 %) y la construcción (-3,61 %). En términos absolutos, los mayores retrocesos concéntrense nel sector servicios, con 2.170 paraos menos qu’en febreru de 2019, y nel colectivu ensin empléu anterior (-636 paraos). Por sexos, el paru baxó más ente muyeres (-4,41 %) qu’ente homes (-3,78 %) y rexistráronse aumentos moderaos ente les persones de más de 45 años y na industria, que prácticamente caltuvo la cifra de desocupaos.

    Evitar el «conformismu»

    Asturies foi una de les comunidaes que cerró febreru con una cayida del desempléu, un mes nel que la cifra de persones desocupaes llevaba creciendo trés años consecutivos, anque en porcentaxes reducíos. La directora del Serviciu Públicu d’Empléu del Principáu (Sepepa), Pilar Varela, valoró l’afiliación rexistrada y la evolución del paru nos dolce meses últimos. Sicasí, señaló qu’estos datos nun tienen de llevar al conformismu. «Al contrariu, estes cifres impúlsennos a siguir trabayando en collaboración con empreses, conceyos y toos aquellos colectivos comprometíos cola meyora de la empleabilidá», sorrayó.

    Varela esplicó que’l Gobiernu d’Asturies va siguir trabayando nes polítiques actives d’empléu «pa revertir el paru y que cada vez sían más les persones que tengan trabayu na comunidá». Tamién anunció qu’a lo llargo d’esti mes va caltenese la convocatoria d’acciones y programes formativos y d’inserción en collaboración coles alministraciones locales (planes locales d’empléu) y va dase un impulsu a les midíes pa facer frente al paru xuvenil y al de duración llarga.

  • El preciu de la vivienda cai un 1,58% respective al añu pasáu

    El preciu de la vivienda cai un 1,58% respective al añu pasáu

    El preciu de la vivienda de segunda mano n’Asturies n’avientu asitióse nos 1.465 euros de media per metru cuadráu. Esta cifra rexistró una mengua del -1,58% interanual, según datos apurríos pol portal pisos.com. Asturies foi la octava autonomía más cara, per detrás de Baleares (3.113 €/m²), ente otres. Nel ámbitu provincial, foi la decimocuarta más cara del país. Tocantes a la vivienda de segunda mano n’España, n’avientu’l preciu mediu foi de 1.711 euros per metro cuadráu. Esta cifra supunxo una xubida interañal del 2,33%.

    Ciérrase un añu nel que’l preciu de la vivienda reforzó’l so enclín escontra la moderación. Según Ferran Font, director d’Estudios de pisos.com, «fuimos testigos de cómo les xubíes nes grandes ciudaes fuéronse esfreciendo hasta dibuxar un escenariu nel que los ascensos de dos díxitos acutáronse namás pa los distritos de les zones más calientes». Pal voceru del portal inmobiliariu, «esta desaceleración yera la respuesta lóxica d’un mercáu que nun podía siguir asumiendo alces brusques mientres tanto tiempu». Nesti sentíu, l’espertu almite que «los precios residenciales viéronse influyíos polos cambeos na normativa hipotecaria y l’incertidume política».

    Font indica que «la demanda suel decantase pola prudencia cuando la redolada económica vuélvese insegura, prefiriendo l’aforru en cuenta de la inversión». Per otru llau, añade que «tenemos per delantre otros dolce meses nos que se va faer fincapié nel calter social de la vivienda gracies a l’apueste públicu, que va fomentar la collaboración colos axentes privaos pal desenvolvimientu d’un parque residencial diseñáu pa dar respuesta a les necesidaes de los sectores más vulnerables de la sociedá».

    Llanes foi’l conceyu más caru d’Asturies

    Uviéu cayó mensualmente un -0,06%, el retayu más leve del país. D’un añu a otru, la capital asturiana refundió una cayida del -0,62%, la quinta menos intensa del país. Con 1.631 euros per metru cuadráu n’avientu, la capital asturiana foi la ventiavu segunda nel ranking nacional de les más cares, un llistáu encabezáu por Donostia (4.908 €/m²).

    Al respective de los conceyos asturianos, Navia (4,14%) foi la localidá que más xubió trimestralmente na rexón, ente que Castrillón (-12,49%) foi la sesta que más cayó del país. Interanualmente, Ayer (9,19%) foi’l conceyu asturianu que más creció, ente que Valdés (-10,81%) foi la localidá asturiana que más s’afixo nesti periodu. La localidá más cara de l’autonomía, con 1.807 euros per metro cuadráu, foi Llanes. El conceyu asturianu más baratu foi Llangréu, con 705 euros per metro cuadráu.

