Xixón al día

Categoría: Sociedá

  • Carmen Moriyón conviértese n’alcaldesa con VOX dempués de prometer en campaña nun pactar colos estremos

    Carmen Moriyón conviértese n’alcaldesa con VOX dempués de prometer en campaña nun pactar colos estremos

    El plenu de güei en Xixón otorgó l’alcaldía a Carmen Moriyón tres el pactu con VOX que-y dio los votos necesarios pa facese col gobiernu llocal. Con ello consúmase l’incumplimientu de la promesa qu’en campaña fixo Carmen Moriyón de nun pactar colos estremos, lo qu’especificó en VOX específicamente, tres los numberosos ataques vivíos pol so diputáu Adrián Pumares na llexislatura anterior.

    Esti pactu ta xenerando una importante rocea ente importantes sectores de la sociedá asturiana, pero tamién dientro del propiu Foro Asturias, onde destacaos dirixentes dimitieron yá nes últimes hores.

    Dimisiones en cadena en Foro Asturias pol pactu de Moriyón con VOX

  • Asturies estrena web pa la mocedá

    Asturies estrena web pa la mocedá

    La Dirección Xeneral de Mocedá Diversidá Sexual y Derechos LGTBI punxo en funcionamientu la web de mocedá p’meyorar la participación de la mocedá y poner a la so disposición información relevante sobre empléu, movilidá internacional, oficines d’información xuvenil y atención contra la LGTBIfobia, ente otres temes.

    La publicación s’estructura en seis boques:

    Informa Xoven. Noticies diaries con convocatories d’interés pa la población nuevo sobre empléu, beques, formación, ociu y tiempu llibre.
    Oficines Nueves. Información y asesoramientu personal a los mozos nel ámbitu municipal.
    Carné mozu. Información sobre esta iniciativa y ónde pueden llograse descuentos.
    Movilidá Internacional. Programes Erasmus + y Cuerpu Européu de Solidaridá.
    Sala Borrón. Esposiciones de mozos artistes asturianos/as.

    Amás, la portada inclúi otros dos apartaos d’interés:

    Atención contra la LGTBI+Fobia. Teléfonu d’atención a víctimes de dalguna agresión, incidente o situación de discriminación.
    Destacamos. Información relevante al respective de iniciatives y/o programes impulsaos dende la DG. La web va incorporar nes próximes selmanes otres aplicaciones como’l carné nuevu dixital, albergues xuveniles, el portal d’emancipación xuvenil, la rede de pisos compartíos o’l buzón de suxerencies.

  • El Principáu robla un conveniu con Hogar Sí y Provivienda para ufiertar agospiamientu y sofitu social a 88 persones ensin llar

    El Principáu robla un conveniu con Hogar Sí y Provivienda para ufiertar agospiamientu y sofitu social a 88 persones ensin llar

    – L’alcuerdu, robláu güei pola conseyera de Derechos Sociales, Melania Álvarez, va ponese en práctica nos conceyos d’Avilés y Xixón
    El Gobiernu d’Asturies, en collaboración cola Fundación Hogar Sí y l’Asociación Provivienda, pon en marcha una iniciativa que va dexar ufiertar agospiamientu y sofitu social a 88 persones que viven na cai. En virtú d’esta iniciativa, el Principáu va poner a la so disposición 23 nueves viviendes públiques Housing First nos conceyos d’Avilés y Xixón. Amás, un equipu técnicu va acompañar a les persones que participen nel proyectu, para les que se va diseñar un itinerariu individualizáu basáu nes sos preferencies y necesidaes.
    La titular de Derechos Sociales y Bienestar, Melania Álvarez, robló güei el conveniu de collaboración xunto col director xeneral de Hogar Sí, José Manuel Caballol, y la directora xeneral de l’Asociación Provivienda, Gema Gallardo. Al actu tamién asistieron el director xeneral de Vivienda, Fermín Bravo, y l’alcaldesa d’Avilés, Mariví Monteserín.
    Melania Álvarez consideró que “el sinhogarismu puede evitase” y sorrayó que l’oxetivu d’Asturies, alliniáu colos de la Unión Europea y l’Axenda 2030, pasa por desanicialo “enantes de 2030”. “L’accesu de plenu derechu al usu y esfrute d’una vivienda digna ye un fechu fundamental pa llograr la inclusión de les persones en riesgu o situación d’esclusión social”, indicó.
    Hogar Sí y Provivienda van destinar dos millones en trés años a desenvolver el programa Derechos a la vivienda: el retu de la desinstitucionalización del sistema d’atención al sinhogarismu n’Asturies, que pretende tresformar les polítiques públiques d’atención a les persones que viven na cai, de forma que se pase d’empresta-yos sofitu en centros o albergues a atende-yos en viviendes en comunidá. Al traviés d’esti procedimientu, basáu nel métodu Housing First, apúrrense viviendes algamadices y permanentes, xuntu con sofitu social y sanitariu.
    El próximu 13 de setiembre, so la presidencia española de la Unión Europea, va celebrase n’Avilés una xunta d’altu nivel, la Conferencia sobro Rexones Ultraperifériques, entamada pola Plataforma Europea del Sinhogarismu. Nesi alcuentru van ponese de mancomún esperiencies y bones práctiques y va roblase la Declaración d’Avilés, que va afondar nos oxetivos de la Declaración de Lisboa, de xunu de 2021, pa desaniciar el sinhogarismu n’Europa.