  • Asturies zarra 2019 con 69.957 persones en paru

    Asturies zarra 2019 con 69.957 persones en paru

    El paru rexistráu menguó n’Asturies en 2.847 persones n’avientu, un 3,91% al respective de finales de 2018. La cifra de desocupaos asitióse en 69.957. El Principáu foi la tercer comunidá autónoma con una mayor cayida interañal del desempléu, namás per detrás del País Vascu y Castiella y Llión. Amás, encadena yá más de seis años consecutivos, dende ochobre de 2013, de descensos interañales del paru.L’amenorgamientu interañal rexistrose en dambos sexos y tolos sectores d’actividá. Destaquen los descensos ente los homes (-4,03%), nel grupu d’edá de 25 a 45 años (-8,89%) y, peor sectores, na construcción (-5,51%) y el colectivu ensin empléu anterior (-8,16%).

    En relación a payares, el paru baxó un 1,30%, al contabilizase 920 paraos menos. Trátase del mayor descensu mensual depués d’Andalucía, Murcia y Baleares. Nesti sentíu, la directora del Serviciu Públicu d’Empléu (Sepepa), Pilar Varela, sorrayó l’amenorgamientu nel sector servicios (-2,28%) y nel colectivu de persones ensin empléu anterior (-4,14%). Nel sector servicios, el descensu del númberu de paraos na hostelería y el comerciu representa’l 51% del rexistráu; y l’amenorgamientu nes actividaes de l’alministración pública, educación y servicios sanitarios y residenciales supón el 34% del total.

    En términos mensuales, tamién destaca la cayida del paru en muyeres (-3,14%) y en menores de 45 años, con amenorgamientos del 6,09% nel casu de persones d’hasta 25 y del 2,24% nel colectivu de 25 a 45. Por conceyos, el paru mengua en 41 conceyos. N’Uviéu, Xixón, Llanes, Cangas, Mieres y Llangréu fízolo penrcima de la media nacional.

    Per otra parte, l’afiliación a la Seguridá Social creció nos postreros doce meses en 3.517 afiliaos (0,97%) hasta asitiase en 367.673 persones al términu del añu, el meyor datu pa un mes d’avientu dende 2011. En relación al mes de payares, el númberu de cotizantes amenorgóse un 0,13%, lo que supón 487 afiliaos menos.

  • FADE critica la «desproporcionalidá» de la fuelga de supermercaos

    FADE critica la «desproporcionalidá» de la fuelga de supermercaos

    «Convocar una fuelga d’ocho xornaes en plenes fiestes navidiegues nun paez l’acción más sensata». La Federación Asturiana d’Empresarios (FADE) condergó, al traviés d’un comunicáu, la nuevos paros de los trabayadores de supermercaos n’Asturies. La plantiya d’Alimerka, Masymas, La plaza de Dia y El Arco ta llamada nuevamente a la fuelga mientres los díes 28, 29, 30 y 31 d’avientu.

    «La negociación significa cesión peles dos partes, non imposición por una d’elles». La FADE recuerda que se llegó a esta situación «al refugase una propuesta na que les empreses aceptaben seis de los ocho puntos plantegaos polos sindicatos». La patronal defende qu’esti alcuerdu supunxera que nengún trabayador del sector tuviera un salariu inferior a los 14.000 euros al añu nel añu 2021, amás de meyores sociales.

    La FADE felicítase porque, magar la «intensa presión exercida polos sindicatos y del bloquéu físicu de centros de distribución», el seguimientu de la fuelga «foi inferior al 10%». «Condergamos la desproporcionalidad d’una fuelga que nunca debía de producise. Y animamos a que les partes retomen la vía del diálogu sensatu, pa lo que resulta imprescindible desconvocar los paros previstos ente los díes 28 y 31 próximos».

  • Empléu pide un alcuerdu qu’evite la fuelga nos supermercaos

    Empléu pide un alcuerdu qu’evite la fuelga nos supermercaos

    El Gobiernu asturianu sigue trabayando pa evitar la realización, dende les 22:00 hores de mañana, de cuatro nueves xornaes de paru nos supermercaos. La Conseyería d’Empléu fizo un nuevu llamamientu al diálogu ente la empresa y los trabayadores. «La negociación ye la única vía pa desactivar el conflictu», asegura Pedro Fernández-Raigoso, director xeneral d’Empléu y Formación.

    Señala que dende la selmana pasada’l so departamentu y el Serviciu Asturianu de Solución Estraxudicial de Conflictos (Sasec) trabayen costantemente fomentando que «se produza’l diálogu como única vía posible p’algamar una solución positiva del conflictu”. «Somos conscientes de los esfuerzos que se realicen nesti sentíu, tanto dende la parte sindical como de la empresarial, lo que ye d’estimar”, señala Fernández-Raigoso, «pero siguimos insistiendo na necesidá de doblar los mesmos y en que se xenere’l clima que permita algamar lo más aína posible un alcuerdu, tando convencíos de que va ser ésti beneficiosu pa toos».

  • 271 trenes afectaos pola fuelga de Renfe

    271 trenes afectaos pola fuelga de Renfe

    El Ministeriu de Fomentu determinó los servicios mínimos énte la xornada de fuelga convocada en Renfe pol sindicatu CXT. La circulación de los trenes de Cercaníes va vese afectada mientres tola xornada. N’Asturies, en función de les franxes horaries, los servicios mínimos van variar ente unos máximos del 65% n’hora punta y del 46% del serviciu habitual nel restu del día. En trenes de Media Distancia establezse una media del 63% de los servicios habituales, y nos d’Alta Velocidá y Llarga Distancia, el 90%. Con al respective de los trenes de Mercancíes, establezse un porcentaxe del 20% del serviciu habitual.

    Renfe va ufierta a los viaxeros d’Ave Llarga Distancia y Media Distancia afectaos polos servicios mínimos la posibilidá de viaxar n’otru tren nel horariu más averáu al adquiríu, anular o camudar pa otra fecha’l so billete ensin nengún costu.

  • ALSA anueva la so imaxe corporativa

    ALSA anueva la so imaxe corporativa

    Alsa ta d’estrenu. La compañía presentó esti xueves nun actu celebráu en Madrid la nueva imaxe de la compañía. La nueva marca supon una evolución significativa nel allugamientu de la compañía: dende una visión tradicional del tresporte, amestada principalmente a los autobuses de llargu percorríu, a una visión multimodal y conectada. El propósitu de la nueva marca ye “averáse a les persones y conectar el mundu d’una manera segura y sostenible”. Con esta evolución Alsa quier faer frente a los retos de nueva movilidá, na qu’apaecieron nuevos actores ayenos al tresporte tradicional.

    El presidente de Alsa, Jorge Cosmen, señaló mientres la presentación que “siempres buscamos ameyorar y siguir innovando pa dar una meyor esperiencia a los nuesos veceros”. «El nuesu negociu enfréntase a un cambéu de dómina y precisamos una marca capaz de maximizar tol potencial”. Según el presidente d’Alsa “nun ye namá un cambéu de logotipu. El nuesu oxetivu va muncho más allá: tratar de que los veceros nos percíban como una compañía innovadora y asina siguir creciendo de forma sostenible”.

    La resultancia foi la reinvención d’una marca icónica, capaz de representar a la compañía en tolos mercaos. Y, coles mesmes, anovar la so espresión gráfica. La primer versión del actual logotipu de la compañía data del añu 1946. Una marca que se caltuvo con actualizaciones a lo llargo de toos estos años, la postrera nel añu 2011.

  • Los trabayadores de supermercaos convoquen ocho díes de fuelga

    Los trabayadores de supermercaos convoquen ocho díes de fuelga

    Unos 12.000 trabayadores de supermercaos tan llamaos a la fuelga n’Asturies. Los paros tan convocaos pa los díes 21, 22, 23, 24, 28 29, 30 y 31 d’avientu, en plenes fiestes navidiegues. La fuelga va afectar a cadenes como MásyMás, Alimerka, Día, El Arco y La Quintana. L’oxetivu de los sindicatos ye llograr que l’Asociación de Supermercaos se siente na mesa negociadora y consiguir un conveniu colectivu que meyore les condiciones de los trabayadores del sector.