  • Iniciativa pol Asturianu dedica’l tercer seminariu de la oficialidá a los modelos de normalización y a la tresmisión xeneracional

    Iniciativa pol Asturianu dedica’l tercer seminariu de la oficialidá a los modelos de normalización y a la tresmisión xeneracional

    Iniciativa pol Asturianu dio a conocer el programa completu del III Seminariu “Oficialidá, el camín constitucional de futuru pal asturianu” que se va desendolcar el vienres 21 y sabadu 22 d’abril nel Aula Magna del Edificiu Hestóricu de la Universidá d’Uviéu.

    Dientro del III Seminariu que va inaugurar Ignacio Villaverde, rector de la Universidá d’Uviéu, van desarrollase diferentes ponencies y alderiques pa conocer la situación del idioma y les opciones d’oficialidá. L’alcuentru va entamar con una ponencia del abogáu Nicolás Bartolomé baxo’l título ‘Los modelos d’oficialidá de les llingües d’España. Opciones pal consensu constitucional’.

    Dientro de la primer xornada, vamos conocer la esperencia d’otros territorios como País Vascu, Comunidá Valenciana o Galicia; pa ello, van tar presentes responsables de la política llingüística d’estos territorios. Miren Dobaran, viceconseyera de Política Llingüística del Gobiernu del País Vascu, Rubén Trenzano, Director Xeneral de Política Llingüística y Xestión del Multillingüismu de la Comunidá Valenciana y Valentín García, Secretariu Xeneral de Política Llingüística de la Xunta de Galicia que van aportar una visión de cada procesu d’oficialidá nel so territoriu.

    La segunda xornada del seminariu va arrancar cola esposición del investigador David Guardado que va reflexonar sobre la visión del asturianu a lo llargo de la historia. De siguío, Fernando Padilla, maestru, pedagogu y ex Director Xeneral de Planificación y Normalización Llingüística d’Asturies va presentar un repás a la situación de la llingua asturiana na escuela depués de 40 años d’escolarización na asignatura.

    Iniciativa pol Asturianu va proyectar, nesti segundu, día un nuevu documental que lleva’l títulu de ‘De güeles a nietes. El retu de la tresmisión xeneracional del asturianu’ afondando na importancia de la herencia llingüística y la tresmisión del idioma.

    Les actividaes de la mañana van siguir con una mesa de diálogu con Xosé Antón González Riaño, caderalgu de la Universidá d’Uviéu y Presidente de l’Academia de la Llingua Asturiana y la periodista Pilar Rubiera titulada ‘¿Cómo sedría una Asturies con oficialidá?’.

    La mañana va finar col alderique ‘Conociendo los programes electorales. Modelos d’oficialidá y normalización’ con representantes de partíos políticos que lleven la oficialidá nel programa.

    La recta final del III seminariu, na tarde del sábadu, va entamar cola presentación del Colectivu Manuel Fernández de Castro, siguiendo con una presentación de diferentes empreses y negocios qu’usen l’asturianu na so actividá comercial.

    Enantes de pesllar cola llectura del manifiestu, la organización va presentar una mesa redonda baxo’l títulu ‘¿Cómo ye, bro? Nueves perspectives na normalización del asturianu’ na que van participar Xicu Ariza, musicasturiana.com; Blanca Fernández, escritora y cosplayer; Lluci Miravalles, diseñadora de moda y Félix Fernández, Acuto Xuegos. La finalidá d’esta mesa ye afondar en cómo averáse a les nueves xeneraciones na tresmisión xeneracional de la llingua asturiana.

  • Una investigación de la Universidá d’Uviéu revela una alta prevalencia de problemes emocionales y académicos ente los universitarios españoles tres la pandemia de coronavirus.

    Una investigación de la Universidá d’Uviéu revela una alta prevalencia de problemes emocionales y académicos ente los universitarios españoles tres la pandemia de coronavirus.

    El trabayu saca a la lluz qu’un 47,6% del alumnáu de la universidá española refier conductes indicatives d’un trestornu d’ansiedá y un 21%, de depresión.
    Los autores del estudiu conclúin que ye necesariu implementar midíes empobinaes a la prevención y tratamientu de los problemes psicolóxicos porque afecten non solo a la calidá de vida, sinón tamién al rendimientu académicu y abandonu de los estudios.
    La investigación realízase con una amplia amuesa de más de 5.200 estudiantes de grau, máster y doctoráu, de toles cañes de la conocencia, de les universidaes públiques y privaes españoles.
    Uviéu, 16 de marzu de 2023.– Los universitarios españoles presenten una alta prevalencia de problemes emocionales y académicos tres la pandemia del coronavirus. Esta ye la principal conclusión del estudio Problemes y Demandes de Tratamientu Psicolóxicu del Alumnáu Universitario na Pospandemia lideráu por investigadores de la Facultá de Psicoloxía de la Universidá d’Uviéu, en collaboración con 35 universidaes españoles. Los autores del trabayu conclúin que ye necesariu implementar midíes empobinaes a la prevención y tratamientu de los problemes psicolóxicos de los universitarios, másime porque afecten non solo a la so calidá de vida, sinón tamién al rendimientu académicu y abandonu de los estudios.
    La profesora Concha Fernández-Rodríguez, catedrática d’Analís y Cambéu de Conducta de la Universidá d’Uviéu, esplica que, nos últimos años, vien refiriéndose un aumentu de los problemes psicolóxicos ente estudiantes universitarios. Esti malestar emocional, amontáu mientres la COVID-19, rellaciónase con un deterioru del rendimientu académicu, profesional y del bienestar personal. La profesora Fernández-Rodríguez recuerda que dellos estudios envaloren la prevalencia de l’ansiedá y la depresión n’universitarios percima del 30%. “Evaluar de forma válida los problemes de la comunidá universitaria na postpandemia preséntase como la primer midida pa establecer acciones d’intervención y promoción fayadices”, sorraya.
    Con esti oxetivu, los investigadores llevaron a cabu un ampliu estudiu, ente marzu y abril de 2022, que cuntó cola participación de 5.221 estudiantes de grau y posgráu de toles cañes de la conocencia de les universidaes españoles públiques y privaes. El trabayu realizóse coincidiendo cola vuelta a les aules tres la retirada de les midíes d’aislamientu social. Les resultancies dexaron identificar una serie de problemes académicos, interpersonales y emocionales concretos, con una alta prevalencia y tresversalidá en cursos y cañes de conocencia, sobro los qu’empobináronse intervenciones de prevención y tratamientu específiques.
    Les principales resultancies d’esta investigación fueron presentaes esta mañana nun actu que tuvo llugar na Sala de Graos de la Facultá de Psicoloxía de la Universidá d’Uviéu y que cuntó cola presencia online del restu d’instituciones académiques que participaron nel trabayu.

  • El feminismu sal a la cai en Mieres del Camín con más de 20.000 participantes.

    El feminismu sal a la cai en Mieres del Camín con más de 20.000 participantes.

    Los movimientos feministes d’Asturies salieron a les cais de esti 8M nuna xornada que dende la organización consideren como «una nueva movilización histórica». Baxo un ambiente de reivindicación constante, sientéronse proclames escontra la violencia machista, la brecha salarial, la trata y pola igualdá plena de drechos ente homes y muyeres.
    La manifestación remató cola llectura del manifiestu nel campus de Mieres, y col llema permanente de compañera dame tira, eslogan principal del día.