    El sindicatu USO reivindicó la xubida automática de nivel salarial a los 3 años, dos díes más de vacaciones y aumentar el permisu por lactancia. «Lleguemos a esta situación pola actitú de la patronal. Llevamos esperando dende febreru a tener una respuesta pela so parte», denuncia Margarita Quintano, de la Federación de Servicios de USO-Asturies.

    L’añu pasáu la patronal aceptó una xubida salarial de 50 euros mensuales y el compromisu d’axustar en 2019 un nuevu conveniu que tuviera meyores salariales y sociales. Nestos meses, la patronal presentó una propuesta de xubida salarial del 1,3%, unos 11,50 euros de media. «Los sindicatos tamos reclamando que los salarios algamen los 14.000 euros añales en 2021», esplica Quintano.

  • “La Constitución tien que blindar la vinculación de les pensiones al IPC»

    “La Constitución tien que blindar la vinculación de les pensiones al IPC»

    Sofía Castañón defendió esti vienres la vinculación de les pensiones al IPC. La coalición de Xuníes Podemos al Congresu aconceyó col diputáu de Podemos Rafael Palacios p’analizar distintes temes del ámbitu de los servicios sociales y les pensiones.Tres l’alcuentru, Castañón recordó la multitudinaria manifestación del pasáu miércoles na que’l colectivu de pensionistes «demostráronnos que taben defendiendo, non solo los sos derechos, sinón el derechu a que les siguientes xeneraciones tengan una sistema de pensiones públicu y dignu».

    «Nun podemos tar reforzando los planes de pensiones privaos y dicir al tiempu que nos esmolecen les pensiones y la so garantía nel ámbitu públicu». La cabeza de llista de Xuníes Podemos pal 10-P defendió que «les pensiones y la so vinculación al IPC tien que tar blindada na Constitución. Nun puede ser motivu de discutiniu ente los grupos parlamentarios en cada ellaboración de los Presupuestos Xenerales del Estáu”.

    Per otru llau, Castañón recordó que’l Pactu de Toledo pretendía cerrase “ensin encetar la edá de xubilación, ensin saber qué pasa coles pensiones de viudes, nin tampoco cuál ye’l modelu de financiamientu”. Amás, destacó qu’hai una fienda salarial nel ámbitu de les pensiones pa les viudes, quien «tienen qu’escoyer ente pagar la lluz o poder comer pexe”.

    Pela so parte el diputáu de Podemos Asturies na Xunta Xeneral, Rafael Palacios, llamentó que n’Asturies hai 200.000 persones en riesgu d’esclusión, con problemes graves de vivienda qu’afecten a más de 75.000 asturianos. Nesti sentíu, el diputáu aseguró que va preguntar a la conseyera de Derechos Sociales y Bienestar sobro les llistes d’espera nel ámbitu de la dependencia porque «siguen ensin baxar». El diputáu denunció que «n’Asturies muerren 40 persones al mes esperando por una ayuda a la dependencia que yá foi concedida”, dalgo que calificó de «intolerable».

  • La mesa p’abordar alternatives al cierre de Vesuvius va reunise’l 30 d’ochobre

    La mesa p’abordar alternatives al cierre de Vesuvius va reunise’l 30 d’ochobre

    La mesa técnica para esquizar alternatives al zarru de les plantes de Vesuvius va axuntase’l 30 d’esti mes na sede de la Conseyería d’Industria. A esi alcuentru, coordináu pol Gobiernu d’Asturies y el Ministeriu d’Industria, Comerciu y Turismu, van ser convocaes toles partes implicaes: la Xunta de Castiella y Llión, los conceyos afectaos, los representantes de losl trabayadores y la mesma empresa.

    El Principáu va siguir trabayando pa recuperar l’actividá y los empleos perdíos, tal que fixo desque’l 5 de setiembre se diera a conocer el zarru de les factoríes de Llangréu y Miranda d’Ebro (Burgos). Nesti sentíu, Industria yá ta realizando llabores de prospección pa identificar posibles inversores y actividaes alternatives.

    La conseyería llamenta, sicasí, que la empresa optara por un procesu de deslocalización y que caltenga la so negativa a ampliar el periodu de consultes del espediente de regulación d’empléu. La directora xeneral d’Industria, Rosana Prada, sorraya que tanto l’Executivu autonómicu como’l central van realizar un siguimientu refechu y van velar, de forma paralela a los trabayos de la mesa técnica, pol cumplimientu de los compromisos dereindustrialización asumíos pola compañía colos trabayadores.