  • Iniciativa pol Asturianu demanda mayor presencia del idioma na nueva web del Conceyu de Siero

    Iniciativa pol Asturianu demanda mayor presencia del idioma na nueva web del Conceyu de Siero

    Iniciativa pol Asturianu reclama al Conceyu de Siero qu’aproveche’l remocique de la páxina web municipal pa dotala d’una mayor presencia del asturianu. L’equipu de gobiernu sacó a concursu públicu a finales del añu pasáu’l contratu pa rediseñar el portal web. El conceyal de Facienda y Xestión Económica, Alberto Pajares, anunció’l vienres l’axudicación del contratu.

    La nueva páxina va desendolcase a lo llargo de los próximos siete meses. Por mor d’ello, la organización reclama al Conceyu qu’aproveche’l rediseñu p’ameyorar la presencia del idioma nel portal web, permitiendo d’esta manera visibilizar y normalizar l’asturianu nesta canal de comunicación cola ciudadanía. Nesti sen, l’asociación recuerda que’l conceyu cunta con un Serviciu de Normalización Llingüística en funcionamientu, polo que la torna de los conteníos nun va suponer un encarecimientu del proyectu.

    La organización afala tamién al Conceyu a aprovechar esti procesu pa incorporar la toponimia oficial de Siero en tol portal web, d’alcuerdu colo qu’establez el Decretu 104/2009, de 29 de xunetu, pol que se determinen los topónimos oficiales del conceyu.   

  • Por un mundu con más arte, el lema de la décimu octava edición de les Xornaes municipales contra’l Racismu y la Xenofobia

    Por un mundu con más arte, el lema de la décimu octava edición de les Xornaes municipales contra’l Racismu y la Xenofobia

    El Conceyu de Xixón, al traviés de la Fundación Municipal de Servicios Sociales, entama les XVIII Xornaes municipales contra’l Racismu y la Xenofobia que se van celebrar hasta’l 31 de marzu con motivu del Día Internacional pa la Eliminación de la Discriminación Racial.

    Van desenvolvese col lema ‘Per un mundu con más arte’, diseñáu pola moza Irene García Robles, que foi la ganadora del concursu convocáu pa escoyer la imaxe de les xornaes. Nesi sentíu, la programación va tratar al rodiu del arte y la inmigración, con propuestes rellacionaes cola creación artística como la lliteratura, pintura, poesía, música, etc.

    Na presentación de les xornaes y entrega de premios del concursu de cartelos que tuvo llugar esti mediudía nel Salón de Recepciones, participó la conceyala de Derechos y Bienestar Social, Natalia González Peláez, quien señaló qu’esta iniciativa ye un espaciu de convivencia y de cohesión social, que busca cada añu aumentar la participación ciudadana pa consiguir una sociedá integradora y multicultural.

    L’oxetivu ye, a última hora, visibilizar a la población inmigrante y de minoríes étniques que vive y habita nel conceyu al traviés del diálogu y la convivencia intercultural nel contestu d’una sociedá plural y diversa. Coles mesmes, les xornaes pretenden favorecer l’alcuentru, la conocencia, la comprensión, la comunicación, l’enfotu y la cooperación ente tola ciudadanía; prevenir actitúes racistes y xenófobes y denunciar los prexuicios, los estereotipos y les situaciones discriminatories esistentes escontra les persones inmigrantes y les minoríes étniques.

    Son un exemplu de collaboración y trabayu en rede, yá que nel desenvolvimientu de la programación d’esta edición participaron cuatro departamentos municipales (Mocedá, Igualdá, Empléu y Servicios Sociales) y nueve entidaes del tercer sector: ACCEM, Amaranta, APIA; Asociación pa l’Ayuda del Inmigrante Africanu n’Asturies, Asociación Xitana de Xixón, Cruz Roja, CISE, Fundación Secretariáu Xitanu, Late y Mar de Niebla.

    Destaquen actividaes como la narración oral de cuentos africanos con Boni Ofogo col títulu L’elefante que perdió’l so güeyu; sesiones de Cuentacuentos al cargu de Paula Carballeira y un Taller de narración oral col títulu de “cuntar tamién dende otres miraes”; la proyección del documental Frente al silenciu, en collaboración con Amnistía Internacional y el Grupu Eleuterio Quintanilla, con un alcuentru posterior del públicu col Director; o un alcuentru de Patricia Simón, periodista escritora especializada en Relaciones Internacionales, colos Grupos de Participación Infantil y Adolescente de Xixón, complementáu con una charra coloquiu de Patricia nel Toma 3 col títulu “viaxe per un mundu llenu d’idealistes”.

  • Mieres da tira al movimientu feminista asturianu

    Mieres da tira al movimientu feminista asturianu

    El movimientu feminista asturianu y Mieres prepárense pa salir a les cais a reivindicar, una vegada más, los derechos de les muyeres. Pa ello, el 8 de marzu, Día Internacional de la Muyer, a partir de las 19 horas va arrancar el percorríu peles cais de la capital del la cuenca del Caudal.

    Como nun podía ser d’otra manera, el lema del movimientu esti añu ye «Compañera, dame tira», una frase bien venceyada a la minería y que quier señalar la unidá dientro del colectivu de muyeres feministes. Porque nesta convocatoria nun se quixo dexar nada a la improvisación y tamién va ser simbólicu’l llugar d’entamu d’esta manifestación. La marea feminista va dar los primeros pasos dende’l Pozu Barreo, unu de los escenarios mineros más icónicos de Mieres.

    Dende la coordinación d’Asturies Feminista 8M destaquen amás qu’esta manifestación ye una convocatoria unitaria dempués de decidir en delles asamblees pola mayoría de colectivos feministes d’Asturies que Mieres sedría’l sitiu onde se tien que desenvolver el gran actu del 8M n’Asturies y destaquen que «Asturies ye la única comunidá onde habrá una manifestación con convocatoria única y unánime, sacando la convocatoria de les grandes ciudaes». Los colectivos llamenten qu’el Sindicatu d’Estudiantes decidiera apartase d’esta convocatoria y facer llamamientu a una manifestación en Xixón argumentando que nun ye’l momentu de la descentralización. Sicasí, reivindica la coordinación del actu mierense que «debemos llevar la llucha feminista a toes partes. Llegar ellí nun ye tan difícil col tresporte públicu. Hai trenes, autobuses… Los conceyos esti añu tán facilitando tresporte gratuitu». Los autobuses van tar disponibles de baldre dende Uviéu, Xixón, Avilés y conceyos del oriente, l’occidente, el centru y les cuenques mineres. Amás, el conceyu de Mieres va reforzar el tresporte dende la periferia.

    La campaña de «Compañera, dame tira» ye, amás, una campaña que debe’l so ésitu a la collaboración, participación y xunidá de tol territoriu. Y ello va vese bien el próximu 8 de marzu a les 19 hores en Mieres. Porque dar tira al feminismu, anguaño, ye imprescindible.

  • Un egresáu de la Universidá d’Uviéu ficha pola Scuderia Ferrari de Fórmula 1

    Un egresáu de la Universidá d’Uviéu ficha pola Scuderia Ferrari de Fórmula 1

    Miguel Menéndez, graduáu n’Inxeniería Mecánica na Escuela Politécnica de Xixón de la Universidá d’Uviéu, fichó pola firma italiana de F1 Ferrari. Menéndez compaxinó los sos estudios d’Inxeniería Mecánica cola participación en diversos proyectos.

    Foi miembru del equipu de Motostudent de la Universidá d’Uviéu, que coordina’l profesor Álvaro Noriega, mientres delles ediciones, la primera como inxenieru júnior de xasis y, más tarde, como responsable del departamentu. Completó les práctiques en Bango Racing Cars (BRC), onde tuvo trabayando con componentes de la tresmisión. Darréu, al pie de otros compañeros, refundaron l’equipu de Fórmula Student de la Universidá d’Uviéu, que coordina del profesor Francisco Fernández Llinera, nel que foi responsable del departamentu de Powertrain.

    Terminaos los sos estudios de grau, tuvo un añu trabayando con Diego y Pablo Rodríguez en DPK Racing, equipu asturianu de karting, como Data Engineer (analizando’l pilotaxe y rendimientu del kart colos sistemes d’alquisición). Nesti equipu, tuvo ocasión de competir en campeonatos europeos y mundiales.

    Finalmente, realizó un Máster en Motorsport Engineering en Oxford Brookes, onde formó parte del departamentu de Vehicle Dynamics y ganó la competición de Formula Student UK nes categoríes de Diseñu y Laptime Simulation.

    Anguaño, foi escoyío pa la Ferrari F1 Engineering Academy, un procesu de selección ente universidaes d’Europa realizáu pola Scuderia na que va tar trabayando mientres los próximos seis meses.